ខេត្តកណ្តាល ៖ បើតាមប្រភពពីអ្នកដំណើរបានលួចបង្ហើបប្រាប់អោយដឹងថា នៅល្ងាចថ្ងៃទី២៤ ខែវិច្ឆិកា ឆ្នាំ២០២២នេះ មានថយន្តដឹកខ្សាច់ប្រភេទធុនធំចំនួន២គ្រឿងបានចូលទៅដឹកខ្សាច់នៅដេប៉ូឈ្មោះ ឌី ប៉ូលី ហើយបង្កអោយទឹក និងខ្សាច់ហូរពេញផ្លូវ និងធ្វើអោយពួកគាត់ពិបាកធ្វើដំណើរតាមក្រោយ ព្រោះតែខ្លាចរអិលបង្កគ្រោះថ្នាក់ណាស់។ ទីតាំងដេប៉ូឈ្មោះ ឌី ប៉ូលីនេះ គឺស្ថិតតាមបណ្តោយផ្លូវ២១ ក្នុងសង្កាត់ស្វាយរលំ ក្រុងតាខ្មៅ ខេត្តកណ្តាល ។
ប្រភពពីពលរដ្ឋបានបន្តទៀតថា រថយន្តដឹកខ្សាច់ទាំង២គ្រឿងនោះ អត់ស្លាកលេខមួយគ្រឿង មានស្លាកលេខមួយគ្រឿង ពណ៌ក្រហម ស្លាកលេខ មណ្ឌលគីរី 3A.0056 ដែលបើកបរលើផ្លូវធ្វើអាជីវកម្មបានយ៉ាងរលូនបែបនេះ។ ហើយការបើកបរវិញ គឺមិនគោរពច្បាប់ចរាចរណ៍ឡើយ គឺបើកលឿន ហើយស៊ីផ្លេរខ្លាំងៗ ថែមទាំងការដឹកខ្សាច់មិនគ្របត្រឹមត្រូវ គឺគ្របអោយតែរួចពីដៃ ធ្វើអោយទឹក និងខ្សាច់ហូរពេញផ្លូវតែម្តង។
ប្រភពដដែលបន្តទៀតថា ជាពិសេសរថយន្តនោះ បានធ្វើដំណើរលើផ្លូវ២១ កាត់តាមបន្ទាយអង្គរក្សរបស់សម្តេច ហ៊ុន សែន ឆ្ពោះទៅឆ្លងកាត់ផ្លូវក្រវ៉ាត់ក្រុង ធ្វើអោយខូចសោភណ្ឌភាពផ្លូវថែមទៀតផង។
ពួកគាត់បានសំណូមពរដល់ក្រសួងសាធារណការខេត្តកណ្តាល សមត្ថកិច្ចចរាចរណ៍ខេត្តកណ្តាល មេត្តាជួយពិនិត្យលើរថយន្តទាំង២គ្រឿងនោះផង ហេតុអ្វីរថយន្តគ្មានស្លាកលេខ គ្មានពន្ធត្រឹមត្រូវ អាចចរាចរណ៍លើផ្លូវបានយ៉ាងងា.យបែបនេះ?។ចុះបើរថយន្តនោះបង្កគ្រោះថ្នាកដល់អ្នកដំណើរ តើទៅរកម្ចាស់រថយន្តនឹងនៅឯណាទៅ?។ ពួកគាត់សង្ឃឹមថា លោក គង់ សោភណ្ឌ អភិបាលខេត្តកណ្តាល និងបញ្ជាអោយមន្ត្រីពាក់ព័ន្ធពិនិត្យពីបញ្ហានេះផង។
ចែករំលែកព័តមាននេះ