ខេត្តសៀមរាប ៖ ម្ចាស់ផ្ទះទៅខេត្តព្រះវិហារទុកឱ្យកូនប្រុសអាយុ២៨ឆ្នាំនៅផ្ទះ ហើយបានដោតឌុយទូរទស្សន៍ទុកចោល បណ្តាលឱ្យផ្ទុះស្សេរខ្សែភ្លើងឆេះបង្កការភ្ញាក់ផ្អើលទាំងយប់ ដោយសំណាងល្អអ្នកជិតខាងជួយទាន់ មិនរាលដាលដល់ផ្ទះអ្នកដទៃ និងគ្មាននរណាម្នាក់រងរបួស ក្នុងហេតុការណ៍អគ្គិភ័យឆេះផ្ទះនោះដែរ។ ករណីនេះបានកើតឡើងនៅរាត្រីថ្ងៃទី២៥…
ខេត្តសៀមរាប ៖ ម្ចាស់ផ្ទះទៅខេត្តព្រះវិហារទុកឱ្យកូនប្រុសអាយុ២៨ឆ្នាំនៅផ្ទះ ហើយបានដោតឌុយទូរទស្សន៍ទុកចោល បណ្តាលឱ្យផ្ទុះស្សេរខ្សែភ្លើងឆេះបង្កការភ្ញាក់ផ្អើលទាំងយប់ ដោយសំណាងល្អអ្នកជិតខាងជួយទាន់ មិនរាលដាលដល់ផ្ទះអ្នកដទៃ និងគ្មាននរណាម្នាក់រងរបួស ក្នុងហេតុការណ៍អគ្គិភ័យឆេះផ្ទះនោះដែរ។
ករណីនេះបានកើតឡើងនៅរាត្រីថ្ងៃទី២៥ ខែវិច្ឆិកា ឆ្នាំ២០២២ វេលាម៉ោង ២០និង២០នាទី ស្ថិតនៅចំណុចភូមិថ្នល់ដាច់លិច ឃុំដានរុន ស្រុកសូទ្រនិគម ខេត្តសៀមរាប។
បើតាមប្រសាសន៍របស់លោកវរសេនីយ៍ឯក ឃឹម ផល្លា អធិការនគរបាលស្រុកសូទ្រនិគម បានប្រាប់នៅព្រឹកថ្ងៃទី២៦ ខែវិច្ឆិកា ឆ្នាំ២០២២នេះថា ករណីឆេះផ្ទះពលរដ្ឋនេះដែរម្ចាស់ផ្ទះ ឈ្មោះ ឡាំង ស៊ាំ ភេទប្រុស អាយុ៥៧ឆ្នាំ រស់នៅភូមិឃុំកើតហេតុខាងលើ តែគាត់មិនបានស្នាក់នៅផ្ទះទេ គឺទៅរស់នៅធ្វើការនៅឯខេត្តព្រះវិហារ ដោយទុកកូនម្នាក់ឈ្មោះ លាត សុភ័ណ្ឌ ភេទប្រុស អាយុ២៨ឆ្នាំ ឱ្យរស់នៅផ្ទះនេះម្នាក់ឯង។
លោកបានបញ្ជាក់ថា តាមការបំភ្លឺអ្នកជិតខាងបានរៀបរាប់ឱ្យយើងដឹងថា ផ្ទះនោះមុនពេលកើតហេតុឃើញបិទទ្វារមិនមានអ្នកនៅទេ ។ ក្រោយមកនៅម៉ោងកើតហេតុខាងលើស្រាប់តែលឺសម្លេងផ្ទុះសូរ«ផូង» បន្ទាប់មកធុំក្លិនឈ្ងៀមមួយសន្ទុះក្រោយមកក៏ស្រាប់តែឃើញអណ្តាតភ្លើងឆេះខ្លាំងឡើងៗតែម្តងទៅ។
លោកបានបញ្ជាក់ទៀតថា ក្រោយទទួលបានការរាយការណ៍កម្លាំងអធិការដ្ឋាននគរបាលស្រុកសហការជាមួយប៉ុស្ដិ៍នគរបាលរដ្ឋបាលដានរុន និងប្រជាការពារបានចេញទៅអន្តរាគមន៍ជួយពន្លត់អគ្គិភ័យភ្លាមទាន់ពេលវេលា ដោយ យើងបានប្រើប្រាស់រថយន្តពន្លត់អគ្គិភ័យនៃអធិការដ្ឋាននគរបាលស្រុកសូទ្រនិគមចំនួន០១គ្រឿង ផ្ទុកទឹកចំនួន៦០០០លីត្រ។យើងប្រើរយៈពេលចន្លោះ៣០ទៅ៤០នាទី ទាំងការធ្វើដំណើរ និងបាញ់ពន្លត់អគ្គិភ័យទើបរលត់ជាស្ថាពរនៅម៉ោង២១និងនិង០០នាទីយប់ ហើយមិនបានឆេះរាលដាលទៅកន្លែង ឬផ្ទះផ្សេងទេ ហើយក៏គ្មាននរណាម្នាក់គ្រោះថ្នាក់របួសមនុស្សដែរ។
ចំពោះការខូចខាតមានឆេះផ្ទះទំហំ៧ ម៉ែត្រ x ១២ម៉ែត្រ ជញ្ជាំងឈើ និងប្រក់ដំបូលសង្ក័សី អស់ខ្ទង់៧០% ស្រូវចំនួន០៦ការ៉ុងស្មើនឹង៤៨០ គីឡូក្រាម – អង្ករ០១ការ៉ុង ស្មើនឹង៥០គីឡូក្រាម ទូរដាក់ខោអាវឈើចំនួន០២ គ្រែដេកឈើចំនួន០១ ធុងបាស់ចំនួន១គូ សំលៀកបំពាក់ និងចានឆ្នាំងមួយចំនួន។
មូលហេតុនៃការឆេះនេះ គឺម្ចាស់មិននៅផ្ទះហើយការប្រើប្រាស់ភ្លើងអគ្គិសនីមានការធ្វេសប្រហែសទើបបណ្តាលឱ្យផ្ទុះព្រីភ្លើងដោតទូរទស្សន៍ ហើយរាលដាលតែម្តង៕
ចែករំលែកព័តមាននេះ