ខេត្តប៉ៃលិន ៖ បុរសម្នាក់ត្រូវបានគេស្គាល់ថា ជាមន្ត្រីយោធាបានរងរបួសស្រាល ខណ:ស្រវឹងស្រាបើកបរម៉ូតូដែលខ្ចីបងប្អូនក្នុងល្បឿនលឿនជ្រុលទៅបុកជាមួយនឹងរថយន្តក្រុងដែលកំពុងស៊ីញ៉ូបត់ឆ្វេងបណ្តាលឱ្យដួលប្រាវត្រូវរថយន្តកៀបម៉ូតូជាប់។
តែសំណាងល្អ អ្នកបើកបរម៉ូតូលោតចេញទាន់ កុំអីអាចនឹងបង្កឱ្យមានគ្រោះថ្នាក់ដល់អាយុជីវិតជាក់ជាមិនខាន ដែលហេតុការណ៍មន្ត្រីយោធាស្រវឹងស្រាម្នាក់ខាងលើបើកបរម៉ូតូក្នុងល្បឿនលឿនជ្រុលទៅបុករថយន្តក្រុងស៊ីញ៉ូបត់ឆ្វេងនេះបានកើតឡើងកាលពីវេលាម៉ោង៨និង៣០នាទីយប់ ថ្ងៃទី០៤ ខែវិច្ឆិកា ឆ្នាំ២០២២ ស្ថិតនៅបណ្តោយផ្លូវជាតិលេខ៥៧ ក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន។
ប្រភពព័ត៌មានពីមន្ត្រីនគរបាលបានឱ្យដឹងថា ៖ អ្នកបើកបរម៉ូតូ ឈ្មោះ ប្លង់ ភេទប្រុស អាយុ៣៧ឆ្នាំ ជាមន្ត្រីយោធា រស់នៅក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ដោយបើកបរម៉ូតូ ម៉ាកឃ្លីកពណ៌ខ្មៅ ពាក់ស្លាកលេខ ប៉ៃលិន 1C-3642 រងការខូចខាតផ្នែកខាងក្រោម និងខាងមុខ។
ចំណែកភាគីខាងរថយន្តក្រុងរបស់ក្រុមហ៊ុន វីរ:ប៊ុនថាំ មិនរងរបួស ដោយតៃកុងបើកបររថយន្តម៉ាកយូនី វើស ពណ៌លឿង ពាក់ស្លាកលេខ ភ្នំពេញ 3F-0240។
ប្រភពបន្តទៀតថា មុនពេលកើតហេតុគេឃើញ អ្នកបើកបរម៉ូតូខាងលើក្នុងទិសដៅពីជើងទៅត្បូងក្នុងល្បឿនលឿនស្ថិតក្នុងស្ថានភាពស្រវឹងលុះដល់កន្លែងកើតហេតុ ស្របពេលដែលរថយន្តក្រុមហ៊ុនខាងលើស៊ីញ៉ូបត់ឆ្វេង ស្រាប់តែអ្នកបើកបរម៉ូតូមិនបន្ថយល្បឿនក៏ជ្រុលទៅបុកពេញទំហឹងដួលប្រាវ ហើយដោយអ្នកបើកម៉ូតូស្មារតីរឹងក៏លោតចេញពីម៉ូតូ កុំអីត្រូវរថយន្តកិនពីលើរងគ្រោះដល់អាយុជីវិតជាក់ជាមិនខាន។
ក្រោយពេលកើតហេតុមន្ត្រីនគរបាលចុះទៅធ្វើការវាស់វែង ដោយភាគីទាំងសងខាងមានការសម្របសម្រួលគ្នានៅកន្លែងកើតហេតុ ដើម្បីបញ្ចប់រឿង ហើយម្ចាស់រថយន្តក៏បន្តដឹកភ្ញៀវទៅភ្នំពេញនាពេលយប់។
រីឯម្ចាស់ម៉ូតូត្រូវបានសាច់ញាតិដឹកយកទៅលាងរបួសរីឯម៉ូតូ ដែលខ្ចីបងប្អូនជិះ ត្រូវបានម្ចាស់យកទៅជួសជុល៕
ចែករំលែកព័តមាននេះ