រាជធានីភ្នំពេញ ៖ បក្សពួកជនសង្ស័យជាក្រុមប្លន់ប្រដាប់អាវុធម្នាក់ដែលបានរត់គេចខ្លួនតាំងពីឆ្នាំ២០១៣ ហើយកាលពីល្ងាចថ្ងៃទី៨ ខែមេសា ឆ្នាំ២០១៧ ត្រូវបានកម្លាំងសមត្ថកិច្ចនគរបាលខេត្តកំពង់ចាមសហការជាមួយនាយកដ្នាននគរបាលព្រហ្មទណ្ឌក្រសួងមហាផ្ទៃស្នងការដ្ឋាននគរបាលរាជធានីភ្នំពេញ និងនគរបាលខណ្ឌសែលសុខចាប់ឃាត់ខ្លួន និងនាំឲ្យទៅទទួលទោសនៅខេត្តកំពង់ចាមវិញ ។
បក្សពួកក្រុមជនសង្ស័យជាចោរប្លន់ប្រដាប់អាវុធដែលកម្លាំងសហការចាប់ឃាត់រូបនោះឈ្មោះ ញ៉ែម យី ភេទប្រុស អាយុ៤៥ឆ្នាំ មានស្រុកកំណើតនៅភូមិអង្គជ័យក្រោម ឃុំមហាខ្ញូង ស្រុកកោះសូទិន ខេត្តកំពង់ចាម ។ ការចាប់ឃាត់ខ្លួនបក្សពួកចោរប្លន់ម្នាក់នេះត្រូវបានសមត្ថកិច្ចឲ្យដឹងថា ជាការអនុវត្តតាមដីកាបង្គាប់ឲ្យចាប់ខ្លួនលេខ៤៣ របស់លោក ទិតសុទ្ធី បូរ៉ាល័ក្ខណ៍ ចៅក្រមស៊ើបសួរសាលាដំបូងខេត្តកំពង់ចាម ។ សមត្ថកិច្ចបន្តថា តាមដីកាចាប់ខ្លួនគឺយោងទៅលើពាក្យបណ្តឹងរដ្ឋប្បវេណីរបស់ជនគ្រោះ និងជុំវិញការបំភ្លឺរបស់សាក្សីដែលបានចង្អុលបង្ហាញថា ឈ្មោះ ញ៉ែម យី ពិតជាបានចូលរួមប្រព្រឹត្តក្នុងបទល្មើស អំពើកំហែងដោយមានស្ថានទម្ងន់ទោស ដោយប្រើប្រាស់អាវុធប្លន់នៅចំណុចភូមិទី៥ ឃុំព្រែកតានង់ ស្រុកកោះសូទិន ខេត្តកំពង់ចាម កាលពីថ្ងៃទី២១ ខែវិច្ឆិកា ឆ្នាំ២០១៣ ។
លោកវរសេនីយ៍ឯក ជាវ វិបុល ប្រធានការិយាល័យនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃដែលដឹកនាំកម្លាំងអនុវត្តដីកាចាប់ខ្លួនបក្សពួកក្រុមប្លន់ប្រដាប់អាវុធនោះបានឲ្យដឹងថា ជនសង្ស័យក្រោយពីធ្វើសកម្មភាពប្លន់ប្រដាប់អាវុធនៅស្រុកកោះសូទិន ខេត្តកំពង់ចាម ចុងឆ្នាំ២០១៣នោះមករូបគេបានគេចខ្លួនទៅធ្វើការនៅប្រទេសថៃមួយរយៈ ។ លោកបន្តថា ប្រហែលជាគិតឃើញថា សមត្ថកិច្ចភ្លេចខ្លួនក៏វិលមកស្រុកខ្មែរវិញ និងបានមកលាក់ខ្លួនធ្វើការសំណង់នៅក្នុងខណ្ឌសែនសុខ រាជធានីភ្នំពេញ ទើបត្រូវចាប់ខ្លួន និងបានបញ្ជូនទៅអនុវត្តទោសនៅខេត្តកំពង់ចាម ៕
ចែករំលែកព័តមាននេះ