ថៃក្លាយជាទីផ្សារដ៏ទាក់ទាញបំផុត សម្រាប់ក្រុមហ៊ុនយក្ស២របស់សហរដ្ឋអាមេរិក
ថៃ ៖ ក្រុមយក្សរបស់សហរដ្ឋអាមេរិកចំនួន២រួមមាន ក្រុមហ៊ុនរថយន្តអគ្គិសនី Tesla និងក្រុមហ៊ុន
ថៃ ៖ ក្រុមយក្សរបស់សហរដ្ឋអាមេរិកចំនួន២រួមមាន ក្រុមហ៊ុនរថយន្តអគ្គិសនី Tesla និងក្រុមហ៊ុនបច្ចេកវិទ្យាពហុជាតិ Apple បាននិងកំពុងជ្រើសរើសទីផ្សារប្រទេសថៃ សម្រាប់ការប្រកួតប្រជែងរបស់ខ្លួន។
យោងតាមប្រភពពីសារព័ត៌មានបាងកកប៉ុស្ត៍ កាលពីថ្ងៃទី០៧ ខែធ្នូ ឆ្នាំ២០២២ បានរាយការណ៍ថា ក្រុមហ៊ុនរថយន្តពហុជាតិសាសន៍ និងថាមពលស្អាតរបស់អាមេរិក Tesla របស់មហាសេដ្ឋីមានបំផុតលំដាប់ទី១លើពិភពលោក Elon Musk បានចាប់ផ្តើមការលក់រថយន្តអគ្គិសនី (EV) នៅប្រទេសថៃ ដោយផ្តល់មកជាមួយនូវរថយន្តប្រភេទ Model 3 និង Model Y ដ៏ពេញនិយមរបស់ខ្លួន នៅក្នុងតម្លៃដែលមានបំណងប្រកួតប្រជែងជាមួយគូប្រជែងដូចជាក្រុមហ៊ុន BYD របស់ប្រទេសចិន។
ក្រុមហ៊ុន Tesla បានរៀបចំការតាំងបង្ហាញដ៏ស្រស់ស្អាតនៃគម្រោងរបស់ខ្លួន កាលពីថ្ងៃទី០៧ ខែធ្នូ កន្លងទៅ នៅផ្សារទំនើប Siam Paragon ក្នុងទីក្រុងបាងកក ហើយការទិញតាមប្រព័ន្ធអ៊ីនធឺណិតទៀតសោត ក៏បានចាប់ផ្តើមផងដែរ ដោយមានផែនការដឹកជញ្ជូនរថយន្តទៅឱ្យអ្នកទិញ នៅត្រីមាសទី១ នាឆ្នាំក្រោយ។
ទីផ្សារនៃអ្នកប្រើប្រាស់ជាង ៦០០លាននាក់ នៅអាស៊ីអាគ្នេយ៍គឺផ្តោតកាន់តែខ្លាំងឡើងសម្រាប់ក្រុមហ៊ុនផលិតរថយន្ត ដែលកំពុងស្វែងរកការពង្រីកការលក់របស់ខ្លួន ជាពិសេសលើរថយន្តអគ្គិសនីតែម្តង។
ក្រុមហ៊ុនកំពុងលក់រថយន្តប្រភេទ Model 3 Long Range និង Performance Model របស់ខ្លួន។ ចំណែករថយន្តប្រភេទ Model Y នឹងត្រូវបានលក់ជា៣ជំនាន់ ដើម្បីបំពេញតម្រូវការជាក់លាក់នៃរបៀបរស់នៅក្នុងពិភពរថយន្តអគ្គិសនី (EV) សម្រាប់អ្នកបើកបរជនជាតិថៃគ្រប់រូប ខណៈតម្លៃនឹងមានចាប់ពី ១.៧៦លានបាត រហូតដល់ ២.៥លានបាត ដែលស្មើនឹង៥ម៉ឺនដុល្លារ ដល់ជាង ៧ម៉ឺនដុល្លារ។
