រថភ្លើងបុករថយន្តស្លា.ប់និងរបួសពលករខ្មែរ2នាក់នៅប្រទេសថៃ
ខេត្តបាត់ដំបង ៖ យ៉ាងហោចណាស់ពលករខ្មែរមា្នក់បានស្លា.ប់ និងម្នាក់ទៀតរងរបួសធ្ងន់ដោយគាបជាប់ក្នុងរថយន្តដែលត្រូវរថភ្លើងបុកកាលពីយប់ថ្ងៃទី៣១ ខែឧសភា
ខេត្តបាត់ដំបង ៖ យ៉ាងហោចណាស់ពលករខ្មែរមា្នក់បានស្លាប់ និងម្នាក់ទៀតរងរបួសធ្ងន់ដោយគាបជាប់ក្នុងរថយន្តដែលត្រូវរថភ្លើងបុកកាលពីយប់ថ្ងៃទី៣១ ខែឧសភា នៅចំណុចផ្លូវប្រសពឆ្លងកាត់ផ្លូវដែកមួយកន្លែងនៅក្នុងភូមិ២ ឃុំណងបួរ ស្រុកបានពោធិ ខេត្តឆាក់ឈើងសៅ ប្រទេសថៃ ដែលមន្ត្រីថៃទម្លាក់កំហុសទៅលើអ្នកបើកបររថយន្តថា ជាការប្រថុយប្រថាន និងធ្វេសប្រហែស ។
មន្ត្រីព្រំដែនខ្មែរបានរាយការណ៏ថា ឧប្បតិ្តហេតុគ្រោះថ្នាក់ចរាចរណ៏នេះបានបង្កឲ្យពលករខ្មែរ២នាក់រងគ្រោះគឺឈ្មោះ ណឺត ស្រូយ ភេទប្រុស អាយុ៣៩ឆ្នាំ រងរបួសធ្ងន់ និងម្នាក់ទៀតជាស្ត្រីតែមិនទាន់ស្គាល់ឈ្មោះបានស្លាប់គាបជាប់ក្នុងរថយន្ត ។ មន្ត្រីដដែលបានបញ្ជាក់ថា រថយន្តនោះបើកបរដោយជនជាតិថៃបានបើកឆ្លងកាត់ផ្លូវដែក តែគ្រានោះបានធ្លាក់ជង្ហុករើមិនរួច ស្របពេលរថភ្លើងបោះពួយមកដល់ក៏បុកពេញទំហឹងកំពិតរួញជាប់បង្គោលភ្លើងដែលពលករខ្មែរទាំង២នាក់នៅក្នុងនោះ ។ បើតាមអាជ្ញាធរថៃដែលបានផ្ដល់ព័ត៌មានមកមន្ត្រីព្រំដែនខ្មែរបានឲ្យដឹងថា នៅពេលដែលរថយន្តធ្លាក់ជង្ហុករើមិនរួចហើយឃើញរថភ្លើងបោះពួយកាន់តែជិត ស្រាប់តែអ្នកបើកបររថយន្តបានបើកទ្វារចុះរត់ ខណៈអ្នករួមដំណើរ២នាក់ជាពលករខ្មែរជាប់ក្នុងរថយន្តនោះ ។
មន្ត្រីថៃបានបញ្ជាក់ថា គ្រាន់តែរត់ចេញផុតពីរថយន្តបន្តិច រថភ្លើងក៏បានបុករថយន្តរុញផ្ទប់ជាប់នឹងបង្គោលភ្លើងក្បែរនោះគាបជាប់ទាំងមនុស្សចេញមិនរួច ។ គ្រានោះសមត្ថកិច្ចថៃក៏បានចុះទៅជួយអន្តរាគមន៏ភ្លាមៗដែរ និងបានប្រើឧបករណ៏កាត់ដែករថយន្តដើម្បីទាញជនរងគ្រោះទាំង២នាក់តែអកុសលស្ត្រីពលករខ្មែរម្នាក់បានស្លាប់ទៅហើយ រីឯពលករខ្មែរម្នាក់ទៀតរបួសធ្ងន់ដែលត្រូវសមត្ថកិច្ចថៃបញ្ជូនភ្លាមៗទៅកាន់មន្ទីរពេទ្យ ៕
ចែករំលែកព័តមាននេះ