ADផ្ទាំងផ្សព្វផ្សាយពាណិជ្ជកម្ម

Picture

ក្រោយ​បាត់​វត្តមាន​ជាង​២០​ឆ្នាំ ត្រី​ប៉ា​សា​ណា​ក់ បង្ហាញខ្លួន​ជា​ថ្មី នៅ​​ទន្លេមេគង្គ​កម្ពុជា

1 ឆ្នាំ មុន

ខេត្តស្ទឹងត្រែង ៖ ត្រី​«​ប៉ា​សា​ណា​ក់​» ដែល​ប្រជាពលរដ្ឋ​ខ្មែរ ខាន​បានឃើញ​វត្តមាន​របស់​ត្រី​នេះ តាំងពី​អំឡុង​ទសវត្សរ៍​ឆ្នាំ​២០០០ បាន​បង្ហាញមុខ​កាលពី​ពេល​ថ្មី​ៗ​នេះ ជា​លើក​ដំបូង នៅ​តំបន់​ទន្លេមេគង្គ នៃ​ខេត្តស្ទឹងត្រែង…

ខេត្តស្ទឹងត្រែង ៖ ត្រី​«​ប៉ា​សា​ណា​ក់​» ដែល​ប្រជាពលរដ្ឋ​ខ្មែរ ខាន​បានឃើញ​វត្តមាន​របស់​ត្រី​នេះ តាំងពី​អំឡុង​ទសវត្សរ៍​ឆ្នាំ​២០០០ បាន​បង្ហាញមុខ​កាលពី​ពេល​ថ្មី​ៗ​នេះ ជា​លើក​ដំបូង នៅ​តំបន់​ទន្លេមេគង្គ នៃ​ខេត្តស្ទឹងត្រែង ហើយ​ត្រូវ​បាន​ប្រជា​នេសាទ នេសាទ​បាន និង​មន្ត្រី​ជំនាញ​បាន​ជួប​ប្រទះ​ឃើញ ពេល​ប្រជា​នេសាទ យក​ទៅ​លក់​នៅ​ទីផ្សារ ក្នុង​ខេត្តស្ទឹងត្រែង នេះ​បើ​យោង​តាម​លោក នេត្រ ភក្ត្រា រដ្ឋលេខាធិការ និង​ជា​អ្នកនាំពាក្យ​ក្រសួងបរិស្ថាន ។

ត្រី​ប៉ា​សា​ណា​ក់ ឬ​អាច​ហៅ​បាន​ថា ជា​ត្រី​សាល​ម៉ុ​ន​យក្ស​ទន្លេមេគង្គ ត្រូវ​បាន​ចាត់​ថ្នាក់​ជា​ប្រភេទ​ត្រី ទទួល​រង​ការ​គំរាមកំហែង ជិត​ផុត​ពូជ នៅ​ក្នុង​បញ្ជី​ក្រហម​របស់​អង្គការ សហភាព​អន្តរជាតិ​សម្រាប់​អភិរក្ស​ធម្មជាតិ (IUCN) នៅ​តែ​បង្ហាញ​វត្ត​មាននៅ​កម្ពុជា នៅឡើយ​ទេ ។ នេះ​មាន​ន័យ​ថា ទន្លេមេគង្គ ឬ​ទន្លេសាប នៅ​តែ​ជា​ជម្រក​របស់​ប្រភេទ​ត្រី​ជិត​ផុត​ពូជ ប្រភេទ​ត្រី​កម្រ និង​ត្រី​ទឹកសាប​ដទៃ​ទៀត ។

ត្រី​ប៉ា​សា​ណា​ក់​នេះ ភាគច្រើន​រស់នៅ​តំបន់​មេគង្គ​លើ និង​ប៉ែក​ខាង​ប្រទេស​ឡាវ និង​ប្រទេស​ថៃ ។ ដោយឡែក​វា​បង្ហាញ​វត្តមាន ច្រើន​នៅ​ទន្លេស្រែពក កាលពី​ពេល​កន្លង​ទៅ​ហើយ ទីនោះ​ជា​ជម្រក​របស់​ប្រភេទ​ត្រី​ប៉ា​សា​ណា​ក់​នេះ រួម​នឹង​ប្រភេទ​ត្រី​ទឹកសាប​ជា​ច្រើន​ទៀត ។

