ប្រធានាធិបតីសហរដ្ឋអាមេរិកលោក ចូ បៃឌិន បានធ្វើដំណើរដោយរថយន្ត The Beast មកកាន់អូតែលសុខា ដើម្បីចូលរួមក្នុងកិច្ចប្រជុំកំពូលអាស៊ានលើកទី៤០និង៤១ ដែលកម្ពុជាយើងធ្វើជាម្ចាស់ផ្ទះ។ តើលោកអ្នកចង់ដឹងទេថា…
ប្រធានាធិបតីសហរដ្ឋអាមេរិកលោក ចូ បៃឌិន បានធ្វើដំណើរដោយរថយន្ត The Beast មកកាន់អូតែលសុខា ដើម្បីចូលរួមក្នុងកិច្ចប្រជុំកំពូលអាស៊ានលើកទី៤០និង៤១ ដែលកម្ពុជាយើងធ្វើជាម្ចាស់ផ្ទះ។ តើលោកអ្នកចង់ដឹងទេថា រថយន្ត The Beast របស់ប្រធានាធិបតីអាមេរិកមានលក្ខណៈពិសេសអ្វីខ្លះទើបត្រូវបញ្ជូនមកកាន់ប្រទេសកម្ពុជាសម្រាប់ដឹកលោក ចូ បៃឌិន ដើម្បីចូលរួមក្នុងកិច្ចប្រជុំកំពូលអាស៊ាន ។
The Beast គឺជារថពាសដែកល្បីឈ្មោះដែលត្រូវបានប្រើជាមធ្យោបាយសម្រាប់ប្រធានាធិបតីសហរដ្ឋអាមេរិកយូរឆ្នាំមកហើយ។មកទល់នឹងពេលនេះ The Beast ចេញបានពីរជំនាន់ហើយដោយហៅថា The Beast 2.0។
ជំនាន់ចុងក្រោយនេះបានប្ដូររូបរាងថ្មី និងបន្ថែមសមត្ថភាពការពារខ្លាំងក្លាជាងមុន។ចំពោះតម្លៃចំណាយលើការស្រាវជ្រាវ និងអភិវឌ្ឍរថយន្ត The Beast 2.0 បានស្ថិតក្នុងការអភិវឌ្ឍអស់រាប់ឆ្នាំមកហើយ ហើយការចំណាយរាប់លានដុល្លារទៅលើការស្រាវជ្រាវ និងអភិវឌ្ឍទើបធ្វើឲ្យគេអាចផលិតបានរថយន្តដែលរឹងមាំដូចជា រថក្រោះដោយទ្វាររថយន្តមានកម្រាស់ដល់២០ស.ម, កញ្ចក់ដែលអាចបញ្ឈប់គ្រាប់កាំភ្លើង A.44 Magmum, តួខ្លួនពាសដែកកម្រាស់១២,៧ ស.ម និងបាតរថយន្តពាសដែក ដែលអាចការពារប្រធានាធិបតីពីគ្រាប់បែកដៃ និងឮគ្រាប់បែកដែលបោះចូលក្រោមរថយន្តបាន។
មិនតែប៉ុណ្ណោះធុងផ្ទុកប្រេងឥន្ធនៈក៏ពាសដែកដែរ ដោយវាមានផ្ទុកនូវសារធាតុហ្វូមពិសេស ប្រសិនបើធ្លុះធ្លាយកន្លែងណាហ្វូមនឹងទៅផ្ចិតរន្ធនោះភ្លាម។ ដោយសារភាពខ្លាំងទាំងប៉ុន្មានខាងលើហើយទើបធ្វើឲ្យរថយន្តនីមួយៗរបស់ប្រធានាធិបតីត្រូវចំណាយ១,៥លានដុល្លារ ដើម្បីផលិតឡើង។ តម្លៃថ្លៃហើយ សូម្បីតែប្រេងឥន្ធនៈក៏ស៊ីច្រើនដែរដោយ១០០ គីឡូម៉ែត្រចំណាយប្រេងឥន្ធនៈអស់៥៨,៨លីត្រឯណោះ។
