រាជធានីភ្នំពេញ ៖ សព្វថ្ងៃនេះ បឹងកេងកងទី១ គឺជាតំបន់ដែលប្រជាពលរដ្ឋមានជីវភាពខ្ពស់ និងជនបរទេសរស់នៅយ៉ាងច្រើនផងដែរ ដោយមានអគារខុនដូខ្ពស់ វីឡាធំៗ ភោជនីយដ្ឋាន ផ្សារទំនើប និងហាងកាហ្វេ សុទ្ធសឹង
រាជធានីភ្នំពេញ ៖ សព្វថ្ងៃនេះ បឹងកេងកងទី១ គឺជាតំបន់ដែលប្រជាពលរដ្ឋមានជីវភាពខ្ពស់ និងជនបរទេសរស់នៅយ៉ាងច្រើនផងដែរ ដោយមានអគារខុនដូខ្ពស់ វីឡាធំៗ ភោជនីយដ្ឋាន ផ្សារទំនើប និងហាងកាហ្វេ សុទ្ធសឹងតែមានឈ្មោះបោះសំឡេងកំពុងដំណើរការលក់ដូរយ៉ាងរលូន បើទោះជាមានតម្លៃខ្ពស់បន្តិចក្តី ។ ជាក់ស្តែង ហាងកាហ្វេមួយកន្លែង យីហោ Brown មានទីតាំងនៅតាមបណ្តោយផ្លូវលេខ៥៧ កែងផ្លូវលេខ២៩៤ ក្នុងសង្កាត់បឹងកេងកងទី១ ខណ្ឌចំការមន បានទាក់ទាញអតិថិជនជាច្រើននាក់ ។
លោក គឹម បញ្ញារ័ត្ន អាយុ២២ឆ្នាំ ជានិស្សិតឆ្នាំទី៤ នៃសាលាច្បាប់បឹងត្របែក និយាយថា ៖ « រាល់ពេលទំនេរពីការរៀនសូត្រ ខ្ញុំតែងតែមកអង្គុយញ៉ាំកាហ្វេ ជជែកលេងជាមួយមិត្តភក្តិនៅក្នុងហាង Brown នេះ ព្រោះវាមានលក្ខណៈពិសេសច្រើនធ្វើឱ្យខ្ញុំចូលចិត្ត ដូចជា បរិវេណខាងក្រៅមានសួនច្បារ និងដើមឈើជាម្លប់យ៉ាងត្រជាក់ ព្រមទាំងមានបរិយាកាសបរិសុទ្ធជាលក្ខណៈធម្មជាតិ ។ ចំណែកខាងក្នុងហាងវិញ មានម៉ាស៊ីនត្រជាក់រៀបចំឡើងយ៉ាងស្អាត និងមានផាសុកភាពផងដែរ ។ ម្យ៉ាងទៀត កាហ្វេក៏មានរសជាតិឈ្ងុយឆ្ងាញ់ និងផ្តល់ Wifi សម្រាប់អតិថិជនមកញ៉ាំកាហ្វេ លេងអីុនធើរណេតស្រាវជ្រាវមេរៀន និងធ្វើការងារសាលាផងដែរ » ។
និស្សិតរូបនេះបន្តថា ទន្ទឹមនឹងកាហ្វេរបស់ Brown មានរសជាតិឈ្ងុយឆ្ងាញ់ និងតម្លៃថ្លៃជាងកាហ្វេផ្សេងទៀត ដូចជា កាហ្វេ Amazon ក្តី ប៉ុន្តែតម្លៃនេះអាចទទួលយកបាន ហើយលោកនឹងញ៉ាំបន្តទៀត ។
លោក គល់ សុផាត នាយប៉ុស្តិ៍នគរបាលបឹងកេងកងទី១ បានឱ្យដឹងដែរថា ពាក់ព័ន្ធនឹងសណ្តាប់ធ្នាប់សាធារណៈនៅតាមបណ្តាភោជនីយដ្ឋាន ផ្សារទំនើប និងហាងកាហ្វេ កម្លាំងរបស់លោកតែងតែចុះទៅណែនាំឱ្យចតរថយន្ត និងម៉ូតូមានរបៀបរៀបរយ ដើម្បីចៀសវាងការកកស្ទះចរាចរណ៍ និងប៉ះពាល់ដល់សណ្តាប់ធ្នាប់សាធារណៈផងដែរ ។
ការណែនាំរបស់កម្លាំងលោកឃើញថា ហាង និងភោជនីយដ្ឋានមួយចំនួនបានគោរពតាមការណែនាំ ប៉ុន្តែមួយចំនួនទៀតមិនបានគោរពតាមឡើយ ដោយនៅតែបង្កការកកស្ទះចរាចរណ៍ និងប៉ះពាល់ដល់សណ្តាប់ធ្នាប់សាធារណៈដដែល ហើយកម្លាំងរបស់លោកនៅតែរៀបចំបន្តទៀត៕
ចែករំលែកព័តមាននេះ