សហរដ្ឋអាមេរិក ៖ លេខាធិការពាណិជ្ជកម្មសហរដ្ឋអាមេរិក លោក Wilbur Ross បាននិយាយកាលពីថ្ងៃសៅរ៍ថា ការគំរាមកំហែង និងការសងសឹកផ្នែកពាណិជ្ជកម្មពីមន្ត្រីកាណាដា គឺមិនសមរម្យឡើយ ហើយមិនប៉ះពាល់ដល់ការសម្រេចចិត្តរបស់អាមេរិក ទៅលើការដាក់ពន្ធនាំចូលឈើពីកាណាដាឡើយ ។
លោក Ross បាននិយាយក្នុងសេចក្តីថ្លែងការណ៍មួយចេញផ្សាយដោយក្រសួងពាណិជ្ជកម្មសហរដ្ឋអាមេរិកថា ៖ « ពួកយើងបន្តជឿជាក់ថា ការដោះស្រាយដោយសន្តិវិធី គឺជាអ្វីដែលភាគីទាំងអស់ប្រាថ្នាចង់បាន ហើយពួកយើងបានរៀបចំធ្វើការដើម្បីសម្រេចដូច្នេះហើយ » ។
គួរបញ្ជាក់ថា កាលពីថ្ងៃសុក្រកន្លងមក នាយករដ្ឋមន្ត្រីកាណាដា លោក Justin Trudeau ថ្លែងថា រដ្ឋាភិបាលលោកនឹងសិក្សាថា តើអាចបញ្ឈប់ក្រុមហ៊ុនអាមេរិកក្នុងការនាំចេញធ្យូងពីកំពង់ផែខេត្ត British Columbia ដែរឬទេ ដើម្បីឆ្លើយតបនឹងការដាក់ពន្ធលើឈើកាណាដា ។
ប្រភពមួយឲ្យដឹងថា ប្រទេសកាណាដាកំពុងតែពិចារណាថា នឹងដាក់ពន្ធលើផលិតផលនាំចេញពីរដ្ឋ Oregon របស់សហរដ្ឋអាមេរិកដូចជា ស្រាក្រហម កម្រាលឥដ្ឋ និងក្តារបន្ទះកុងផ្លាកេជាដើម ហើយនិយាយថា នេះគឺមកពីសមាជិកព្រឹទ្ធសភារបស់សហរដ្ឋអាមេរិករដ្ឋនេះ គឺលោក Ron Wyden ដើរតួនាទីយ៉ាងសំខាន់ដើម្បីជំរុញឲ្យមានការដាក់ពន្ធលើឈើកាណាដា ។
ទំនាក់ទំនងរវាងសហរដ្ឋអាមេរិក និងដៃគូពាណិជ្ជកម្មធំជាងគេលេខ២របស់ខ្លួន គឺកាណាដាបានជួបប្រទះនឹងបញ្ហាតាំងពីក្រសួងពាណិជ្ជកម្មដាក់ពន្ធប្រឆាំងនឹងការផ្តល់ឧបត្ថម្ភធនជាមធ្យមប្រមាណ២០%លើឈើនាំចូលពីកាណាដា នាចុងខែមេសា កន្លងមក ។
ជម្លោះអស់រយៈពេលយូរមកនេះ ផ្តោតសំខាន់លើការចោទប្រកាន់ពីក្រុមហ៊ុនផលិតឈើរបស់សហរដ្ឋអាមេរិកថា ដៃគូប្រកួតប្រជែងរបស់ខ្លួននៅប្រទេសកាណាដា ទទួលអត្ថប្រយោជន៍ពីការផ្តល់ឧបត្ថម្ភធនពីរដ្ឋាភិបាល ព្រោះតែឈើកាណាដាភាគច្រើនបានដាំដុះលើដីសាធារណៈ ។
លោក Ross បាននិយាយក្នុងសេចក្តីថ្លែងការណ៍កាលពីថ្ងៃសៅរ៍ថា ការសម្រេចចិត្តរបស់ក្រសួងពាណិជ្ជកម្ម គឺយោងទៅតាមការពិត មិនមែនមកពីនយោបាយទេ ។
យ៉ាងណាក្តី ក្រសួងពាណិជ្ជកម្មនៅតែត្រូវការបញ្ចប់ការសិក្សារបស់ខ្លួន និងពន្ធដែលបានសម្រេចត្រូវមានការយល់ស្របពីគណៈកម្មាធិការពាណិជ្ជកម្មអន្តរជាតិរបស់សហរដ្ឋអាមេរិកជាមុនសិន ទើបអាចយកមកអនុម័តបាន៥ឆ្នាំ ។
លោក Ross បន្តថា ប្រសិនបើមន្ត្រីកាណាដាចង់បន្ថែមព័ត៌មានលើរឿងក្តីនេះ ក្រសួងរបស់លោកនឹងពិចារណាដោយប្រុងប្រយ័ត្ន និងមិនលម្អៀង ៕
ចែករំលែកព័តមាននេះ