ភ្នំពេញ៖ ក្នុងពិធីបើកព្រឹត្តិការណ៍ប្រកួត​កីឡាជាតិ លើកទី៣ និងកីឡាជនពិការ លើកទី១ នាព្រលប់​ថ្ងៃទី២១ ខែវិច្ឆិកា នៅពហុកីឡដ្ឋាន​ជាតិមរតកតេជោ សម្តេចតេជោ ហ៊ុន សែន បាន​ប្រកាសថា រដ្ឋមន្ត្រីការពារជាតិអាមេរិក និងរដ្ឋមន្ត្រីការពារជាតិ​ចិន នឹងជួបគ្នា នៅខេត្តសៀមរាប នៅក្រៅកិច្ចប្រជុំ​រដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ ដែលរដ្ឋមន្ត្រីមហាអំណាច​ទាំងពីរ បានអញ្ជើញ​មកចូលរួម​ប្រជុំនៅទឹកដីកម្ពុជា​ដែរ​។

​សម្តេចតេជោ នឹងមានវត្តមាន ក្នុងកិច្ចប្រជុំ​រដ្ឋមន្ត្រីការពារជាតិអាស៊ាន និងប្រទេសពាក់ព័ន្ធ នៅថ្ងៃទី២២វិច្ឆិកា​ស្អែកនេះ​ ហើយសម្តេចតេជោ សង្ឃឹមថា រដ្ឋមន្ត្រីការពារជាតិអាមេរិក និងចិន នឹងធ្វើកិច្ចការដ៏ល្អជាមួយគ្នា នៅលើទឹកដីកម្ពុជា ដើម្បីនាំមកនូវសុខសន្តិភាព និងស្ថិរភាព​នៅលើពិភពលោក។

សូម​រម្លឹក​ថា​ សម្ដេច​​ពិជ័យ​​សេនា ​ទៀ បាញ់ រដ្ឋមន្ត្រី​ការពារ​ជាតិ​​កម្ពុជា បាន​ប្រាប់​ទូរ​ស្សន៍ BTV ថា រដ្ឋមន្ត្រី​ការ​បរទេស​អា​មេ​រិ​ក លោក ឡ​យ អូ​ស្ទី​ន (Lloy J. Austin III) នឹង​ជួប​រដ្ឋមន្ត្រី​ការពារ​ជាតិចិន លោក វេ ហ្វេ​ង ​ហ្គេ (Wei Fenghe) នៅ​ខេត្តសៀមរាប​។​

ទោះបីជា​មិន​មានការ​បង្ហើប​អោយ​ដឹង​ថា តើ​រដ្ឋមន្ត្រី​ការពារ​ជាតិ​មហាអំណាច​ទាំង​ពីរ នឹង​និយាយ​គ្នា​ពី​រឿង​អ្វីខ្លះ​ក៏​ដោយ?​ ប៉ុន្តែ​គេ​រំពឹង​ថា បញ្ហា​ក្តៅ​ដូច​ជា​បញ្ហា​ភូមា បញ្ហា​សង្គ្រាម​អ៊ុយ​ក្រែ​ន បញ្ហា​គំរាមកំហែង អាវុធ​នុយ​ក្លេ​អែរ ដោយ​កូរ៉េ​ខាងជើង បញ្ហា​សមុទ្រ​ចិន​ខាងត្បូង និង​បញ្ហា​កោះ​តៃវ៉ាន់ ជាដើម អាច​នឹង​ត្រូវ​ពិភាក្សា​ដោយ​រដ្ឋមន្ត្រី​ការពារ​ជាតិ​នៃ​ប្រទេស​មហាអំណាច​ទាំង​ពីរ នៅទឹកដីកម្ពុជា ក្នុង​​ខេត្តសៀមរាប។

សម្ដេច​ពិជ័យ​សេនា ទៀ បាញ់ បានបន្ថែមថា​ នេះ​ជា​រឿង​ដ៏​កម្រ​ណាស់ ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​។ សម្តេច​សង្ឃឹមថា កិច្ចប្រជុំ​ចង្អៀតរដ្ឋមន្ត្រី​ការពារ​ជាតិ​អាស៊ាន និង​អាស៊ាន​បូក​ ​នឹង​ផ្តល់​ផលប្រយោជន៍​ដល់​កម្ពុជា តំបន់ និង​ពិភពលោក​។

កិច្ចប្រជុំ​រដ្ឋមន្ត្រីការពារជាតិអាស៊ាន និងកិច្ចប្រជុំ​ពាក់ព័ន្ធ​ នៅ​ខេត្តសៀមរាប ក្នុងសប្តាហ៍នេះ ក្រៅពីរដ្ឋមន្ត្រីការពារជាតិអាស៊ាន ៩ប្រទេស ( មីយ៉ាន់ម៉ា អវត្តមាន ) ក៏មានរដ្ឋមន្ត្រី​ការពារ​ជាតិប្រទេស​ជា​ដៃគូរបស់អាស៊ាន ចំនួន​ ៨​ប្រទេស មកចូលរួម​ផងដែរ​ រួម​មាន៖ សហរដ្ឋអាមេរិក ចិន ជប៉ុន អូស្ត្រាលី កូរ៉េ​ខាងត្បូង រុ​ស្ស៊ី ឥណ្ឌា និង​ញូ​វ​ហ្សឺ​លែ​ន៕