រាជធានីភ្នំពេញ ៖ សម្តេចតេជោ បានប្រាប់ដល់មន្ត្រីអោយទន្ទេញអោយចាំមាត់ថា មន្ត្រីជាអ្នកបម្រើរបស់ប្រជាជនមិនមែនជាចៅហ្វាយនាយឡើយ។សម្តេចមានប្រសាសន៍បែបនេះ គឺដើម្បីដាស់តឿនដល់មន្ត្រីទាំងអស់អោយយកចិត្តទុកដាក់បម្រើដល់ប្រជាជនអោយមានប្រសិទ្ធភាព។
ប៉ុន្តែទោះបីជាយ៉ាងណាក៏ដោយចុះ គេសង្កេតឃើញថា នៅតែមានអំពើពុករលួយក្នុងការផ្តល់សេវាសាធារណ:ជូនដល់ប្រជាជន។អំពើពុករលួយនោះ គឺធ្វើតាមអ្វីដែលគេហៅថា ឈ្មួញកណ្តាលរត់ការ។
ឈ្មួញកណ្តាល គឺជាមនុស្សមួយក្រុមដែលគេរត់ការធ្វើឯកសារ និងសេវាកម្មនានារបស់រដ្ឋឱ្យពលរដ្ឋ។ ជាទូទៅ គឺគេសង្កេតឃើញមានវត្តមានឈ្មួញកណ្តាលនៅតាមក្រសួង ស្ថាប័ន អង្គភាព ដែលត្រូវផ្តល់សេវាកម្មឯកសារ ដល់ពលរដ្ឋក្នុងជីវភាពប្រចាំថ្ងៃ ការធ្វើជំនួញ ឬមានតម្រូវការចាំបាញ់តាមភាពជាក់ស្តែងណាមួយ។
និយាយឱ្យចំវត្តមានឈ្មួញកណ្តាលច្រើនមាននៅកន្លែងណាដែលពលរដ្ឋត្រូវចំណាយថវិកា ដើម្បីទទួលសេវាសាធារណៈ។ឈ្មួញកណ្តាលជាអ្នករត់ការធ្វើលិខិស្នាម ឯកសារ លិខិត អនុញ្ញាតអ្វីមួយពីអាជ្ញាធរមានសមត្ថកិច្ច ដើម្បីពលរដ្ឋយកទៅប្រើប្រាស់ទាំងរស់នៅប្រចាំថ្ងៃ អាជីវកម្ម និងដើម្បីហេតុផលផ្សេងៗទៀត។
មានមូលហេតុជាច្រើនដែលគេមើលឃើញថា បណ្តាលឱ្យមានវត្តមានឈ្មួញកណ្តាលកើតមានឡើង។នៅក្នុងនោះទំនងជាមកពីស្ថាប័នសាធារណៈផង និងមកពីពលរដ្ឋខ្លួនឯងផង។ មកពីស្ថាប័នរដ្ឋដោយសារការផ្តល់សេវានោះហាក់ភាពស្មុគស្មាញ។ចំណែកកត្តាមកពីប្រជាពលរដ្ឋ ពលរដ្ឋខ្លះមានការរវល់ ពលរដ្ឋខ្លះខ្ជិលរង់ចាំ ពិបាកបំពេញបែបបទ ដូច្នេះក៏រត់ទៅរកឈ្មួញកណ្តាល ដើម្បីធ្វើកិច្ចទាំងនោះឱ្យ។
វត្តមានឈ្មួញកណ្តាលត្រូវបានគេមើលឃើញថា ធ្វើឲ្យពលរដ្ឋចំណាយថវិកាច្រើនទៅលើតម្លៃសេវាកម្មរបស់ស្ថាប័នសាធារណៈ ពីព្រោះឈ្មួញកណ្តាលត្រូវយកតម្លៃខ្ពស់ ដើម្បីទទួលបានផលចំណេញសម្រាប់ខ្លួន។មានការចោទប្រកាន់ថា ឈ្មួញកណ្តាលអាចមានកើតមានក៏ដោយសារជាការរកប្រាក់ចំណូលរបស់មន្ត្រីខិលខូចមួយចំនួន។
