ប្រទេសថៃ ៖ ការនាំចេញកើនឡើងកាលពីខែមុន បានបង្កើនតម្លៃនាំចេញនៅត្រីមាសទី១ ចំនួន៤,៩% ស្មើនឹង៥៦,៤៦ប៊ីលានដុល្លារ ។ វាជាដំណើរការល្អបំផុតក្នុងរយៈពេល៤ឆ្នាំមកនេះ ដោយសារទំហំពាណិជ្ជកម្មជាមួយចិន និងឥណ្ឌា មានកម្រិតខ្ពស់ក្នុងរយៈពេលជាច្រើនឆ្នាំ ។
តាមតួលេខពីក្រសួងពាណិជ្ជកម្មបង្ហាញថា ការនាំចេញក្នុងខែមីនា កើន៩,២%ពីមួយឆ្នាំទៅមួយឆ្នាំ ស្មើ២០,៨៩ប៊ីលានដុល្លារ ។
លោក Pimchanok Vonkorpon អគ្គនាយកការិយាល័យគោលនយោបាយ និងយុទ្ធសាស្ត្ររបស់ក្រសួងពាណិជ្ជកម្ម បានបង្ហាញពីទំនុកចិត្តលើគោលដៅឆ្នាំនេះ ដើម្បីបង្កើនការនាំចេញ៥%បន្ថែមទៀត ។
តម្លៃប្រេងឆៅសកលត្រូវបានព្យាករថា នឹងកើនឡើងជាបណ្តើរៗក្នុងកម្រិតពី៥០ ទៅ៦០ ដុល្លារក្នុង១បារ៉ែល ហើយប្រាក់បាតនឹងមានតម្លៃចន្លោះពី៣៥,៥ ទៅ៣៧,៥បាត បើធៀបនឹងប្រាក់ដុល្លារអាមេរិក ។
មូលនិធិរូបិយវត្ថុអន្តរជាតិព្យាករថា សេដ្ឋកិច្ចពិភពលោក នឹងកើនឡើង៣,៥%នៅឆ្នាំនេះ ខណៈឆ្នាំមុនកើនឡើង៣,១% ។
ទោះជាយ៉ាងណា លោក Pimchanok ឱ្យដឹងថា ហានិភ័យជាសកលសម្រាប់កំណើននាំចេញរបស់ថៃ ត្រូវតែត្រួតពិនិត្យលើឧបសគ្គពាណិជ្ជកម្ម, ភាពតានតឹងរវាងសហរដ្ឋអាមេរិក និងកូរ៉េខាងជើងលើកម្មវិធីនុយក្លេអ៊ែររបស់ប្រទេសនេះ ។
ការនាំចេញកើនឡើងក្នុងខែមីនា ដោយសារវត្ថុធាតុដើមដែលឆ្លុះបញ្ចាំងពីការវិលត្រឡប់ទៅកាន់ទំនុកចិត្ត និងកំណើនវិនិយោគ ។ ថៃរីករាយនឹងផលលើសពាណិជ្ជកម្មចំនួន១,៦២ប៊ីលានដុល្លារ។
ចំណែកនៅត្រីមាសទី១ ការនាំចូលកើនឡើង១៤,៨% ស្មើនឹង៥២,៤ប៊ីលានដុល្លារ ដែលមានផលលើសពាណិជ្ជកម្ម៤,០៥ប៊ីលានដុល្លារ ។
ក្នុងខែមីនា ការនាំចេញផលិតផលកសិកម្ម និងកសិឧស្សាហកម្មកើនឡើង១២%ពីឆ្នាំមុន ។ ការនាំចេញផលិតផលទាក់ទងនឹងប្រេងឆៅ កើនឡើងស្របនឹងកំណើនតម្លៃប្រេងឆៅជាសកល ។ រីឯការនាំចេញកៅស៊ូកើនឡើង៩៥,៤% ។
ការនាំចេញទៅប្រទេសចិនក្នុងខែមីនា កើនឡើង៤៧,៦% នាំមុខដោយផលិតផលកៅស៊ូ និងគ្រឿងម៉ាស៊ីន ។ ការលក់នៅអាស៊ីខាងត្បូងគឺប្រទេសឥណ្ឌា កើនឡើង១៩,១% លើផលិតផលគីមី និងរថយន្ត ។ សម្រាប់ត្រីមាសនេះ ការនាំចេញទៅប្រទេសចិនកើនឡើង៣៦,៩% និងអាស៊ីខាងត្បូងកើនឡើង២២,៨% ។
ការលក់ទៅប្រទេសជប៉ុន, សហភាពអឺរ៉ុប (ប្រទេសសេដ្ឋកិច្ចទាំង១៥) និងសហរដ្ឋអាមេរិកកើនឡើង១៤,៩%, ១០,២% និង៧,១% នៅខែមីនា រៀងគ្នា ។ ចំពោះប្រទេស CLMV ដូចជា កម្ពុជា ឡាវ មីយ៉ាន់ម៉ា និងវៀតណាម កើនឡើង១៨,១% ។ រីឯការនាំចេញទៅកាន់កូរ៉េខាងត្បូង តៃវ៉ាន់ និងហុងកុង កើនឡើង២៤,៧%, ២៧,១% និង១០% រៀងគ្នា ។
ការធ្វើពាណិជ្ជកម្មឆ្លងកាត់ព្រំដែនក្នុងខែមីនា កើនឡើង១៩% ស្មើនឹង១២០,៤១ប៊ីលានបាតពីមួយឆ្នាំមុន ខណៈនៅត្រីមាសទី១ ពាណិជ្ជកម្មឆ្លងដែនកើនឡើង៥,២% ស្មើ៣១៥,៧២ប៊ីលានបាត៕
ចែករំលែកព័តមាននេះ