រាជធានីភ្នំពេញ ៖ បុរសជាជនជាតិស្បែកខ្មៅ រួមនឹងនារីជាសង្សារ ជនជាតិខ្មែរម្នាក់ចេញពីផឹកស៊ីវិញ ស្រវឹងទោរទន់ បានជិះម៉ូតូជ្រុលទៅបុក នឹងខឿនពុះចែកផ្លូវបណ្ដាលឲ្យបុរសជាអ្នកបើកម៉ូតូរងរបួសធ្ងន់ ចំនែកនារីជាសង្សាររងរបួសស្រាល ហេតុការណ៍នេះកើតឡើងនៅវេលាម៉ោង១១និង៤៥នាទីយប់ ថ្ងៃទី០៦ ខែមិថុនា ឆ្នាំ២០១៧ នៅជិតទីបញ្ជាការកងរាជអាវុធហត្ថក្រុងភ្នំពេញតាមផ្លូវវេងស្រេង សង្កាត់ស្ទឹងមានជ័យ ខណ្ឌមានជ័យ ។
តាមសម្ដីនារីដែលរងរបួសស្រាលបានឲ្យដឹងថា មុនពេលកើតហេតុ ពួកគាត់មានគ្នា២នាក់សង្សារ ដែលជាជនជាតិស្បែកខ្មៅ បានចេញពីកម្មវិធីជួបជុំមិត្តភក្ដិ នៅម្តុំផ្សារកណ្តាលគោលបំណងត្រលប់ទៅផ្ទះវិញ នៅម្ដុំបុរីពិភពថ្មី ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ដោយបានជិះម៉ូតូម៉ាក YAMAHA FINO ពណ៌ខៀវ ពាក់ស្លាកលេខ ភ្នំពេញ ១BZ-៣៣៩៧ បានធ្វើដំណើរតាមផ្លូវវ៉េងស្រេង ក្នុងទិសដៅពីកើតទៅលិច ក្នុងល្បឿនយ៉ាងលឿន លុះមកដល់ចំណុចដែលជាផ្លូវរាងកោងបន្តិច តែបុរសជាសង្សាររបស់គាត់ មិនបានបន្ថយល្បឿន ធ្វើឲ្យម៉ូតូជ្រុលទៅបុក នឹងខឿនពុះចែកផ្លូវបណ្ដាលដួលម៉ូតូអូសជិត១០ម៉ែត្រ និងធ្វើឲ្យបុរសជាសង្សាររងរបួសបាក់ជើងខាងឆ្វេង ត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លីនិក សួគ៌ា ។
ដោយឡែករូបគាត់រងរបួសរលាត់ដៃជើងតិចតួច បានលើកម៉ូតូជិះទៅតាមរថយន្តសង្គ្រោះពីក្រោយតែម្តងទៅ ៕
ចែករំលែកព័តមាននេះ