តើទឹកលូផ្តល់ផលប៉ះពាល់អ្វីខ្លះចំពោះសុខភាពស្បែក ? នៅក្នុងទឹកលូ ឬទឹកស្អុយតែងតែមានផ្ទុកពពួកវីរុស និងមេរោគផ្សិតជាច្រើនប្រភេទ កាលណាបើស្បែកបានប៉ះពាល់ជាមួយនឹងទឹកទាំងនោះអាចនឹងបង្កឲ្យបញ្ហាចំពោះស្បែកនាំឲ្យមានការរមាស់ ។ ពិសេសនៅរដូវធ្លាក់ភ្លៀង លូតែងតែមានការកកស្ទះ ដោយសារតែហូរមិនទាន់ ដូច្នេះលោកអ្នកដែលជាអ្នកធ្វើដំណើរគេចមិនផុតពីការលុយទឹកលូទាំងនោះ ។
លោកស្រីវេជ្ជណ្ឌិតសុង និមល ឯកទេសសើរស្បែក កាមរោគ និងជានាយផ្នែកជំងឺសើស្បែកនៃមន្ទីរពេទ្យមិត្តភាពខ្មែរ-សូវៀតប្រាប់កោះសន្តិភាពឲ្យដឹងថា យើងមិនអាចដឹងថា នៅក្នុងទឹកលូមានពពួកមេរោគអ្វីខ្លះនោះទេ មានតែការពិសោធប៉ុណ្ណោះទើបអាចដឹងច្បាស់ ប៉ុន្តែជាទូទៅទឹកលូដែលខ្មៅស្អុយច្រើនតែមានផ្ទុកពូកវីរុសនិងមេរោគផ្សិត ។ បើសិនជាលោកអ្នកប៉ះពាល់ជាមួយនឹងទឹកប្រភេទនោះ ហើយមិនបានលាងសម្អាត ភ្លាមៗ ចេះតែបណ្តោយទុកម្តងជាពីរដងនោះអាចនឹងធ្វើឲ្យជួបនឹងបញ្ហាស្បែកដោយសារមេរោគទាំងនោះ ដែលអាចធ្វើឲ្យកើតមានជំងឺត្រអក និងអាចឆ្លងពពួកមេរោគផ្សិតដែលយើងច្រើនតែហៅថាទឹកស៊ីដៃជើង ។
ជំងឺទាំងនេះផ្តល់ផល់ប៉ះពាល់ចំពោះស្បែកដូចជា៖
១-ជំងឺត្រអក៖ អាចបណ្តាលឲ្យស្បែកឡើងកន្ទួល រមាស់ខ្លាំងពិបាកទ្រាំ ស្បែកឡើងក្រហម និងមានពងទឹក ។
២-ជំងឺទឹកស៊ីដៃជើង៖ អាចធ្វើឲ្យរមាស់ វាមានលក្ខណៈរុំារ៉ៃ វាអាចស៊ីនៅក្នុងក្រចក បន្តិចម្តងៗ និងធ្វើឱ្យហើម ហើយបង្កទៅជាខ្ទុះ ។
លោកស្រីវេជ្ជបណ្ឌិតប្រាប់ឲ្យដឹងអំពីវិធីទប់ស្កាត់ថា ដើម្បីការពារ និងចៀសវាងពីផលវិបាកដែលបណ្តាលមកពីទឹកលូនេះ លោកអ្នកគួរតែមានស្បែកជើងកវែងសម្រាប់ចុះលុយទឹកដើម្បីការពារពួកមេរោគទាំងនោះ ។ បន្ទាប់ពីប៉ះពាល់ជាមួយនឹងទឹកទាំងនោះហើយ ទោះបីជាពាក់ស្បែកជើងកវែងក្តី ឬក៏លុយទឹកដោយមិនពាក់ស្បែកជើងក្តី ត្រូវតែលាងសម្អាតជើងដៃខ្លួនប្រាណឲ្យបានគ្រប់កន្លែង ពិសេសនៅតាមចន្លោះម្រាមដៃម្រាមជើងជាមួយនឹងសាប៊ូឲ្យបានស្អាតជានិច្ច ។ បើសិនជាមានករណីរមាស់ឬក៏សញ្ញានៃជំងឺត្រអក និងទឹកស៊ីដៃជើងនោះ គួរតែទៅជួបពិភាក្សាជាមួយគ្រូពេទ្យដែលមានជំនាញច្បាស់លាស់ចៀសវាងជួបជាមួយគ្រូពេទ្យគ្មានជំនាញនាំឲ្យមានការយល់ច្រឡំខុស នោះការព្យាបាលអាចមានការអូសបន្លាយដែលនាំឲ្យជំងឺមានលក្ខណៈរ៉ាំរ៉ៃ ៕
ចែករំលែកព័តមាននេះ