យោង​តាម​សៀវភៅ ស្តី​ពី ត្រី​ទឹកសាប នៃ​ព្រះរាជាណាចក្រ​កម្ពុជា ត្រី​ប៉ា​សា​ណា​ក់ ដែល​មានឈ្មោះ​វិទ្យាសាស្ត្រ Aaptosyax grypus ជា​ប្រភេទ​ត្រី​មាន​ស្រកា​ល្អិត មាត់ធំ ថ្គាម​ខាងក្រោម​ធំ​ស្នាម​គន្លាក់​នៅ​កណ្តាល និង​ថ្គាម​លើ​គ្របដណ្តប់​លើ​ថ្គាម​ក្រោម គ្មាន​ពុកមាត់ និង​ព្រុយ​ខ្នង​គ្មាន​ទ្រនុង​រឹង ហើយ​ពោះ​រាង​មូល ខ្លួន​រាង​ស្រ​ឡូ​ន និង​មាន​ប្រវែង​វែង​បំផុត ១០០​សង់ទីម៉ែត្រ ឬ​១​ម៉ែត្រ ។

ចំពោះ​លក្ខណៈ​ជីវសាស្ត្រ​របស់​ត្រី​ប៉ា​សា​ណា​ក់​វិញ វា​ជា​ប្រភេទ​ត្រី​ដែល​មាន​ទំហំ​ធំ និង​រស់នៅ​តាម​តំបន់ នៃ​ទន្លេមេគង្គ​។ ត្រី​ប៉ា​សា​ណា​ក់ ធ្វើ​ចរាចរណ៍​ឡើង​ពី​ខែមករា ទៅ​ខែកុម្ភៈ រក​កន្លែង​ពង​កូន​នៅ​តាម​អន្លង់ តាម​ដង​ទន្លេមេគង្គ ក្នុង​ខេត្តស្ទឹងត្រែង ខាងក្រោម ល្បាក់ខោន ។ ត្រី​នេះ កម្រ​ចាប់​វា​បាន​ណាស់ នៅ​ប្រទេស​កម្ពុជា ហើយ​ប្រជា​នេសាទ​នៅ​ស្រុក​ថា​ឡា​បរិ​វាត់ ខេត្តស្ទឹងត្រែង និង​ខេត្តរតនគិរី (​ទន្លេស្រែពក​) ធ្លាប់​ចាប់​ត្រី​នេះ នៅ​ទន្លេមេគង្គ ដោយ​ឧបករណ៍​នេសាទ​មង ។ វា​ជា​ប្រភេទ​ត្រី​ស៊ី​កូន​ត្រី​ដទៃ​ជា​អាហារ និង​អាច​ចាប់​បាន ដោយ​ឧបករណ៍​មង អួន សន្ទូច និង​សំណាញ់ ។

ត្រី​ប៉ា​សា​ណា​ក់ ស្ថិត​ក្នុង​ពពួក​ទី​១ នៃ​ឧ​ប​សម្ព័ន្ធ របស់​ត្រី​ទឹកសាប នៃ​ព្រះរាជាណាចក្រ​កម្ពុជា ដែល​មាន​០៣​ប្រភេទ ហើយ​ត្រី​ប៉ា​សា​ណា​ក់​នេះ ជា​ពពួក​ត្រី​ស ដែល​មាន​ន័យ​ថា​ជា​ប្រភេទ​ត្រី​ដែល​រស់នៅ​ជិត​ពេញ​មួយ​ឆ្នាំ ក្នុង​ជម្រក​សំខាន់​ៗ តាម​ទន្លេ និង​ដៃ​ធំ​ៗ​នៃ​ទន្លេ និង​ជា​ប្រភេទ​ត្រី​ធ្វើ​ចរាចរណ៍​ឆ្ងាយ គឺ​ចេញពី​ទន្លេ​ចូល​ទៅ​តំបន់​លិច​ទឹក​នៅ​រដូវវស្សា លុះ​ទឹក​ស្រក វា​ត្រលប់​មក​ជម្រក​សំខាន់​របស់​វា​វិញ ។ សរីរាង្គ​វិទ្យា​របស់​ពពួក​ត្រី​ស មិន​អាច​ផ្សាំ​ទៅ​នឹង​លក្ខខណ្ឌ​បរិស្ថាន​នៃ​តំបន់ដីសើម ដូច​ជា​កម្រិត​អុក​ស៊ី​សែន​ទាប​ដូច​ប្រភេទ​ត្រី​ខ្មៅ​ទេ ៕

អត្ថបទសរសេរ ដោយ

កែសម្រួលដោយ