ខេត្តកំពត ៖ ក្រុមចោរយ៉ាងសកម្មចំនួន10នាក់ដែលធ្វើសកម្មភាពឆក់កាបូប ឆក់ទូរសព្ទដៃ និងឆក់ដបសាំងដែលប្រជាពលរដ្ឋដាក់លក់លើចិញ្ចើមផ្លូវជាតិតាមមុខផ្ទះ ត្រូវបានកម្លាំងនគរបាលឃាត់ខ្លួនបានហើយ ។
តាមការឲ្យដឹងពីការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពត កាលពីព្រឹកថ្ងៃទី៧ ធ្នូ ថា កាលពីថ្ងៃទី5 ធ្នូឆ្នាំ មានករណីក្រុមចោលឆក់មួយក្រុមមានគ្នា១០នាក់ ក្នុងនោះមានស្រីម្នាក់ជិះម៉ូតូ5គ្រឿងចេញពីភ្នំពេញ ឆ្ពោះមកកាន់ខេត្តកំពត ក្នុងគោលបំណងទៅធ្វើសកម្មភាពនៅខេត្តព្រះសីហនុ ។
ប្រភពបន្តថា ពេលក្រុមនេះមកដល់ចំណុចស្ថានីយលក់សាំងមួយកន្លែង ស្ថិតនៅក្នុងភូមិត្រពាំងច្រាប ឃុំថ្មី ស្រុកទឹកឈូ ពួកគេ២នាក់ជិះម៉ូតូមួយគ្រឿង បានធ្វើសកម្មភាពឆក់ទូរសព្ទអាយហ្វូនរបស់នារីរងគ្រោះម្នាក់ ដែលចូលចាក់សាំងរួចបើកម៉ូតូសំដៅចូលមកក្រុងកំពត ។ រីឯគ្នាគេពីរនាក់ទៀត ជាអ្នកបិទគូទដោយ ជិះម៉ូតូមួយគ្រឿងទៀតបានឆក់យកសោរពីម៉ូតូនារីរងគ្រោះចេញពីម៉ូតូ រួចជិះគេចខ្លួនតាមក្រោយដើម្បីកុំឲ្យជនរងគ្រោះជិះម៉ូតូដេញតាមបាន ។
ប្រភពដដែលឱ្យដឹងទៀតថា ក្រោយពីធ្វើសកម្មភាពឆក់បានទូរសព្ទដៃមួយគ្រឿងហើយ ក្រុមចោរទាំង១០នាក់នោះបានជិះម៉ូតូឡើងទៅលេងភ្នំបូកគោ ។ រីឯជនរងគ្រោះម្ចាស់ទូរសព្ទ iphone បានប្ដឹងកម្លាំងសមត្ថកិច្ចប៉ុស្តិ៍រដ្ឋបាលឃុំថ្មី ស្រុកទឹកឈូ ឱ្យជួយអន្តរាគមន៍ ។
ប្រភពបន្តទៀតថា ក្រោយពីពួកគេចុះពីភ្នំបូកគោវិញ ពួកគេមានគោលបំណងធ្វើដំណើរទៅធ្វើសកម្មភាពនៅខេត្តព្រះសីហនុ ប៉ុន្តែនៅពេលធ្វើដំណើរដល់ចំណុចកន្លែងលក់សាំងឯកជនមួយ ស្ថិតក្នុងភូមិគីឡូ១២សង្កាត់កោះតូច ក្រុងបូកគោ ដោយម៉ូតូពួកគេទាំង៥គ្រឿងនោះចង់អស់សាំង។ ពេលនោះគ្នាគេ២នាក់បានជិះម៉ូតូមកអែបកន្លែងលក់សាំង រួចឆក់បានសាំងពីរដប(ចំនួន២លីត្រ) ហើយបើកម៉ូតូរត់គេចខ្លួនតាមបណ្តោយផ្លូវជាតិលេខ ៣ កំពត ខេត្តព្រះសីហនុ ។
ពេលនោះជនរងគ្រោះអ្នកលក់សាំងបានប្ដឹងសមត្ថកិច្ចប៉ុស្តិ៍រដ្ឋបាលសង្កាត់កោះតូច ក្រុងបូកគោឲ្យជួយអន្តរាគមន៍ភ្លាមៗ ពេលនោះកម្លាំងសមត្ថកិច្ចក្រុងបូកគោបានតាមឃាត់ខ្លួនក្រុមចោលនេះបានបួននាក់ ។ នៅភូមិព្រែកត្នោតសង្កាត់ព្រែកត្នោត ក្រុងបូកគោ រួចគូកនគ្នាវា៦នាក់ទៀត បានរត់គេចខ្លួនបកមកក្រោយវិញ ។ ពេលនោះកម្លាំងអធិការក្រុងបូកគោបានសហការជាមួយក្រុងកំពតនិងកម្លាំងនគរបាលចរាចរណ៍ខេត្តឲ្យជួយស្ទាក់ផ្លូវ ក្រោយមកកម្លាំងសមត្ថកិច្ចក្រុងបូកគោបានដេញតាមប្រផាប់ចាប់ពីភីងពីក្រោយ រួចស្ទាក់ចាប់បាននៅចំណុចជិតប៉ុស្តិ៍រដ្ឋបាលសង្កាត់អណ្ដូងខ្មែរស្ពានបេសេអុី (BCI) ។
រីឯគូកនពីរនាក់ទៀតបានរត់ចូលមកស្រុកទឹកឈូ ហើយត្រូវបានកម្លាំងនគរបាលក្រុងកំពត ក្រុងបូកគោស្រុកទឹកឈូនិងចរាចរណ៍ខេត្តស្ទាក់ចាប់បាននៅចំណុចភូមិព្រៃតុម្ព ឃុំព្រៃឃ្មុំ ស្រុកទឹកឈូនៅថ្ងៃដដែល។ ក្រុមចោរប្រុសស្រីទាំង១០នាក់ដែលសមត្ថកិច្ចឃាត់ខ្លួនបានរួមមាន: ១-ឈ្មោះយេ៉នពិសិដ្ឋ ភេទប្រុស អាយុ១៧ ឆ្នាំស្នាក់នៅភូមិឬស្សី សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
ព័ត៌មានលម្អិតនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