ហ៊ានមែន! នាំគ្នាដាក់ជើងរុញម៉ូតូរត់គេច លុះមន្ត្រីនគរបាលបា.ញ់គំរា.ម នៅតែព្យាយាមរត់គេចទៀត
- ភ្នំពេញ
ជនសង្ស័យមួយក្រុម បានធ្វើសកម្មភាពលួចម៉ូតូ ZOOMER-X មួយគ្រឿង ដែលម្ចាស់ម៉ូតូបានចតចោលនៅខាងមុខផ្ទះ ហើយជិះរុញគ្នា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យមួយក្រុម បានធ្វើសកម្មភាពលួចម៉ូតូ ZOOMER-X មួយគ្រឿង ដែលម្ចាស់ម៉ូតូបានចតចោលនៅខាងមុខផ្ទះ ហើយជិះរុញគ្នាគេចខ្លួនបាត់ស្រមោលដោយសុវត្ថិភាព បង្កឱ្យមានការភ្ញាក់ផ្អើលកាលពីវេលាម៉ោង១រំលងអធ្រាត្រឈានចូលថ្ងៃទី២៥ ខែតុលា ឆ្នាំ២០២២ នៅត្រង់ចំណុចភូមិ១២ ផ្លូវ៦៥៦ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានពីបុរសជាជនរងគ្រោះឈ្មោះ តារា អាយុ២២ឆ្នាំ ជាអ្នកដឹកជញ្ជូនអនឡាញ ស្នាក់នៅកន្លែងកើតហេតុ បានរៀបរាប់ប្រាប់ឲ្យដឹងថា នៅមុនពេលកើតហេតុ រូបគាត់ និងបងប្រុសរបស់គាត់បានផឹកស៊ីតិចតួចអស់ម្នាក់២ទៅ៣កំប៉ុងនៅខាងមុខផ្ទះ។ បន្ទាប់ពីឈប់ផឹកពួកគាត់ក៏បានបំបែកគ្នាទៅដេក ដោយបងប្រុសរបស់គាត់ បានឡើងទៅដេកលើផ្ទះបាត់ រីឯរូបគាត់វិញ (ជនរងគ្រោះ) ក៏បាននៅដេកលេងនៅលើគ្រែខាងមុខផ្ទះ ហើយបានចតម៉ូតូមួយគ្រឿងម៉ាក ZOOMER-X ពណ៌ក្រហម ពាក់ស្លាកលេខ ភ្នំពេញ1GG-7985 នៅក្បែរ ពេលនោះគាត់ (ជនរងគ្រោះ) ដេកដោយមិនបានចាក់សោ.កម៉ូតូនោះទេ។
ជនរងគ្រោះបន្តថា លុះដល់វេលាកើតហេតុ រូបគាត់ (ជនរងគ្រោះ) ក៏បានលក់មួយផាំង ខណៈពេលនោះក៏ស្រាប់តែលេចមុខក្រុមជនសង្ស័យមានគ្នា៤នាក់ ជិះម៉ូតូពីរគ្រឿង (មួយគ្រឿងម៉ាក ស៊ុយស័រគីនិច និងមួយគ្រឿងទៀតម៉ាកស្មាក) ហើយបានជិះមកធ្វើសកម្មភាពលួចបណ្តើរម៉ូតូរបស់គាត់ (ជនរងគ្រោះ) យកចេញទៅ ដោយជនសង្ស័យម្នាក់ជិះម៉ូតូដាក់ជើងរុញម៉ូតូរបស់គាត់ (ជនរងគ្រោះ) ពីក្រោយព្យាយាមគេចខ្លួនចេញពីកន្លែងកើតហេតុ។
ប្រភពដដែលបន្តថា ខណៈពេលនោះ ក៏មានប្រជាពលរដ្ឋបានឃើញពីលើផ្ទះ និងស្រែកថា «ចោរៗ» ធ្វើឲ្យភ្ញាក់រូបគាត់ (ជនរងគ្រោះ) ងើបរត់ដេញតាមជនសង្ស័យ។ រំពេចនោះដែរ ក៏មានអ្នកជិតខាងរបស់គាត់ (ជនរងគ្រោះ) ដែលជាមន្ត្រីនគរបាលបានរត់ចេញពីផ្ទះ និងបានដកកាំភ្លើ.ងខ្លីមួយដើមបាញ់ឡើងលើមួយគ្រាប់ ដើម្បីគំរា.មជនសង្ស័យ ធ្វើឲ្យជនសង្ស័យភ័យស្លន់ស្លោក៏ដួលម៉ូតូ ប៉ុន្តែជនសង្ស័យនៅតែព្យាយាមលើកម៉ូតូជិះរុញគ្នារត់គេចខ្លួនចេញពីកន្លែងកើតហេតុបាត់ស្រមោលតែម្ដង។
ក្រោយពេលកើត សមត្ថកិច្ចមូលដ្ឋានក៏បានចុះមកធ្វើការអន្តរាគមន៍ និងនាំខ្លួនជនរងគ្រោះទៅធ្វើការដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកល្អក់ទី៣ ដើម្បីអោយសមត្ថកិច្ចធ្វើការស្រាវជ្រាវតាមចាប់ជនសង្ស័យយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