នេះគឺជាដំណឹងដ៏រីករាយបន្ថែមទៀត សម្រាប់ប្រជាជនថៃ ខណៈដែលកាលពីពេលថ្មីៗកន្លងទៅ ក្រុមហ៊ុនបច្ចេកវិទ្យាពហុជាតិរបស់អាមេរិក Apple គ្រោងនឹងផ្លាស់ប្តូរទីតាំងផលិតកម្មរបស់ខ្លួន ចេញពីប្រទេសចិន ដែលជាប្រទេសលេចធ្លោជាងគេបំផុត នៅក្នុងខ្សែសង្វាក់ផ្គត់ផ្គង់របស់ក្រុមហ៊ុន ហើយអ្នកផ្គត់ផ្គង់កំពុងត្រូវបានស្នើសុំឱ្យរៀបចំផែនការផ្លាស់ទីតាំង ទៅកន្លែងផ្សេងទៀតក្នុងតំបន់អាស៊ី ជាពិសេសទៅកាន់ប្រទេសឥណ្ឌា ថៃ និងវៀតណាម ដើម្បីកាត់បន្ថយការពឹងផ្អែកដ៏ច្រើនលើសលុបពីក្រុមហ៊ុន Foxconn Technology Group របស់ចិន និងតៃវ៉ាន់។
លោក Ming-Chi Kuo ដែលជាអ្នកវិភាគនៅក្រុមហ៊ុន TF International Securities ដែលជាក្រុមហ៊ុនសេវាកម្មហិរញ្ញវត្ថុ នៅតំបន់អាស៊ីប៉ាស៊ីហ្វិក បាននិយាយថា ទីតាំងផលិតសំខាន់នៅក្រៅប្រទេសចិន សម្រាប់ MacBooks នាពេលអនាគតរបស់ Apple អាចជាប្រទេសថៃ ដែលជាទីតាំងដ៏មានសក្តានុពល ចំពេលភាពចលាចលនៅក្នុងទីក្រុង iPhone ដែលជាទីក្រុងដ៏ធំសម្រាប់ការផលិតទូរស័ព្ទ iPhone ដែលមានមូលដ្ឋានក្នុងទីក្រុង Zhengzhou ប្រទេសចិន បានរកឃើញកម្មកររហូតដល់ ៣០ម៉ឺននាក់ បានចូលរួមក្នុងការតវ៉ាដោយហិង្សា កាលពីសប្តាហ៍មុន។
ក្រុមហ៊ុន Apple និងចិន បានចំណាយពេលរាប់ទសវត្ស ក្នុងការចងភ្ជាប់ទំនាក់ទំនងជាមួយគ្នា ដែលរហូតមកដល់ពេលនេះ ភាគច្រើនមានផលប្រយោជន៍ទៅវិញទៅមក។ Apple នៅតែដាក់ចេញនូវម៉ូដែល iPhone ថ្មីជារៀងរាល់ឆ្នាំ រួមជាមួយនឹងការធ្វើបច្ចុប្បន្នភាពជាប្រចាំនៃ iPads, Laptops និងផលិតផលផ្សេងទៀត។
ប៉ុន្តែការផ្លាស់ប្តូរនេះ កំពុងដំណើរការ ដែលត្រូវបានជំរុញដោយមូលហេតុចម្បង ២ គឺ យុវជនចិនលែងមានចិត្តចង់ធ្វើការ ដើម្បីបានប្រាក់ខែតិចតួចទៀតហើយ ហើយរយៈពេល៣ឆ្នាំ បន្ទាប់ពីកូវីដ-១៩ បានចាប់ផ្តើមផ្ទុះឡើង រដ្ឋាភិបាលចិន នៅតែព្យាយាមទប់ស្កាត់ជាមួយនឹងវិធានការដ៏តឹងរឹងបំផុតរបស់ខ្លួន ដែលក្នុងនោះរួមទាំង ការធ្វើតេស្តជាប្រចាំ និងការដាក់ឱ្យនៅដាច់ពីគេ។ល។ ខណៈប្រទេសជាច្រើនផ្សេងទៀតនៅជុំវិញពិភពលោក បានត្រឡប់ទៅរកការរស់តាមបទដ្ឋាន មុនការរាតត្បាតកើតឡើង៕ (ដកស្រង់ចេញពី បាងកកប៉ុស្តិ៍, AFP និង The Thaiger)
ចែករំលែកព័តមាននេះ