តាមធម្មតាអ្នកដែលមានចិត្តស្ម័គ្រចូលមកបួសក្នុងព្រះពុទ្ធសាសនា ត្រូវតែសិក្សាឱ្យដឹងពីទំនៀមទម្លាប់ ពុទ្ធានុញ្ញាត និងពុទ្ធប្បញ្ញត្តិរហូតដល់ចេះដឹងនូវពុទ្ធោវាទដែលត្រាស់ប្រដៅដើម្បីនឹងបានប្រតិបត្តិឱ្យត្រឹមត្រូវតាមធម៌វិន័យរបស់អ្នកបួស ហើយហាត់ពត់កាយ វាចា និងចិត្តរបស់ខ្លួនឱ្យប្រព្រឹត្តទៅក្នុងចំណែកដែលល្អ សមនឹងភាពជាសមណៈក្នុងធម្មវិន័យរបស់ព្រះពុទ្ធ ចៀសឱ្យឆ្ងាយពីការងារគ្រហស្ថមានចូលរួមធ្វើនយោបាយ ចូលរួមធ្វើបាតុកម្ម និងចូលរួមក្នុងសកម្មភាពផ្សេងទៀត បែរជាខ្ជិលធ្វើតាមពុទ្ធឱវាទដែលជាកិច្ចធុរៈខ្លួនឯងផ្ទាល់ នេះហើយដែលនាំឱ្យអន្តរាយរបស់អ្នកបួស ។
ខាងក្រោមនេះជាចំណុចស្នូលដែលនាំឱ្យភិក្ខុ សាមណេរវិនាស ៖
១-មិនអត់ធន់ដល់ពាក្យទូន្មាន ខ្ជិលធ្វើតាម
២-មិនចេះអត់ធន់នឹងសេចក្តីស្រេកឃ្លាន
៣-ត្រេកអរក្នុងកាមគុណ
៤-ស្រឡាញ់ស្ត្រីភេទ ។
ភិក្ខុសាមណេរប្រាថ្នាសេចក្តីចម្រើនដល់ខ្លួន គួរប្រយ័ត្នកុំឱ្យអន្តរាយទាំង៤យ៉ាងនេះមកញាំញីបានឱ្យសោះ ។
ភិក្ខុសាមណេរត្រូវអាស្រ័យអ្នកដទៃគេចិញ្ចឹម បើគេចិញ្ចឹមយ៉ាងណា ក៏ត្រូវបរិភោគយ៉ាងនោះ ទ្រង់បញ្ញត្តិហាមប្រាមមិនឱ្យបរិភោគអាហារក្នុងវេលាវិកាល(ខុសពេលដូច ពេលយប់ ពេលរសៀល…)នោះទេ ទើបធ្វើខ្លួនឱ្យជាមនុស្សដែលគេចិញ្ចឹមងាយ ជាអ្នកអត់ធន់នឹងការស្រេកឃ្លាន បើនៅតែរវល់នឹងរឿងអាហារបរិភោគនោះ អត់ធន់មិនបាន ក៏នឹងធ្លាក់ទៅក្នុងអន្លង់នៃសេចក្តីអន្តរាយ ។
កាមគុណគឺ រូប, សំឡេង, ក្លិន, រស, សម្ជស្ស ដែលគួរស្រឡាញ់ គួរប្រាថ្នាជាសត្រូវនឹងព្រហ្មចរិយៈ ភិក្ខុសាមណេរត្រូវសង្រួមប្រយ័ត្ន ហើយព្យាយាមលះវៀរចេញឱ្យឆ្ងាយ ។ លោកប្រដៅមិនឱ្យប្រាថ្នាសេចក្តីសុខលើសលុបនឹងកាមគុណឡើយ ។ បើភិក្ខុសាមណេរនៅស្រវឹងភ្លើតភ្លើនយកចិត្តទុកដាក់ចំពោះតែកាមគុណនោះ ជាហេតុនាំឱ្យចិត្តកម្រើករហូតអត់ទ្រាំនៅបួសតទៅទៀតមិនបាន ព្រោះហេតុនោះហើយដែលនាំឱ្យអន្តរាយ ។
ការត្រិះរិះដែលជាប់ទាក់ទងទៅនឹងស្ត្រី គឺស្រឡាញ់ស្ត្រីភេទជាគ្រឿងកាត់ផ្លូវចម្រើនយ៉ាងខ្លាំងក្លា ព្រោះចិត្តទៅជាប់នៅតែនឹងស្ត្រីភេទដែលខ្លួនស្រឡាញ់ មិនបានតាំងចិត្តសិក្សារៀនសូត្រ និងប្រតិបត្តិកិច្ចក្នុងភាពជាសមណៈឡើយ ប្រការនេះឯងហើយដែលនាំឱ្យអន្តរាយអាក្រក់ណាស់គឺអាក្រក់ជាងប្រការដទៃៗទៅទៀត ។
ទោះជាយា៉ងណាអន្តរាយខាងលើនេះរមែងកើតមានដល់ភិក្ខុសាមណេរអ្នកបួសថ្មីច្រើនជាងភិក្ខុសាមណេរអ្នកបួសយូរ។ ដោយហេតុថា កាលបើលោកបួសយូរធ្លាប់អត់ធ្មត់សង្កត់ចិត្តបានសិទ្ធមកហើយ អប់រំចិត្តបានល្អហើយ ក៏ឃើញថាស្រាលស្តើងទៅខ្លះ គ្រឿងសៅហ្មងមិនអាចនឹងមកញាំញីលោកខ្លាំងពេកទេ។ ព្រោះហេតុនោះទើបលោកពោលថា ភិក្ខុសាមណេរអ្នកបួសថ្មីចង់បានសេចក្តីចម្រើនដល់ខ្លួន គួរប្រយ័ត្នកុំឱ្យអន្តរាយ៤ប្រការនេះមកញាំញីបាន ៕
ចេញផ្សាយសម្រាប់ថ្ងៃសីល ៨កើត ខែជេស្ឋ ព.ស ២៥៦១
ចែករំលែកព័តមាននេះ