ADផ្ទាំងផ្សព្វផ្សាយពាណិជ្ជកម្ម

Picture

ទូក​.​ង​វត្ត​ចុង​កោះជ្រូក ដណ្ដើម​ជ័យ​លា​ភី​លេខ​១ នៅ​តំបន់​ប្រវត្តិសាស្ត្រ​ហ្លួង​ព្រះស្ដេច​កន​(​វី​ដេ​អូ​)

2 ខែ មុន
  • កំពង់ចាម

តំបន់​ប្រវត្តិសាស្ត្រ​ហ្លួង​ព្រះស្ដេច​កន ស្ថិត​នៅ​ឃុំ​ដូនតី ស្រុក​ពញាក្រែក ខេត្ត​ត្បូងឃ្មុំ បាន​រៀបចំ​ព្រឹត្តិការណ៍​ប្រណាំងទូក​.​ង ដោយ​ធ្វើ​ឡើង​នា​រសៀល​ថ្ងៃ​ទី​៨ ខែវិច្ឆិកា ឆ្នាំ​២០២២ ដោយ​មាន​មនុស្ស​ម្នា​បាន​ចូលរួម​ទស្សនា​ច្រើន​កុះករ

ខេត្តកំពង់ចាម​-​ត្បូងឃ្មុំ ៖ តំបន់​ប្រវត្តិសាស្ត្រ​ហ្លួង​ព្រះស្ដេច​កន ស្ថិត​នៅ​ឃុំ​ដូនតី ស្រុក​ពញាក្រែក ខេត្ត​ត្បូងឃ្មុំ បាន​រៀបចំ​ព្រឹត្តិការណ៍​ប្រណាំងទូក​.​ង ដោយ​ធ្វើ​ឡើង​នា​រសៀល​ថ្ងៃ​ទី​៨ ខែវិច្ឆិកា ឆ្នាំ​២០២២ ដោយ​មាន​មនុស្ស​ម្នា​បាន​ចូលរួម​ទស្សនា​ច្រើន​កុះករ​។ ចំណែក​កម្លាំង​សមត្ថកិច្ច​វិញ ក៏​បាន​យកចិត្តទុកដាក់​ខិតខំ​ពង្រឹង​ការពារ​សន្តិសុខ និង​សណ្ដាប់ធ្នាប់​បាន​ល្អ​ប្រសើរ​ទៀត​ផង​។

Picture

ព្រះ​បុ​ណ្ណ​សោភ័ណ ជឺ សំណាង ព្រះ​ចៅអធិការ​វត្ត​ឥន្ទ​កោ​សី (​ចុង​កោះជ្រូក​) ស្ថិត​នៅ​ឃុំ​កោះសំរោង ស្រុក​កំពង់សៀម ខេត្តកំពង់ចាម មាន​ថេរៈ​ដីកា​ឲ្យ​ដឹង​ថា ទូក​.​ង «​ពេជ្រ​កែវ​មុន្នី​សែន​ជ័យ​បារមី​កោះសំរោង​» មាន​ចំណុះ​ទូក​ចំនួន​២២​នាក់ ជា​ប្រភេទ​ទូក​.​ង​ខ្នាត​អន្តរជាតិ បាន​ចូលរួម​ប្រណាំង​នៅ​ហ្លួង​ព្រះស្ដេច​កន ដោយ​អុំ​ចំនួន​៣​លើក លើ​ចម្ងាយ​៨០០​ម៉ែត្រ ប្រើ​ថេរវេលា​ជាង​២​នាទី ទទួល​បាន​ចំណាត់ថ្នាក់​លេខ​១ ក្នុង​ចំណោម​២៨​ទូក​.​ង នេះ​ទើបតែ​លើក​ទី​មួយ​នៅ​ក្នុង​ទឹកដី​ខេត្ត​ត្បូងឃ្មុំ​។

Picture

ព្រះ​ចៅអធិការ​វត្ត​ចុង​កោះជ្រូក មាន​ថេរៈ​ដីកា​បន្ត​ថា ប្រភេទ​ទូក​.​ង​ខ្នាត​អន្តរជាតិ​នេះ ត្រូវ​បាន​បង្កើត​ឡើង​រហូត​មក​ដល់​ពេល​នេះ គឺ​មាន​រយៈពេល​១២​ឆ្នាំ​មក​ហើយ​។ ជាមួយ​នោះ ពេល​ចេញ​ព្រះ​វស្សា​កន្លង​ទៅ បាន​ចូលរួម​ប្រកួតប្រជែង​អុំ​ប្រណាំង​គ្នា​ជាមួយនឹង​ទូក​.​ង​ផ្សេង​ទៀត​នៅ​មាត់ទន្លេ​ក្រុង​កំពង់ចាម ដោយ​ទទួល​បាន​ចំណាត់ថ្នាក់​លេខ​២​។ ចំពោះ​ចំណុះ​ទូក​.​ង គឺ​សុទ្ធសឹងតែ​មានបទពិសោធន៍ និង​ចេះ​ហែល​ទឹក​ទាំងអស់​គ្នា​។

