បុរសម្នាក់មកពីខេត្តជូនបងប្អូនដែលមានជំងឺមកសម្រាកព្យាបាលនៅមន្ទីរពេទ្យ ហើយដេកចាំនៅខាងក្រៅមន្ទីរពេទ្យ ក៏ត្រូវបានក្រុមជនសង្ស័យយកកន្ត្រៃ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់មកពីខេត្តជូនបងប្អូនដែលមានជំងឺមកសម្រាកព្យាបាលនៅមន្ទីរពេទ្យ ហើយដេកចាំនៅខាងក្រៅមន្ទីរពេទ្យ ក៏ត្រូវបានក្រុមជនសង្ស័យយកកន្ត្រៃចាក់ប្លន់យកទូរស័ព្ទដៃមួយគ្រឿងបានសម្រេច បង្កឱ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺ ថ្ងៃទី២៦ ខែតុលា ឆ្នាំ២០២២ នៅត្រង់ចំណុចខាងមុខមន្ទីរពេទ្យកុមារគន្ធបុប្ផា តាមបណ្តោយផ្លូវ៩០ ស្ថិតក្នុងសង្កាត់វត្តភ្នំ ខណ្ឌដូនពេញ។
តាមប្រភពពីជនរងគ្រោះឈ្មោះ យឹម ចាន់ណារិទ្ធ ភេទប្រុស អាយុ២០ឆ្នាំ ស្នាក់នៅភូមិរូង ឃុំស្នំក្រពើ ស្រុកបាទី ខេត្តតាកែវ បានរៀបរាប់ប្រាប់ឲ្យដឹងថា កាលពីព្រឹកថ្ងៃទី២៥ ខែតុលា គាត់បានជូនប្អូនជីដូនមួយរបស់គាត់ដែលមានជំងឺមកសម្រាកព្យាបាលនៅឯមន្ទីរពេទ្យកុមារគន្ធបុប្ផា ក្នុងនោះមានឪពុករបស់អ្នកជំងឺទៅជាមួយផងដែរ។
ជនរងគ្រោះបន្តថា លុះដល់ពេលយប់ឪពុករបស់អ្នកជំងឺក៏បានចូលទៅដេកកំដរកូនរបស់គាត់នៅខាងក្នុងបាត់ នៅសល់តែគាត់នៅចាំមើលម៉ូតូនៅខាងក្រៅតែម្នាក់ឯង។ លុះរហូតដល់វេលាកើតហេតុ គាត់ (ជនរងគ្រោះ) ក៏បានទៅសង្ងំដេកលង់លក់មួយផ្ទាំងនៅលើបង់ខាងមុខមន្ទីរពេទ្យ ខណៈពេលដែលភ្ញាក់ដឹងខ្លួន គាត់ (ជនរងគ្រោះ) ក៏បានដឹងថា ខ្លួនបានបាត់ទូរស័ព្ទដៃម៉ាករៀលមី មួយគ្រឿង និងស្បែកជើងមួយគូរ ប៉ុន្តែជនសង្ស័យបែរជាបន្សល់ទុកស្បែកជើងរបស់ខ្លួន (ស្បែកជើងរបស់ជនសង្ស័យ) មួយគូរនៅកន្លែងកើតហេតុវិញ។
ជនរងគ្រោះបន្តថា បន្ទាប់មកគាត់ (ជនរងគ្រោះ) ក៏បានសង្ងំដេកទៅវិញ លុះមួយស្ទុះក្រោយមក ក៏ស្រាប់តែមានជនសង្ស័យ២នាក់ជិះម៉ូតូមួយគ្រឿងមិនចាំម៉ាក មកកន្លែងកើតហេតុវិញ ដោយជនសង្ស័យម្នាក់បានចុះមកធ្វើការយកស្បែកជើងរបស់គាត់ (ជនរងគ្រោះ) មកទុក រួចបានយកស្បែកជើងរបស់ខ្លួន (ជនសង្ស័យ) ត្រឡប់ទៅវិញ។ ខណៈពេលនោះ គាត់ (ជនរងគ្រោះ) ក៏បានដឹងខ្លួន រួចក៏បានប្រវា.យប្រតប់ជាមួយនឹងជនសង្ស័យ ទើបត្រូវជនសង្ស័យដកកន្ត្រៃមួយដើមចាក់ទៅលើខ្លួន (ជនរងគ្រោះ) ចំដៃខាងស្តាំ បណ្ដាលឲ្យរងរបួស។ ចំណែកឯជនសង្ស័យវិញ ក៏បាននាំគ្នាជិះម៉ូតូគេចខ្លួនបាត់ស្រមោលដោយសុវត្ថិភាពតែម្តង។
បើតាមប្រភពពីប្រជាពលរដ្ឋនៅជុំវិញកន្លែងកើតហេតុនោះ ក៏បានអោយដឹងថា ជនសង្ស័យដែលធ្វើសកម្មភាពប្លន់ជនរងគ្រោះនោះ គឺមានរហស្សនាម «អាខ្មៅបឹងកក់» ហើយជនសង្ស័យរូបនេះ តែងតែធ្វើសកម្មភាពចោរកម្មយ៉ាងសកម្មផងដែរ។
ក្រោយពេលកើតហេតុ សមត្ថកិច្ចមូលដ្ឋានក៏បានចុះធ្វើការអន្តរាគមន៍ និងបាននាំជនរងគ្រោះទៅធ្វើការដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលវត្តភ្នំ ដើម្បីអោយសមត្ថកិច្ចធ្វើការស្រាវជ្រាវតាមចាប់ជនសង្ស័យយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