តម្លៃសេវាកម្មដែលបានឆ្លងកាត់ឈ្មួញកណ្តាល បានធ្វើអោយពលរដ្ឋចំណាយខុសគ្នាមួយដង ឬពីរពីតម្លៃ ដែលរដ្ឋបានកំណត់។ នៅពេលយកតម្លៃសេវាកម្មពីពលរដ្ឋឈ្មួញកណ្តាល តែងតែគិតទៅដល់ចំនុចបី។ទី១គេត្រូវយកតម្លៃសេវាពីពលរដ្ឋ ដើម្បីបង់ថវិកាទៅរដ្ឋ។ទី២គេត្រូវយកតម្លៃសម្រាប់កម្លាំងពលរដ្ឋខ្លួនឯង និងទី៣ គេត្រូវយកកម្រៃទុកសម្រាប់ទៅបង់ឱ្យមន្ត្រីដែលទទួលបន្ទុកផ្តល់សេវាកម្ម និងមន្ត្រីដែលបានបើកដៃឱ្យមានវត្តមុខរបរឈ្មួញកណ្តាលនេះ។
វត្តមានឈ្មួញកណ្តាលមិនត្រឹមធ្វើឲ្យពលរដ្ឋបានចំណាយថវិកាច្រើនទៅសេវាសាធារណ: របស់រដ្ឋប៉ុណ្ណោះទេ។ប៉ុន្តែឈ្មួញកណ្តាលបានធ្វើឲ្យពលរដ្ឋ និងមន្ត្រីឃ្លានឆ្ងាញ់ពីគ្នាដែលផ្ទុយពីពាក្យថា មន្ត្រីជាអ្នកបម្រើពលរដ្ឋនោះ។ ពលរដ្ឋមិនត្រឹមគិតថា មន្ត្រីមិនមែនអ្នកបម្រើពួកគាត់ទេ ចង់មិនចង់ពលរដ្ឋពិតជាបានស្តីបន្ទោសថា សេវារដ្ឋមានអំពើពុករលួយ ពីព្រោះគាត់បានចំណាយច្រើននៅពេលត្រូវការសេវាពីរដ្ឋ ហើយពលរដ្ឋគិតថា ដើម្បីបានជួបមន្ត្រីផ្ទាល់មិនមែនជាការងាយស្រួលឡើយ។
វិធានការ និងកំណែទម្រង់ជាច្រើនបានដាក់ឱ្យអនុវត្តជាច្រើនឆ្នាំមកហើយ ដើម្បីលុបបំបាត់ឈ្មួញកណ្តាល កែលម្អរសេវាសាធារណៈ និងធ្វើឲ្យមន្ត្រីបម្រើពលរដ្ឋពិតប្រាកដ រហូតដល់មានសេវាកម្មរដ្ឋបាលអេឡិចត្រូនិច ប៉ុន្តែគេនៅតែមើលឃើញថា មិនទាន់ឈប់បំបាត់អស់ ឈ្មួញកណ្តាល ឬអ្នករត់ការនោះទេ។វិធានការច្បាប់មាន ប៉ុន្តែដើម្បីឈប់បំបាត់ ឈ្មួញកណ្តាលនេះមសិកាជាការសំខាន់បំផុត។
ទន្ទឹមនឹងនោះ រដ្ឋអាចប្រើប្រាស់បច្ចេកវិទ្យា ដើម្បីផ្តល់សេវាដល់ប្រជាជន។នេះជាផ្នែកមួយ នៃអ្វីដែលរដ្ឋាភិបាលចង់ប្រែក្លាយខ្លួនជារដ្ឋាភិបាលអេឡិចត្រូនិក៕ដោយ សារ៉ាន់
ចែករំលែកព័តមាននេះ