រាជធានីភ្នំពេញ ៖ បុរសម្នាក់ចេញពីកម្មវិធីផ្ទះបងប្អូនទៅទិញអីហូប បានបើករថយន្តជ្រុលចង្កូតទៅធ្លាក់ផ្លូវចូលទៅក្នុងទឹកស្រែលិចរថយន្តមួយកំណាត់ តែសំណាងល្អមិនមានគ្រោះថ្នាក់ដល់មនុស្ស ហេតុការណ៍នេះ
រាជធានីភ្នំពេញ ៖ បុរសម្នាក់ចេញពីកម្មវិធីផ្ទះបងប្អូនទៅទិញអីហូប បានបើករថយន្តជ្រុលចង្កូតទៅធ្លាក់ផ្លូវចូលទៅក្នុងទឹកស្រែលិចរថយន្តមួយកំណាត់ តែសំណាងល្អមិនមានគ្រោះថ្នាក់ដល់មនុស្ស ហេតុការណ៍នេះកើតឡើងនៅវេលាម៉ោង១១និង១០នាទី ថ្ងៃទី១០ ខែមេសា ឆ្នាំ២០១៧ ជិតនឹងវត្តធម្មត្រ័យ ផ្លូវ៣០ម៉ែត្រ ភូមិ២៤ សង្កាត់ព្រៃសរ ខណ្ឌដង្កោ ។
តាមសម្ដីបងប្អូនរបស់អ្នកបើកបររថយន្តបានឱ្យដឹងថា មុនពេលកើតហេតុ ក្មួយរបស់គាត់បានទៅហូបចុកនៅផ្ទះបងប្អូនម្ដុំបុរីសន្តិភាព សង្កាត់ពងទឹក ខណ្ឌដង្កោ ពេលកំពុងហូប ស្រាប់តែបុរសដែលជាក្មួយបានបើករថយន្តម៉ាកហាយឡែនឌ័រ ពណ៌ស បានចេញពីកន្លែងផឹកស៊ីទៅរកទិញអីហូប ដោយធ្វើដំណើរតាមផ្លូវបេតុង៦០ម៉ែត្រ ក្នុងទិសដៅពីកើតទៅលិចក្នុងល្បឿនលឿន ព្រមទាំងស្រវឹងផងនោះ ខណៈមកដល់ចំណុចកើតហេតុ ដោយផ្លូវងងឹតហើយកែងទៀតនោះ ព្រមទាំងអ្នកបើកបររថយន្តមិនស្គាល់ផ្លូវច្បាស់លាស់ផង ក៏ជ្រុលទៅធ្លាក់ផ្លូវ បណ្ដាលឱ្យរថយន្តចូលទៅក្នុងស្រែលិចពាក់កណ្ដាល ភ្លាមៗអ្នកបើកបររថយន្តបានបើកបង្អួចលួនចេញមកក្រៅឱ្យគេជួយ ។
ក្នុងហេតុការណ៍ខាងលើនេះ អ្នកបើកបររថយន្តអត់មានគ្រោះថ្នាក់នោះទេ ហើយត្រូវអ្នកធ្វើដំណើរតាមផ្លូវជួយទាញមកលើគោក ព្រមទាំងផ្តល់ដំណឹងទៅដល់សមត្ថកិច្ចមូលដ្ឋានឱ្យចុះមកមើល ក្នុងពេលនោះដែរសមត្ថកិច្ចមូលដ្ឋានក៏ចុះទៅដល់ រួចសាកសួរ និងពិនិត្យមើលកន្លែងកើតហេតុឃើញថា អត់មានប៉ះពាល់ដល់ទ្រព្យសម្បត្តិប្រជាពលរដ្ឋ និងសាធារណ: រួចហើយក៏ឱ្យម្ចាស់រថយន្តហៅរថយន្តស្ទូចយកទៅជួសជុលដោយខ្លួនឯង ៕
ចែករំលែកព័តមាននេះ