ទីក្រុងសេអ៊ូល ៖ របាយការណ៍ស្ថិតិបង្ហាញថា វិស័យទេសចរណ៍របស់កូរ៉េខាងត្បូងត្រូវបានប៉ះពាល់ដោយការធ្វើពហិការរបស់ចិន ព្រោះតែការដាក់ប្រព័ន្ធការពារមីស៊ីល THAAD របស់សហរដ្ឋអាមេរិកក្នុងប្រទេសនេះ
ទីក្រុងសេអ៊ូល ៖ របាយការណ៍ស្ថិតិបង្ហាញថា វិស័យទេសចរណ៍របស់កូរ៉េខាងត្បូងត្រូវបានប៉ះពាល់ដោយការធ្វើពហិការរបស់ចិន ព្រោះតែការដាក់ប្រព័ន្ធការពារមីស៊ីល THAAD របស់សហរដ្ឋអាមេរិកក្នុងប្រទេសនេះ ដោយចំនួនភ្ញៀវទេសចរជាច្រើនពីប្រទេសចិនធ្លាក់ចុះ៤០% ក្នុងខែមីនា កន្លងមក ។
ប្រទេសចិនបានហាមឃាត់ដំណើរកម្សាន្តជាក្រុមទៅកាន់កូរ៉េខាងត្បូង ចាប់តាំងពីថ្ងៃទី១៥ មីនា មកម្ល៉េះ ព្រោះតែប្រព័ន្ធ THAAD របស់សហរដ្ឋអាមេរិកក្នុងប្រទេសនេះ ។
សហរដ្ឋអាមេរិក និងកូរ៉េខាងត្បូងនិយាយថា ពួកគេធ្វើបែបនេះដើម្បីការពារខ្លួនប៉ុណ្ណោះ ប៉ុន្តែប្រទេសចិនភ័យខ្លាចថា វាអាចនឹងប៉ះពាល់ដល់សន្តិសុខរបស់ខ្លួន និងឆ្លើយតបដោយកំហឹងជាមួយការចេញវិធានការសងសឹកជាច្រើន ។
ជាធម្មតា ច្រើនជាងពាក់កណ្តាលនៃចំនួនភ្ញៀវទេសចររបស់កូរ៉េខាងត្បូង គឺមកពីប្រទេសចិន ប៉ុន្តែមានមនុស្សប្រមាណ៣៦ម៉ឺននាក់ប៉ុណ្ណោះដែលបានទៅកាន់ប្រទេសនេះកាលពីខែមុន ខណៈខែដដែលឆ្នាំមុនមានដល់ទៅ៦០ម៉ឺននាក់ឯណោះ ។
អង្គការទេសចរណ៍កូរ៉េ (KTO) និយាយថា ចំនួនភ្ញៀវទេសចរសរុបបានធ្លាក់ចុះ១១,២% បើធៀបនឹងឆ្នាំមុន មកស្មើត្រឹម១,២៣លាននាក់ ។
អ្នកនាំពាក្យម្នាក់របស់ក្រុមហ៊ុន Lotte និយាយថា ការអន់ថយនៃដំណើរកម្សាន្តមកកាន់កូរ៉េខាងត្បូងរបស់ជនជាតិចិននេះ ក៏បានប៉ះពាល់យ៉ាងខ្លាំងដល់ហាងទំនិញមិនគិតពន្ធនៅកូរ៉េខាងត្បូងផងដែរ ដែលជាធម្មតា អតិថិជនចិនត្រូវបានរាប់បញ្ចូល៧០%នៃការលក់សរុបរបស់ហាងទាំងនោះ ។
ហាងទំនិញមិនគិតពន្ធរបស់ Lotte មើលឃើញការលក់របស់ពួកគេទៅកាន់អតិថិជនចិនធ្លាក់ចុះ៤០% បើធៀបនឹងឆ្នាំមុន ។
ក្រុមហ៊ុនមួយនេះក៏បានបិទហាងចំនួន៨៥ ក្នុងចំណោមហាង៩៩របស់ខ្លួននៅចិនផងដែរ ព្រោះតែមានការធ្វើពហិការ បន្ទាប់ពីក្រុមហ៊ុននេះយល់ស្របថា ផ្តល់ទីលានវាយកូនហ្គោលនៅកូរ៉េខាងត្បូង ធ្វើជាកន្លែងដាក់ប្រព័ន្ធ THAAD ។
ជាលទ្ធផល វាបង្កឲ្យមានការខាតបង់ជាច្រើន និងត្រូវបានព្យាករថា ការខាតបង់នឹងកើនដល់១ប៊ីលានដុល្លារក្នុងឆមាសទី១ឆ្នាំនេះ ។
កូរ៉េខាងត្បូងបានជួបប្រទះនឹងបញ្ហាបាត់បង់ភ្ញៀវទេសចរចិន និងព្យាយាមចេញយុទ្ធនាការផ្សព្វផ្សាយដើម្បីទាក់ទាញភ្ញៀវទេសចរបន្ថែមពីប្រទេសដទៃ ជាពិសេសជប៉ុន និងប្រទេសក្នុងអាស៊ីអាគ្នេយ៍ ៕
ចែករំលែកព័តមាននេះ