ចំពោះល្បឿនរថយន្តដឹកប្រធានាធិបតីដើម្បីបង្កើនសន្ទុះដល់១០០គ.ម/ម៉បានត្រូវប្រើពេល១៥វិនាទីឯណោះ។ត្បិតថា រថយន្តអាចបង្កើនសន្ទុះយឺត ប៉ុន្តែអ្នកបើកបរដែលជាភ្នាក់ងារសម្ងាត់ គឺទទួលបានការហ្វឹកហាត់ដ៏ពិសេសដែលអាចធ្វើឲ្យរថយន្តដ៏ធ្ងន់នេះបើកដូចជា រថយន្ត Ferrari យ៉ាងអ៊ីចឹងដែរ។វគ្គបើកបរពិសេសដែលតៃកុងបានឆ្លងកាត់នឹងធានាថាគេអាចបញ្ជារថយន្តចេញពីស្ថានភាពគ្រោះថ្នាក់បានគ្រប់ពេល។
ចំណែកនៅក្នុងក្បួនដង្ហែនីមួយៗអ្នកអាចនឹងឃើញថា មានរថយន្តម៉ូដែលប្រភេទនេះប្រហែល ២-៣គ្រឿង ដោយគេប្រើវាសម្រាប់ដឹកបុគ្គលសំខាន់ៗ ហើយអ្វីដែលសំខាន់ប្រើជានុយ។ ព្រោះពេលដែលរថយន្តដូចគ្នាបង្ហាញខ្លួនក្នុងពេលតែមួយនោះឃាត.កមិនអាចកំណត់បានទេថា រថយន្តមួយណាដែលដឹកប្រធានាធិបតីនោះទេ។
ជាទូទៅពេលដែលប្រធានាធិបតីអាមេរិកទៅកាន់ប្រទេសណាមួយគេតែងប្រើយន្តហោះចម្បាំងរបស់កងទ័ពអាមេរិក ដើម្បីដឹករថយន្ត The Beast ឲ្យទៅដល់គោលដៅមុន ដើម្បីត្រៀមសម្រាប់ការមកដល់របស់ប្រធានាធិបតីអាមេរិក។ចំពោះក្បួនដង្ហែប្រធានាធិបតីអាមេរិក តែងតែមានការចូលរួមពីរថយន្តយ៉ាងតិចបំផុត១០គ្រឿង ដើម្បីធានាឲ្យបានសុវត្ថិភាពខ្ពស់។ ប៉ុន្តែប្រសិនបើស្ថិតនៅតំបន់ដែលគេយល់ថា មានគ្រោះថ្នាក់ខ្ពស់ នោះក្បួនដង្ហែកាន់តែធំ ដោយអាចមានការចូលរួមពីរថយន្ត៤០គ្រឿង បូករួមនឹងម៉ូតូជាច្រើនគ្រឿងទៀត ។
ក្រៅពីអង្កេតមើលមនុស្សស្ថានភាពនៅជុំវិញដោយមិនងាយនឹងប៉ប្រិចភ្នែកហើយ ភ្នាក់ងារពិសេសទាំងអស់ ថែមទាំងស្ដាប់រលកសញ្ញា ដែលអាចផ្ដល់ជាការគំរាមកំហែងដល់ប្រធានាធិបតីទៀតផង។ចំពោះមុខងារពិសេសៗ និងទំនើបរបស់ The Beast រួមមាន កាមេរ៉ាសម្រាប់មើលពេលយប់, គ្រាប់បែកទឹកភ្នែក, ឧបករណ៍ពន្លត់ អគ្គីភ័យ និងអាចទប់ទល់នឹងការវាយលុកដោយសារធាតុគីមីជាដើម ៕
ចែករំលែកព័តមាននេះ