ខេត្តបាត់ដំបង ៖ ព្រះសង្ឃចំនួន២១អង្គនៅវត្តខ្នាចរមាស មានអាការៈឡើងកំដៅខ្លាំងរហូតស្រែកយំពេញវត្ត ត្រូវបញ្ជូនជាបន្ទាន់ទៅកាន់មន្ទីរពេទ្យកាលពីពាក់កណ្ដាលយប់ ហើយគិតត្រឹមម៉ោង១១និង៣០នាទីថ្ងៃទី០២ វិច្ឆិកា គ្រូពេទ្យបានអះអាងថា ព្រះសង្ឃទាំងនោះមានព្រះអង្គខ្លះកើតជំងឺគ្រុនឈាម ព្រះអង្គខ្លះទៀតមានជំងឺរលាកបំពង់ក…
ខេត្តបាត់ដំបង ៖ ព្រះសង្ឃចំនួន២១អង្គនៅវត្តខ្នាចរមាស មានអាការៈឡើងកំដៅខ្លាំងរហូតស្រែកយំពេញវត្ត ត្រូវបញ្ជូនជាបន្ទាន់ទៅកាន់មន្ទីរពេទ្យកាលពីពាក់កណ្ដាលយប់ ហើយគិតត្រឹមម៉ោង១១និង៣០នាទីថ្ងៃទី០២ វិច្ឆិកា គ្រូពេទ្យបានអះអាងថា ព្រះសង្ឃទាំងនោះមានព្រះអង្គខ្លះកើតជំងឺគ្រុនឈាម ព្រះអង្គខ្លះទៀតមានជំងឺរលាកបំពង់ក និងខ្លះទៀតស្ថិតក្នុងការតាមដានអាការៈរោគនៅឡើយ ។
ព្រះតេជគុណ អ៊ឹប ភារុណ ដែលកំពុងតាមដានយ៉ាងដិតដល់ចំពោះព្រះសង្ឃ ដែលកំពុងសង្គ្រោះបន្ទាន់នៅមន្ទីរពេទ្យបានមានសង្ឃដីកាថា គ្រូពេទ្យបានបង្ហាញលទ្ធផលខ្លះៗថា ព្រះសង្ឃទាំង២១អង្គ ដែលបានពិនិត្យឈាមរួចហើយ និងកំពុងព្យាបាលនៅមន្ទីរពេទ្យបង្អែកស្រុកថ្មគោល ជាក់ស្ដែងមាន០៤អង្គ គឺ មានចំនួន០៤អង្គកើតជំងឺគ្រុនឈាម ក្រៅពីនេះមានកើតជំងឺរលាកបំពង់ក តែក៏មានព្រះប៉ុន្មានអង្គទៀតកំពុងតាមដានពីអាការៈដែរ ។
សូមជម្រាបថា ព្រះសង្ឃចំនួន១៨អង្គដំបូង នៅវត្តខ្នាចរមាស ឃុំខ្នាចរមាស ស្រុកបវេល ត្រូវបានបញ្ជូនតាមរថយន្តសាម៉ុយទៅកាន់មន្ទីរពេទ្យបង្អែកស្រុកថ្មគោល នៅវេលាម៉ោង១១និង៣០នាទីយប់ថ្ងៃទី ០១ វិច្ឆិកា ក្រោយពីមានអាការៈក្ដៅខ្លួនខ្លាំង រហូតមាននេនៗខ្លះស្រែកយំផ្អើលពេញវត្តទាំងកណ្ដាលយប់ទៀតផង។
ព្រះតេជគុណ អ៊ឹប ភារុណ បានប្រាប់កោះសន្តិភាពថា កាលពីបួន ប្រាំថ្ងៃមុន មានព្រះសង្ឃពីបួនទៅប្រាំអង្គ បានកើជំងឺគ្រុនក្ដៅនេះ ហើយបានហៅគ្រូពេទ្យមកជួយពិនិត្យនិងប្រើប្រាសថ្នាំបញ្ចុះកំដៅ។ ព្រះអង្គបានបញ្ជាក់ថា ពេលនេះនេនតូចៗទាំងនោះហាក់បានធូរស្រាល តែក្រោយមកអាការៈគ្រុនក្ដៅនេះក៏បានកើតឡើងជាថ្មី។ លុះនៅយប់ថ្ងៃទី ០១ វិច្ឆិកា ក៏មានការឆ្លងរាលដាលខ្លាំងដល់ព្រះសង្ឃដទៃទៀត រហូតដល់ចំនួន១៨អង្គ។
ព្រះតេជគុណ អ៊ឹប ភារុណ បានបញ្ជាក់ថា ក្រោយពីបញ្ជូនដល់មន្ទីរពេទ្យចំនួន១៨អង្គ ស្រាប់តែនៅព្រឹកថ្ងៃទី០២ វិច្ឆិកា ព្រះអង្គបានសម្រេចបញ្ជូននេនៗចំនួនបីអង្គទៀតទៅមន្ទីរពេទ្យដដែល ក្រោយពីនេនៗទាំងនេះមានអាការៈមិនល្អ រហូតល់ដល់ពេលនេះមានព្រះសង្ឃចំនួន២១អង្គ កំពុងព្យាបាលនៅមន្ទីរពេទ្យខាងលើ។ ប៉ុន្តែយ៉ាងណា គិតត្រិមម៉ោង១២ថ្ងៃត្រង់នេះ ពុំទាន់មានព្រះសង្ឃអង្គណាមានអាការៈធ្ងន់ធ្ងរនៅឡើយទេ ហើយក្រុមគ្រួពេទ្យកំពុងពិនិត្យ និងតាមដានរោគសញ្ញាព្រះសង្ឃទាំង២១អង្គយ៉ាងយកចិត្តទុកដាក់បំផុត៕
ចែករំលែកព័តមាននេះ