រាជធានីភ្នំពេញ ៖ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនៅបរិវេណពហុកីទ្បដ្ឋានជាតិអូទ្បាំពិក ស្ថិតក្នុងសង្កាត់វាលវង់ ខណ្ឌ៧មករា នាព្រឹកថ្ងៃទី០៦ ខែធ្នូ ឆ្នាំ២០២២នេះ ប្រជាពលរដ្ឋបានស្នើ និងសំណូមពរអោយអាជ្ញាធរ ជួយជួសជុលកាំជណ្ដើរឡើងរួម ការសុំជួយទប់ស្កាត់ក្មេងទំនើង ទប់ស្កាត់ចោរគាស់ផ្ទះ និងការស្នើសុំជួយពន្លឿនការផ្តល់កម្មសិទ្ធិផ្ទះសម្បែងជាដើម។
វេទិកានេះ ធ្វើឡើងក្រោមវត្តមានលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកស្រី កែវ សុខពិសី អភិបាលរងរាជធានី តំណាងអោយលោក ឃួង ស្រេង អភិបាលរាជធានីភ្នំពេញ។ វេទិកានេះ ប្រជាពលរដ្ឋបានលើកឡើងជាសំណួរ និងសំណើរដោយផ្ទាល់មាត់ចំនួន៤នាក់ និងសំណើរជាលាយលក្ខណ៍អក្សរចំនួន៧បញ្ហា។
ហើយចំពោះសំណួរ និងសំណើរផ្ទាល់មាត់រួមមាន ៖ ប្រជាពលរដ្ឋរស់នៅភូមិ៥ សង្កាត់អូរឬស្សីទី៤ បានស្នើ និងសំណូមពរអោយអាជ្ញាធរ ជួយជួលជុលកាំជណ្តើរឡើងរួម ដោយជណ្តើរ នោះ ពុកផុយងាយនឹងគ្រោះថ្នាក់ដល់ប្រជាពលរដ្ឋរាប់សិបគ្រួសារ ។ ប្រជាពលរដ្ឋរស់នៅភូមិ១២ សង្កាត់វាលរង់ ស្នើសុំជួយទប់ស្កាត់ក្មេងទំនើង ទប់ស្កាត់ចោរគាស់ផ្ទះ និងការស្នើសុំជួយពន្លឿនការផ្តល់កម្មសិទ្ធិផ្ទះសម្បែងអោយបានលឿន ខណៈពេលដែលលោក ឃួង ស្រេង អភិបាលរាជធានីភ្នំពេញ បានយកចិត្តទុកដាក់ខ្លាំងលើបញ្ហានេះដែរនោះ។
ចំពោះការលើកឡើងជាសំណើរផ្ទាល់មាត់ទាំង៤នាក់ខាងលើនេះ ត្រូវបានលោក ថេង សុថុល អភិបាលខណ្ឌមករា បញ្ជាក់ថា ៖ ចំពោះការស្នើសុំជួលជុលកាំជណ្តើរឡើងរួម នៅភូមិ៥ សង្កាត់អូឬស្សីទី៤ លោកបានអោយមន្ត្រីជំនាញចុះសិក្សាហើយ នៅពេលដែលលោកបានផ្លាស់មកធ្វើជាអភិបាលខណ្ឌ៧មករា រយៈពេល៤ខែនេះ ។
លោកបន្តថា ការជួសជុលកាំជណ្តើរឡើងរួមនេះ មិនមែនចេះតែធ្វើនោះទេ ពោលគឺទាមទារការសិក្សាពីលក្ខណៈបច្ចេកទេសជាមុនសិន ទើបអាចជួសជុលបានចៀស វាងគ្រោះថ្នាក់ ។ ប៉ុន្តែទោះបីជាយ៉ាងណាក្តី ការងារនេះអាជ្ញាធរយើងបានយកចិត្តទុកដាក់ហើយ។ ចំពោះការស្នើសុំជួយទប់ស្កាត់ក្មេងទំនើង ទប់ស្កាត់ចោរគាស់ផ្ទះ ក្នុងនាមគណៈបញ្ជាការឯកភាពខណ្ឌ យើងបាននិងកំពុងប្រឹងប្រែង ដើម្បីភាពសុខសាន្តជូនប្រជាពលរដ្ឋ។ ដោយឡែកចំពោះការស្នើសុំជួយពន្លឿនការផ្តល់កម្មសិទ្ធិផ្ទះសម្បែងអោយបានលឿននោះ លោកក៏បានបញ្ជាក់ផងដែរថា ការងារនេះ លោក ឃួង ស្រេង អភិបាលរាជធានីភ្នំពេញ លោកបានយកចិត្តទុកដាក់ណាស់ ដោយបានបញ្ជាអោយលោក ឃ្លាំង ហួត អភិបាលរងរាជធានី ចុះមកអនុវត្តការងារនេះជាបន្តបន្ទាប់ ប៉ុន្តែដោយសារការងារច្រើនពេក ពាក់ព័ន្ធកិច្ចប្រជុំអាស៊ាន ទើបការងារនេះត្រូវបានលើកពេលជាបន្តបន្ទាប់។ តែទោះជាយ៉ាងណាក្តី ការងារនេះយើងនឹងពន្លឿនអោយបានលឿនទៅតាមការចង់បានរបស់ប្រជាពលរដ្ឋ។
ប្រធានក្រុមប្រឹក្សារាជធានីភ្នំពេញ លោកម៉ប់ សារិន បានមានប្រសាសន៍ថា វេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ ត្រូវបានធ្វើឡើងក្នុង១ឆ្នាំម្តង ដើម្បីដោះស្រាយរាល់កង្វល់ សំណូមពរ និងសំណើររបស់ប្រជាពលរដ្ឋ។ ប៉ុន្តែក្នុងរយៈពេល២ឆ្នាំជាប់ៗគ្នានេះ ត្រូវបានខកខានដោយសារការរាតត្បាតនៃជំងឺកូវីដ-១៩ យើងមិនបានជួបជុំគ្នាបែបនេះទេ។
វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនេះ គឺផ្តោតសំខាន់ពាក់ព័ន្ធនឹងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន ៖ បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍នៅមូលដ្ឋាន ដើម្បីឱ្យអាជ្ញាធរបានដឹងលឺ និងរកយន្តការដោះស្រាយជូន៕
ចែករំលែកព័តមាននេះ