អណ្ដាតភ្លើងលេបត្របាក់ផ្ទះ៣ខ្នងយ៉ាងសន្ធោសន្ធៅខ្ទេចអស់ទាំងស្រុង(វីដេអូ)
- កំពង់ឆ្នាំង
ផ្ទះចំនួន៣ខ្នងត្រូវបានអគ្គិភ័យឆាបឆេះយ៉ាងសន្ធោសន្ធៅខ្ទេចអស់ទាំងស្រុង បង្កឱ្យមានការភ្ញាក់ផ្អើល
ផ្ទះចំនួន៣ខ្នងត្រូវបានអគ្គិភ័យឆាបឆេះយ៉ាងសន្ធោសន្ធៅខ្ទេចអស់ទាំងស្រុង បង្កឱ្យមានការភ្ញាក់ផ្អើល
ខេត្តកំពង់ឆ្នាំង ៖ ផ្ទះចំនួន៣ខ្នងនៅលើផ្ទៃទឹកត្រូវបានអគ្គិភ័យឆាបឆេះយ៉ាងសន្ធោសន្ធៅខ្ទេចអស់ទាំងស្រុង បង្កឱ្យមានការភ្ញាក់ផ្អើលកាលពីវេលាម៉ោង១០និង២០នាទីព្រឹក ថ្ងៃទី១៤ ខែវិច្ឆិកា ឆ្នាំ ២០២២ ស្ថិតនៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌។
លោក សាំង គឹមស៊ន មេឃុំឆ្នុកទ្រូ បានឲ្យដឹងថា ម្ចាស់ផ្ទះខាងលើមានឈ្មោះ ប៊ុន ណារិទ្ធ ហៅហុង អាយុ៥០ឆ្នាំ ចំណែកម្ចាស់ផ្ទះទី២ មានឈ្មោះ សាង ដោយឡែកម្ចាស់ផ្ទះទី៣ ពុំទាន់ដឹងឈ្មោះនៅឡើយទេ។
លោកមេឃុំឆ្នុកទ្រូ បានឲ្យដឹងបន្តថា ផ្ទះទាំង៣ខ្នងនោះ គឺជាផ្ទះរបស់ប្រជាពលរដ្ឋដែលរស់នៅក្នុងទឹក ហើយឡើងមកនៅលើគោក សង់ជាប់ៗគ្នាដែលមានទំហំ១៣ម៉ែត្រគុណនិង២០ម៉ែត្រស្មើៗគ្នា ប៉ុន្តែផ្ទះទាំងនោះជាផ្ទះលិចទឹកនៅរដូវវស្សា។ ហើយក្នុងចំណោមផ្ទះទាំង៣ខ្នងនេះ គឺមានផ្ទះ២ខ្នងត្រូវបានអគ្គិភ័យឆេះខ្ទេចទាំងស្រុង និងផ្ទះ១ខ្នងទៀតឆេះអស់ប្រមាណ៥០%។
ប្រភពដដែលបន្តថា ពាក់ព័ន្ធនឹងអគ្គិភ័យខាងលើនេះ សមត្ថកិច្ចពន្លត់អគ្គិភ័យមិនអាចទៅជួយអន្តរាគមន៍បាញ់ទឹកពន្លត់បានទេ ដោយសារតែផ្ទះទាំងអស់នោះជាផ្ទះលិចទឹក ជាហេតុមិនអាចរថយន្តពន្លត់អគ្គិភ័យចូលទៅដល់បាន។ ហើយនៅពេលកើតហេតុ ប្រជាពលរដ្ឋដែលនៅជិតខាងបាននាំគ្នាយកម៉ាស៊ីនបូមទឹកប្រមាណ២០គ្រឿងទៅជួយអន្តរាគមន៍បាញ់ពន្លត់ដែរ ដើម្បីកុំឲ្យឆេះឆ្លងរាលដាលទៅផ្ទះផ្សេងទៀត។
ប្រភពដដែលបានបន្តទៀតថា ចំពោះមូលហេតុនៃអគ្គិភ័យខាងលើនេះ គឺបណ្ដាលមកពីផ្ទុះកំប៉ុងហ្គាស់ ដែលម្ចាស់ផ្ទះខាងលើជាអ្នកលក់ហ្គាស សាំង និងគ្រឿងទេសជាដើម៕
ចែករំលែកព័តមាននេះ