ចិន ៖ តាមប្រភពពី Metroឱ្យដឹងថា យុវជនអាយុ១៩ឆ្នាំម្នាក់មានអាការៈឈឺក្បាលមិនបាត់អស់ជាច្រើនឆ្នាំ ស្រាប់តែភ្ញាក់ផ្អើលថា ការឈឺក្បាលនោះ បណ្តាលមកពីសត្វតេនញ៉ាសំងំរស់ក្នុងខួរក្បាល ។
តេនញ៉ាប្រវែងជាង៤អ៊ីញ បានចូលក្នុងរាងកាយយុវជនឈ្មោះ Wen Xiaoli កាលពីពេល២ឆ្នាំមុន បន្ទាប់ពីគាត់មុតដៃ ខណៈពេលកំពុងសម្លាប់សត្វកង្កែប ។ តេនញ៉ាបានវារពីកន្លែងមុតនោះ ទៅកាន់ខួរក្បាលរបស់គាត់ ហើយរស់នៅក្នុងទីនោះ អស់ពេលជាងពីរឆ្នាំមកហើយ ។
Wen មានអាការៈកាន់តែធ្ងន់ធ្ងរ ដែលធ្វើឲ្យគាត់ទៅជួបជាមួយនឹងគ្រូពេទ្យដើម្បីទទួលការព្យាបាល។ នៅពេលធ្វើការថត CT Scan គេឃើញមានសត្វតេនញ៉ានៅក្នុងខួរក្បាលរបស់ Wen។
លោកវេជ្ជបណ្ឌិតវះកាត់ប្រព័ន្ធប្រសាទ Yang Zhiquan បានមានប្រសាសន៍ថា៖ «វានៅរស់ ហើយកំពុងតែកំរើកចុះឡើងនៅក្នុងខួរក្បាលរបស់ Wen។ ពួកយើងបានយកវាចេញទាំងនៅរស់ ព្រោះថាបើហ៊ានតែបែកនោះគឺប្រាកដជាអាចមានកូនចៅតទៀតនៅក្នុងខួរក្បាលហើយ» ។
លោកវេជ្ជបណ្ឌិតបន្តទៀតថា «ការបង្ករោគដោយសត្វល្អិត ពិតជាមិនសូវមានទេ តែវាអាចនឹងទៅរស់នៅក្នុងខួរក្បាល ហើយយកខួរក្បាលធ្វើជាចំណីអាហាររបស់វា។ ជាមួយគ្នានេះដែរ វានឹងបញ្ចេញសារធាតុដែលធ្វើឲ្យខួរក្បាលរលាក និងខូចខាតដល់សរសៃប្រសាទទៀតផង។ វាអាចបង្កជាអាការៈឆ្កួតជ្រូង ពិការ និងការបាត់បង់សមត្ថភាពក្នុងការចងចាំ និងនិយាយស្តី» ។ វាពិតជាសំណាងណាស់ ដែលលោក Wen បានធូរស្បើយជាលំដាប់ ។
ចែករំលែកព័តមាននេះ