ខេត្តកំពង់ធំ ៖ ឧបទ្ទវហេតុមួយបានកើតឡើងកាលពីព្រឹក ថ្ងៃទី២៨ ខែឧសភា ឆ្នាំ២០១៧ ស្ថិតនៅក្នុងចំការកៅស៊ូរបស់ក្រុមហ៊ុន C.R.C.K ចំណុចតំបន់ក្បាល់អូរស្វាយ ក្នុងភូមិវាលថ្នល់ ឃុំសាគ្រាម ស្រុកប្រសាទបល្ល័ង្ក ខេត្តកំពង់ធំ មានរថយន្តធុនធំមួយគ្រឿងធ្លាក់ចូលអូរ បណ្តាលរងរបួសធ្ងន់ស្រាល់ចំនួន១៤នាក់ ។
ពាក់ព័ន្ធនឹងករណីគ្រោះថ្នាក់ដែលបណ្តាលឲ្យមានមនុស្សរងរបួសធ្ងន់ស្រាលដល់ទៅ១៤នាក់ខាងលើនេះ បើយោងតាមការឲ្យដឹងពីសមត្ថកិច្ចនគរបាលប្រាប់ថា រថយន្តដែលបង្កគ្រោះថ្នាក់ចរាចណ៏ខាងលើ ម៉ាកហ៊ីយ៉ាន់ដាយ ពណ៌ស លាយផ្ទៃមាឃ ពាក់ស្លាកលេខ ភ្នំពេញ ៣B-១៩២៣ បើកបរដោយឈ្មោះ ជា សុវណ្ណារិទ្ធ ភេទប្រុស អាយុ២២ឆ្នាំ រស់នៅភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន បានដឹកក្រុមតន្ត្រីសម័យ ទៅលេងនៅចំណុចឃុំសាគ្រាម កាលពីយប់ ថ្ងៃទី២៧ ខែឧសភា ឆ្នាំ២០១៧ លុះព្រឹក ថ្ងៃទី២៨ ខែឆ្នាំដដែលនេះ ក៏ចេញដំណើរទៅសម្តែងតន្ត្រីនៅឯស្រុកស្ទោងបន្តរទៀត តែចៃដន្យអ្នកបើកបរខ្វះការប្រុងប្រយ័ត្នធ្វើឲ្យរថយន្តធ្លាក់ថ្នល់ បណ្តាលឲ្យរងរបួសធ្ងន់ស្រាលមនុស្ស១៤នាក់ ។ អ្នករងរបួសត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកស្ទោង ចំណែកអ្នករបួសធ្ងន់ធ្ងរមួយចំនួនទៀតត្រូវបញ្ជូនទៅទីក្រុងភ្នំពេញ ។
សមត្ថកិច្ចបញ្ជាក់ថា គ្រោះថ្នាក់ចរាចរណ៏បណ្តាលមកពីអ្នកបើកបរបើកខ្វះការប្រុងប្រយ័ត្ន បើកចុះទួលចំណោតខ្លាំងក៏បណ្តាលឲ្យរអិល និងរេចង្កូតធ្លាក់ថ្នល់ចូលទៅក្នុងអូរខាងលើតែម្តង ខណៈពេលនេះរថយន្តបង្កកំពុងត្រូវបានសមត្ថកិច្ចរករថយន្តស្ទូចយកទៅរក្សាទុកដើម្បីចាត់ការតាមផ្លូវច្បាប់ ។
ចែករំលែកព័តមាននេះ