រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្រុមកម្មករសំណង់ជាច្រើននាក់បានចេញពីក្នុងរោងកម្មករមកធ្វើការតវ៉ា បន្ទាប់ពីមានសន្តិសុខយាមច្រកចេញចូលរោងកម្មករបានវា.យកម្មករសំណង់ម្នាក់ឲ្យបែកក្បាល បង្កឱ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី២ ខែវិច្ឆិកា ឆ្នាំ២០២២ នៅត្រង់ចំណុចរោងកម្មករបុរីវិមានភ្នំពេញ ស្ថិតក្នុងសង្កាត់ឃ្មួញ ខណ្ឌសែនសុខ។
តាមប្រភពព័ត៌មានពីបុរសជាជនរងគ្រោះមានឈ្មោះ ឈូន ឆៀង អាយុ២៨ឆ្នាំ ជាកម្មករសំណង់ ស្នាក់នៅកន្លែងកើតហេតុ បានរៀបរាប់ប្រាប់ឲ្យដឹងថា គាត់បានមកធ្វើការជាកម្មករសំណង់នៅក្នុងការដ្ឋានរបស់បុរីវិមានភ្នំពេញនេះអស់រយៈពេលជាច្រើនឆ្នាំណាស់មកហើយ មិនដែលមានទំនាស់ ឬមានគំនុំជាមួយអ្នកណានោះទេ។
ជនរងគ្រោះបន្តថា នៅមុនពេលកើតហេតុ គឺជាវេលាដែលកម្មករទាំងអស់ដល់ពេលត្រូវសំរាកពីការងារ ហើយកម្មករទាំងអស់ក៏បានវិលចូលកន្លែងសំរាករៀងៗខ្លួន។ លុះដល់វេលាម៉ោង៨យប់ មុនពេលកើតហេតុគាត់ដេកមិនលក់ក៏បានទៅឈប់និយាយលេងជាមួយកម្មករសំណង់ប្រុសៗចំនួប២ នាក់ទៀតនៅខាងមុខរោងដែលពួកគាត់ស្នាក់នៅ។ មួយស្ទុះក្រោយមក ក៏ស្រាប់តែមានសន្តិសុខដែលយាមនៅច្រកចេញចូលរោងកម្មករកើតហេតុ២នាក់បានជិះម៉ូតូមក រួចក៏បានស្រែកថា «ហែងស្ងាត់អត់ៗ ហែងចង់ម៉េច?»។ បន្ទាប់មកសន្តិសុខទាំងនោះក៏បានយកវិទ្យុទាក់ទង (អាយកូម) វា.យទៅលើរូបគាត់ (ជនរងគ្រោះ) បណ្តាលឲ្យរងរបួសបែកក្បាល និងវា.យទៅលើបុរសទាំង២នាក់ដែលឈរជាមួយគាត់ (ជនរងគ្រោះ) បន្ថែមទៀតបណ្ដាលឲ្យរងរបួសស្រាល។
ជនរងគ្រោះបន្តទៀតថា បន្ទាប់មកសន្តិសុខទាំងនោះក៏បាននាំរូបគាត់ (ជនរងគ្រោះ) ទៅកាន់ប៉ុស្តិ៍យាមរបស់ខ្លួន ដោយមិនប្រាប់ពីមូលហេតុអោយបានច្បាស់លាស់នោះទេ។ លុះដល់វេលាកើតហេតុ ក៏បង្កឲ្យមានការភ្ញាក់ដល់កម្មករទាំងអស់នាំគ្នាឆោឡោចេញមកធ្វើការតវ៉ាបង្កឲ្យមានការភ្ញាក់ផ្អើលដល់សមត្ថកិច្ចចុះអន្តរាគមន៍តែម្តង។
តាមសម្តីកម្មករដែលនាំគ្នាចេញមកធ្វើការតវ៉ាបានប្រាប់បន្ថែមទៀតថា នេះមិនមែនជាលើកទី១នោះទេ ដែលសន្តិសុខបានប្រើប្រាស់អំពើហិ.ង្សាទៅលើកម្មករ ព្រោះថាកន្លងមក សន្តិសុខទាំងនោះក៏ធ្លាក់ប្រើប្រាស់អំពើហិ.ង្សាទៅកម្មករប៉ុន្មានដងមកហើយ ថែមទាំងបញ្ឈប់ពួកគេពីការងារថែមទៀតផង។
គួរបញ្ជាក់ផងដែរថា ជុំវិញហេតុការណ៍ខាងលើនេះ ភាគីខាងសន្តិសុខមិនបានបញ្ជាក់ប្រាប់អ្វីនោះទេ។
ក្រោយពេលកើតហេតុ សមត្ថកិច្ចមូលដ្ឋានក៏បាននាំសន្តិសុខដែលបានបង្កហេតុ និងជនរងគ្រោះទៅកាន់ប៉ុស្តិ៍នរគបាលរដ្ឋបាលឃ្មួញ ដើម្បីរង់ចាំធ្វើការចាត់ការទៅតាមនីតិវិធី៕
ចែករំលែកព័តមាននេះ