ADផ្ទាំងផ្សព្វផ្សាយពាណិជ្ជកម្ម

Picture

ក្រសួងកសិកម្ម ភ្ញាក់ផ្អើល និង​ទោមនស្ស​យ៉ាង​ខ្លាំង ចំពោះអាមេរិក ដែល​ឃាត់ខ្លួន​ប្រធាន​នាយកដ្ឋាន​​សត្វព្រៃ និងជីវចម្រុះនៃរដ្ឋបាល​ព្រៃឈើកម្ពុជា

2 ខែ មុន
  • ភ្នំពេញ

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីថ្លែងការណ៍ ដោយប្រកាស​ការភ្ញាក់ផ្អើល និងក្តីទោមនស្សយ៉ាងខ្លាំង ចំពោះ​សហរដ្ឋអាមេរិក ដែលបានឃាត់ខ្លួន លោក…

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីថ្លែងការណ៍ ដោយប្រកាស​ការភ្ញាក់ផ្អើល និងក្តីទោមនស្សយ៉ាងខ្លាំង ចំពោះ​សហរដ្ឋអាមេរិក ដែលបានឃាត់ខ្លួន លោក គ្រី ម៉ះផល ប្រធាននាយកដ្ឋាន​សត្វព្រៃ និងជីវចម្រុះ នៃរដ្ឋបាលព្រៃឈើ។ លោក គ្រី ម៉ះផល ប្រធាននាយកដ្ឋាន​សត្វព្រៃ និងជីវចម្រុះ នៃរដ្ឋបាលព្រៃឈើ ត្រូវបាន​ឃាត់ខ្លួននៅអាកាសយាន​ដ្ឋាន​អន្តរជាតិ ចន អេហ្វ កេណ្ណេឌី ក្នុងរដ្ឋញូវយ៉ក សហរដ្ឋអាមេរិក អំឡុងពេល​លោក កំពុងរង់ចាំ​បន្តដំណើរទៅចូលរួមកិច្ចប្រជុំ​អនុសញ្ញាការពារសត្វ​ និងរុក្ខជាតិជិតផុតពូជ CITES ( សាយកេស ) នៅប្រទេសប៉ាណាម៉ា​។

ក្រសួងកសិកម្ម ប្រកាសថា លោក គ្រី ម៉ះផល និងប្រធានរដ្ឋបាល​ព្រៃឈើកម្ពុជា ត្រូវបាន​ចោទប្រកាន់ពីបទសមគំនិត​ក្នុងការរត់ពន្ធ​សត្វស្វាក្តាម ទៅសហរដ្ឋអាមេរិក។ ក៏ប៉ុន្តែ​ក្រសួង​កសិកម្ម លើកឡើងថា ការចោទប្រកាន់របស់អាមេរិកនេះ ជារឿងដ៏គួរឱ្យហួសចិត្តជាទីបំផុត ព្រោះនៅកម្ពុជា សត្វស្វាក្តាម ជាប្រភេទសត្វសម្បូរ និងមានវត្តមាននៅទូទាំងប្រទេស​ ទាំងក្នុងព្រៃធម្មជាតិ ទាំងក្នុងតំបន់ជាយក្រុង និង​ទីក្រុង ដូចជា នៅរមណីយដ្ឋាន​វត្តភ្នំ ក្នុងរាជធានីភ្នំពេញ ជាដើម។

ក្រសួងកសិកម្ម បញ្ជាក់ថា សត្វស្វាក្តាម ត្រូវបានចិញ្ចឹម​នៅកម្ពុជា តាំងពីឆ្នាំ២០០៥ មកម្លេះ ហើយត្រូវបាននាំចេញ សម្រាប់គោលដៅវេជ្ជសាស្ត្រ ជាពិសេស​សម្រាប់​ដំណាក់​កាលធ្វើ​ពិសោធន៍ ដើម្បីផលិត​ឱសថ វ៉ាក់សាំង ឬគ្រឿងសំអាង។ សត្វស្វាក្តាមទាំងនេះ មិនមែន​ត្រូវបាន​ចាប់ពីព្រៃ ហើយបញ្ជូន​ចេញទៅក្រៅប្រទេស​នោះទេ​។ ចំណែកកសិដ្ឋាន​ ដែលចិញ្ចឹម​សត្វស្វាក្តាម​ទាំងនេះទៀតសោត ទម្រាំទទួលបាន​ការទទួលស្គាល់តាមផ្លូវច្បាប់ គឺសុទ្ធតែ​តម្រូវ​ឱ្យ​គោរពតាម​បទដ្ឋាន​អនាម័យ និងវិធីសាស្ត្រចិញ្ចឹមត្រឹមត្រូវ ដើម្បីរក្សាឱ្យ​បាននូវហ្សេនេទិករបស់វា មិនឱ្យផុតពូជនោះឡើយ។

ក្រសួងកសិកម្ម ក៏បានលើកឡើងថា សមត្ថកិច្ចគ្រប់គ្រង​សាយកេសកម្ពុជា បានអនុញ្ញាត​ឱ្យនាំចេញសត្វស្វាក្តាម ដោយផ្អែកលើច្បាប់ និងបទប្បញ្ញត្តិជាតិ និងអន្តរជាតិ។ ចំពោះការនាំចូលទៅសហរដ្ឋអាមេរិក ក្រុមហ៊ុន ដែលប្រកបអាជីវកម្ម នាំចេញសត្វស្វាក្តាមនេះ ត្រូវអនុវត្តទៅតាមនីតិវិធីរបស់សហរដ្ឋអាមេរិក​។

ក្រសួងកសិកម្ម ក៏បានកត់សម្គាល់ថា ការឃាត់ខ្លួន​មន្ត្រីកម្ពុជា ក្នុងពេលកំពុងធ្វើដំណើរទៅចូលរួម​កិច្ចប្រជុំ​ផ្លូវការ ដើម្បីការពារសត្វ និងរុក្ខជាតិជិតផុតពូជ នៅឯវេទិកាអង្គការសហប្រជាជាតិនេះ គឺធ្វើឡើង ខណៈពេលដែល​ប្រទេសទាំងពីរ កម្ពុជា និងសហរដ្ឋ​អាមេរិក កំពុងមាន​ទំនាក់ទំនង​សហប្រតិបត្តិការយ៉ាងជិតស្និទ្ធ។ ករណីនេះ  ក្រសួងកសិកម្ម រុក្ខាប្រមាញ់ និងនេសាទ និងរាជរដ្ឋាភិបាលកម្ពុជា នឹងខិតខំប្រឹងប្រែងឱ្យអស់ពីលទ្ធភាព ដើម្បីស្វែងរកយុត្តិធម៌​ជូនមន្ត្រីរបស់ខ្លួន ជាពិសេស​អ្នកដែលបំពេញកាតព្វកិច្ចផ្លូវការតំណាងប្រទេស ស្របតាម​អនុញ្ញាអន្តរជាតិ៕

Picture
Picture
Picture
Picture
Picture
Picture
SEA Game 2023

ព្រឹត្តិការណ៍ស៊ីហ្គេម លើកទី៣២

SEA Game 2023