រាជធានីភ្នំពេញ ៖ នារីវ័យក្មេងដែលមានអាយុប្រមាណជាជាង ២០ឆ្នាំម្នាក់ បានរងរបួសត្រង់ចង្កេះយ៉ាងធ្ងន់ធ្ងរដេកក្រោកមិនរួច ដោយសារនាងបានជិះម៉ូតូម៉ាកកូនទា មួយគ្រឿងដោយខ្វះការប្រុងប្រយ័ត្ន ទៅបុកនឹងម៉ូតូម៉ាកវ៉េវមួយគ្រឿងពីក្រោយ បណ្តាលឲ្យដួលបោកទៅនឹងចិញ្ចើមថ្នល់ដោយខ្លួនឯង ។ ករណីគ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី០១ ខែមិថុនា ឆ្នាំ២០១៧ នៅចំណុចខាងមុខភូមិគ្រឹះមួយកន្លែង (ទល់មុខស្ថានទូតសិង្ហបុរី) ផ្លូវព្រះនរោត្តម ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីនគរបាលម្នាក់បានប្រាប់ឱ្យដឹងថា មុនពេលកើតហេតុរូបគាត់បានឃើញមានម៉ូតូម៉ាកវ៉េវ ពណ៍ក្រហមលាយស ពាក់ស្លាកលេខភ្នំពេញ ១C-០៨៤២ មួយគ្រឿង ដែលបើកបរដោយបុរសម្នាក់ និងម៉ូតូម៉ាកកូនទា ព៌ណប្រផេះ ពាក់ស្លាកលេខ ១FK-១៣៧១ មួយគ្រឿងទៀត បើកបរដោយនារីវ័យក្មេងម្នាក់បើកស្របទិសគ្នាខាងក្រោយ ។ លុះមកដល់ចំណុចកើតហេតុខាងលើ ទំនងជានាងបើកបរដោយខ្វះការប្រុងប្រយ័ត្ននោះ ក៏បានជ្រុលទៅបុកម៉ូតូម៉ាកវ៉េវ ដែលកំពុងតែបើកខាងមុខពីក្រោយពេញទំហឹងបណ្តាលឱ្យដួលទាំងពីរគ្រឿងតែម្តង ដោយនាងបានដួលបោកផ្ទុបទៅនឹងចិញ្ចើមផ្លូវ និងត្រូវម៉ូតូរបស់ខ្លួនសង្កត់ពីលើផងដែរ ។ ដោយបណ្តាលឲ្យនាងរងរបួសត្រង់ចង្កេះយ៉ាងធ្ងន់ធ្ងរ ដេកទៅលើដីក្រោកលែងរួច និងរលាត់ដៃជើង ចំណែកឯបុរសម្នាក់ដែលជិះម៉ូតូវ៉េវ ក៏ដួលរលាត់ដៃជើងរងរបួសស្រាល ចំណែកឯម៉ូតូទាំងពីរគ្រឿងក៏រងការខូចខាតផងដែរ ។
ក្រោយពេលកើតហេតុ នារីវ័យក្មេងរងគ្រោះត្រូវបានកម្លាំងមានសម្ថកិច្ចមូលដ្ឋានហៅរថយន្តសាមុយឲ្យមកដឹកយកទៅធ្វើការព្យាបាលនៅមន្ទីរពេទ្យកាល់ម៉ែត ចំណែកឯម៉ូតូទាំងពីរគ្រឿងត្រូវបានយកទៅរក្សាទុកនៅអធិការដ្ឋាននគរបាលខណ្ឌដូនពេញ ដើម្បីរង់ចាំធ្វើការដោះស្រាយគ្នាជាបន្តទៅទៀត ។
ចែករំលែកព័តមាននេះ