Picture

ព្រះ​ចៅអធិការ​វត្ត​ចុង​កោះជ្រូក មាន​ថេរៈ​ដីកា​បន្ត​ថា កោះសំរោង ហ៊ុម​ព័ទ្ធ​ទៅ​ដោយ​ទឹកទន្លេ​ជុំវិញ ដោយ​មានការ​ស្នើ​សុំ​ពី​រដ្ឋបាល​ខេត្ត​ត្បូងឃ្មុំ សូម​ឱ្យ​ទូក​.​ង​វត្ត​ចុង​កោះជ្រូក ទៅ​ចូលរួម​ប្រណាំង​នៅ​តំបន់​ប្រវត្តិសាស្ត្រ​ហ្លួង​ព្រះស្ដេច​កន ក្នុងស្រុក​ពញាក្រែក ដោយពេល​វេលា​នៅ​សល់​ប្រមាណ​ជិត​មួយ​ខែ​ក្រោម​ការ​ដឹកនាំ​របស់​ព្រះ​អង្គ​ផ្ទាល់​បានឱ្យ​ក្រុម​ជំនួស​ទូក​.​ង​ទាំងអស់​ខិតខំ​យកចិត្តទុកដាក់​នាំ​គ្នា​ហ្វឹកហាត់​បំប៉នកម្លាំង​ឲ្យ​កាន់តែ​ខ្លាំងក្លា ដើម្បី​សម្រេច​គោលដៅ​ទទួល​នូវ​ភាព​ជោគជ័យ​។ ទីបំផុត​ទូក​.​ង​របស់​វត្ត​ចុង​កោះជ្រូក បាន​ចូលរួម​ប្រណាំង​ជាមួយនឹង​បណ្ដា​ទូក​.​ង​ខ្នាត​អន្តរជាតិ​ផ្សេង​ទៀត ដែល​ធ្វើ​ឡើង​នា​រសៀល​ថ្ងៃ​ទី​៨ ខែវិច្ឆិកា ឆ្នាំ​២០២២ គឺ​ទទួល​បាន​ជោគជ័យ​ដ៏​ត្រចះត្រចង់ គឺ​ចំណាត់ថ្នាក់​លេខ​១ ទទួល​បាន​ពានរង្វាន់​នៅ​ថវិកា​ចំនួន​២​លាន​៥​សែន​រៀល​។ បន្ថែម​ពីលើ​ត្រូវ​បាន​ឯកឧត្តម អ៊ុ​ន ចាន់​ដា អភិបាលខេត្ត​កំពង់ចាម អញ្ជើញ​ទៅ​ចូលរួម និង​លើកទឹកចិត្ត​ដល់​ក្រុម​កីឡាករ ដោយ​ឧបត្ថម្ភ​ថវិកា​បន្ថែម​១​លាន​រៀល​ទៀត​ផង​ដែរ​។

Picture

ព្រះ​ចៅអធិការ​វត្ត​ចុង​កោះជ្រូក បញ្ជាក់​ថា ជាមួយនឹង​ជោគជ័យ​នេះ ត្រូវ​បាន​ឯកឧត្តម​បណ្ឌិត​ជាម ចាន់​សោ​ភ័​ណ្ឌ អភិបាលខេត្ត​ត្បូងឃ្មុំ ក៏​ដូច​ជា​ឯកឧត្តម​អភិបាលខេត្ត​កំពង់ចាម ក៏​បាន​ស្នើ​សុំ​ឱ្យ​ទូក​.​ង​ចុង​កោះជ្រូក ចូលរួម​កម្មវិធី​ប្រណាំងទូក​.​ង បណ្ដែតប្រទីប សំពះ​ព្រះ​ខែ និង​អកអំបុក ដោយ​ធ្វើ​ឡើង​នៅ​តំបន់​រមណីយដ្ឋាន​ប្រវត្តិសាស្ត្រ​ដដែល​នា​ឆ្នាំ​២០២៣ ខាង​មុខ​។

Picture

សូម​បញ្ជាក់​ថា ពេល​ដឹក​ទូក​.​ង​ត្រឡប់​មក​ដល់​វត្ត​ចុង​កោះជ្រូក​វិញ នា​យប់​ថ្ងៃ​ទី​៨ ខែវិច្ឆិកា ឆ្នាំ​២០២២ ប្រជាពលរដ្ឋ ព្រមទាំង​ពុទ្ធបរិស័ទ​ច្រើន​កុះករ បាន​នាំ​គ្នា​អបអរសាទរ​សប្បាយ​រីករាយ​ដោយ​ឃើញ​ទទួល​បាន​ពានរង្វាន់​លេខ​១ បន្ទាប់​មក​ទៀត​ក៏​បាន​រៀបចំ​ពិធី​អកអំបុក​ទៅ​តាម​ប្រពៃណី​ផង​ដែរ​។

Picture

លោក​អ៊ិ​ន ពៅ​សម្បត្តិ ប្រធាន​មន្ទីរ​អប់រំ យុវជន និង​កីឡា​ខេត្ត​ត្បូងឃ្មុំ មាន​ប្រសាសន៍​ឱ្យ​ដឹង​ដែរ​ថា ចំពោះ​កម្មវិធី​ដែល​ប្រព្រឹត្ត​ទៅ​នៅ​ហ្លួង​ព្រះស្ដេច​កន គឺ​មាន​ទូក​.​ង​ខ្នាត​អន្តរជាតិ​ចំនួន​២៨​ទូក​, ទូកផ្កាចារ​ចំនួន​៤​ទូក​, ទូកត្នោត​ចំនួន​៦​ទូក និង​ខ្ទះ​អុំ​ចំនួន​១៤ ហើយ​បើ​តាម​ការ​សង្កេត​ដោយ​ផ្ទាល់ គឺ​មាន​មនុស្ស​ក្មេង​ចាស់​ប្រុស​ស្រី​មក​ចូលរួម​ទស្សនា​យ៉ាង​ណែនណាន់តាន់តាប់​ក្នុង​បរិយាកាស​សប្បាយ​រីករាយ ក្រោយ​ពី​ជំងឺ​កូ​វី​ដ​បាន​ស្ងប់ស្ងាត់​។

Picture
Picture
Picture
Picture
Picture
Picture
Picture
Picture
Picture
Picture
Picture
SEA Game 2023

ព្រឹត្តិការណ៍ស៊ីហ្គេម លើកទី៣២

SEA Game 2023