​ព្រះសីហនុ៖ រយៈពេល ២ថ្ងៃ ចាប់ពីថ្ងៃទី៩-១០ ខែធ្នូ ឆ្នាំ២០២២ នៃព្រឹត្តិការណ៍បុណ្យសមុទ្រ លើកទី៩ ជុំទី៣ នៅខេត្តព្រះសីហនុ មានភ្ញៀវទេសចរ និងប្រជាពលរដ្ឋ ចូលរួមទស្សនាប្រមាណ ៤៦ម៉ឺននាក់។ ​ពិធីបុណ្យ​សមុទ្រ នៅបន្ត​ ១ទៀត នៅថ្ងៃទី១១ធ្នូនេះ ដែល​ក្រសួង មិនទាន់បូក​សរុបចំនួន​អ្នកចូលទៅទស្សនា​នៅឡើយទេ​។

របាយការណ៍របស់​មន្ទីរទេសចរណ៍ ខេត្តព្រះសីហនុ បង្ហាញថា ពិធីបុណ្យសមុទ្រ នៅថ្ងៃទី១ ត្រូវនឹង​ថ្ងៃទី៩ធ្នូ​ មានភ្ញៀវប្រមាណ ១៦ម៉ឺននាក់ និងថ្ងៃទី២ ត្រូវនឹង​ថ្ងៃទី១០ធ្នូ ដែលជាថ្ងៃបើក​ពិធីបុណ្យសមុទ្រជាផ្លូវការ មានភ្ញៀវ និងប្រជាពលរដ្ឋ ចូលរួមកម្សាន្តប្រមាណ ៣០ម៉ឺននាក់។ ដោយឡែក នៅថ្ងៃទី៣ ត្រូវនឹងថ្ងៃអាទិត្យ ទី១១ធ្នូ ដែលជាថ្ងៃចុងក្រោយនេះ មន្ទីរទេសចរណ៍ មិនទាន់បូកសរុប​ចំនួន​ភ្ញៀវចូលទស្សនានោះទេ​។

ពិធីបុណ្យសមុទ្រ បានប្រារព្ធពិធី​បើកជាផ្លូវការ ក្រោមអធិបតីភាពសម្ដេចតេជោ ហ៊ុន សែន នាយរដ្ឋមន្ត្រីនៃកម្ពុជា កាលពីយប់​ថ្ងៃទី១០ ខែធ្នូ ដោយមានទាំង​ការសម្ដែងសិល្បៈ​របស់សិល្បករជាតិ និងសិល្បករអន្តរជាតិ (ឥណ្ឌា ម៉ាឡេស៊ី ថៃ វៀតណាម ជាដើម) ការសម្ដែងរបាំ និងសិល្បៈចម្រៀងប្រពៃណី ជាដើម។

បញ្ហាសន្តិសុខ សណ្ដាប់ធ្នាប់ នៅក្នុងព្រឹត្តិការបុណ្យសមុទ្រនេះ គឺមិនមានអ្វីកើតឡើង គួរឱ្យកត់សម្គាល់នោះឡើយ ខណៈការធ្វើដំណើរនៅតាមដង គឺមានការមមាញឹកបន្តិច។

នៅក្នុងព្រឹត្តិការណ៍បុណ្យសមុទ្រ រយៈពេល ៣ថ្ងៃនេះ​ មានឆាកប្រគំតន្ត្រី ៥ឆាកធំៗ នៅតាមបណ្ដោយឆ្នេរសមុទ្រ ក្នុង​ក្រុងព្រះសីហនុ និងសកម្មភាពកម្សាន្តជាច្រើនទៀត ដែលបានជួយទាក់ទាញភ្ញៀវទេសចរយ៉ាងច្រើន​។

ក្រៅពីនេះ ក៏មានការតាំងពិព័រណ៍សមិទ្ធផលនានា គម្រោងអភិវឌ្ឍតំបន់ឆ្នេរ និងផលិតផលខ្មែរ ផលិតផលសហគ្រាសធុនតូចនិងមធ្យម ការតាំងពិព័រណ៍ពាណិជ្ជកម្ម និងផលិតផលបរទេស និងមហោស្រពម្ហូបអាហារនិងភេសជ្ជៈ នៅទីលាតេជោ សរុបទាំងអស់ មានចំនួន៣០០ស្ដង់។

ពិធីបុណ្យសមុទ្រ លើកទី៩នេះ រៀបចំឡើង រយៈពេល ៣ថ្ងៃ ចាប់ពីថ្ងៃទី៩-១១ ខែធ្នូ ឆ្នាំ២០២២ អមជាមួយនឹងការធ្វើជាម្ចាស់ផ្ទះ រៀបចំមហាសន្និបាតក្លិបឆ្នេរសមុទ្រ ដែលស្អាតបំផុតលើសកល​លោក ចាប់ពីថ្ងៃទី៩-១៤ ខែធ្នូ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»៕