បើករថយន្តរវល់តែឱនយកទូរស័ព្ទងាកមកវិញបុករះខ្ទេច
រាជធានីភ្នំពេញ ៖ បុរសម្នាក់បើកបររថយន្តក្នុងល្បឿនលឿនមិត្តភក្តិទូរស័ព្ទមករវល់តែឱនយកទូរស័ព្ទបានរេចង្កូតទៅបុកសំយ៉ាបផ្ទះ៣ល្វែង
រាជធានីភ្នំពេញ ៖ បុរសម្នាក់បើកបររថយន្តក្នុងល្បឿនលឿនមិត្តភក្តិទូរស័ព្ទមករវល់តែឱនយកទូរស័ព្ទបានរេចង្កូតទៅបុកសំយ៉ាបផ្ទះ៣ល្វែងបណ្តាលឲ្យខូចខាតកាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី២៤ ខែឧសភា ឆ្នាំ២០១៧ នៅតាមបណ្តោយផ្លូវ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។ អ្នកបើកបររថយន្តបង្កមានឈ្មោះ រស់ សុខឈីម ភេទប្រុស អាយុ៣២ឆ្នាំ មុខរបរជាងដែក ស្នាក់នៅផ្ទះលេខ៧៤ ផ្លូវA ក្នុងបុរីពីភពថ្មី ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ បើកបររថយន្ត២បាំងមួយគ្រឿង ពណ៌ស ពាក់ស្លាកលេខ ភ្នំពេញ2AI-1674 ។
តាមសម្តីអ្នកបើករថយន្តបង្កបានឲ្យដឹងថា មុនពេលកើតហេតុគាត់បើករថយន្តចេញពីម្តុំចោមចៅគោលបំណងទៅផ្ទះទៅម្តុំកើតហេតុខាងលើដោយបើកបរក្នុងទិសដៅពីលិចទៅកើតតាមបណ្តោយផ្លូវបេតុងបុរីពិភពថ្មីសាលាមុំ ខណៈមកដល់ចំណុចកើតហេតុមិត្តភក្តិគាត់បានទូរស័ព្ទមករួចគាត់រវល់តែក្រលេកមើលទូរស័ព្ទយកមកកាន់ ស្រាប់តែងាកមកវិញ រថយន្តបានរេចង្កូតឡើងការ៉ូឡាមុខផ្ទះវេរលុយ E-Money ប៉ះទ្វារខូតខាតតិចតូច ហើយរថយន្តមិនទាន់អស់ល្បឿនជ្រុលទៅបុកបង្គោលសំយ៉ាបផ្ទះចំនួន២ល្វែងទៀតសរុប៣ផ្ទះ និងបុកផើងផ្កាបែកខ្ទេចខ្ទីរួចជ្រុលទៅបុកការ៉ូឡាដែលគេទុកនៅមុខផ្ទះប៉ើងរាយប៉ាយពេញផ្លូវ ហើយរថយន្តជ្រុលទៅមុខជាង២០ម៉ែត្រទើបឈប់ ។ ចំណែករថយន្តរងការខូចខាតថ្ពាល់ខាងស្តាំ និងបែកកង់ ភ្លាមនោះអ្នកបើកបរមិនបានរត់ចេញពីកន្លែងកើតហេតុនោះទេ ។
ក្រោយកើតហេតុសមត្ថកិច្ចចរាចរណ៍ខណ្ឌបានចុះទៅដល់កន្លែងកើតហេតុដោយធ្វើឯកសារដំណើររឿងបង្កហេតុតែក្រោយមកម្ចាស់ផ្ទះ និងម្ចាស់រថយន្តបង្កបានឱ្យសមត្ថកិច្ចធ្វើកំណត់ហេតុកិច្ចសន្យាចេញថ្លៃជួសជុលខូចខាតដើម្បីបញ្ចប់រឿង ៕
ចែករំលែកព័តមាននេះ