រាជធានីភ្នំពេញ ៖ បើតាមក្រុមសាច់ញាតិបុរសដែលបង្កសោកនាដកម្ម ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ នៅចំណុចមុខអតីតរោងចក្រកាត់ដេរ គួង ហុង លើវិថីព្រះមុនីវង្ស ដែលធ្វើឱ្យមនុស្សស្លាប់៣នាក់ និងរបួសធ្ងន់-ស្រាល៧នាក់នោះ បានឱ្យកោះសន្តិភាពដឹង នៅព្រឹកថ្ងៃទី០៣ មេសា នេះថា បុរសរងគ្រោះ(ជនបង្ក)ដឹងខ្លួនហើយ និងមានអាការៈរាងធូរស្បើយបន្តិច ហើយគ្រូពេទ្យបានដោះអុកហ្ស៊ីសែនចេញ ដោយគាត់អាចពិសារបបរបាន ។
ប្រភពបន្តថា ប៉ុន្តែការដឹងខ្លួនរបស់ជនបង្កខាងលើ គឺមានស្ថានភាពប្លែក ដោយគាត់នៅតែរវើរវាយខ្លាំង និងនិយាយស្តីតែម្នាក់ឯង ទៀត ដែលតម្រូវឱ្យក្រុមគ្រូពេទ្យត្រូវតែតាមដាន និងពិនិត្យជំងឺជាបន្តទៀតនៅក្នុងមន្ទីរពេទ្យខ្មែរ-សូវៀត (ហៅរុស្ស៊ី) ដដែល ។ ហើយក៏មិនដឹងថា ជនបង្កនោះ អាចចេញពីមន្ទីរពេទ្យនៅពេលណានោះទេ ខណៈនៅមុខបន្ទប់សង្គ្រោះមានកម្លាំងនគរបាលចរាចរណ៍ បានយាមយ៉ាងតឹងរឹងបំផុត ។
បុរសបង្កខាងលើឈ្មោះមាស សុខហេង អាយុ៣០ឆ្នាំ ជាលក់ទូរស័ព្ទ ស្នាក់នៅផ្ទះលេខ១១១ ផ្លូវជាតិលេខ២ ភូមិទួលរការ ក្នុងសង្កាត់ចាក់អង្រែក្រោម ខណ្ឌមានជ័យ បើករថយន្តម៉ាកកាមរីឆ្លាម ពណ៌ទឹកមាស ពាក់ផ្លាកលេខភ្នំពេញ២M-២២៤៥ ។ ក្នុងហេតុការណ៍គ្រោះថ្នាក់ចរាចរណ៍នេះ បានបង្កឱ្យមានកំហឹងពីមហាជន នាំគ្នាវាយកម្ទេចរថយន្ត និងវាយដំអ្នកបើករងរបួសយ៉ាងធ្ងន់ធ្ងរ ហើយត្រូវបានសមត្ថកិច្ចធ្វើអន្តរាគមន៍រួចបញ្ជូនទៅកាន់មន្ទីរពេទ្យមិត្តភាពខ្មែរ-សូវៀត (ពេទ្យរុស្សី) បើកុំសមត្ថកិច្ចជួយទាន់សង្ស័យមិនរស់ទេ ។
កាលពីម៉ោង០៣រសៀលថ្ងៃទី២៩ មីនា កន្លងមក ជនបង្ក គឺកំពុងស្ថិតក្នុងបន្ទប់សង្គ្រោះបន្ទាន់ (ជាន់ទី២) នៅក្នុងមន្ទីរពេទ្យខ្មែរ-សូវៀតដដែល ដោយគេឃើញមានការយាមនៅមុខបន្ទប់យ៉ាងតឹងរឹងពីសំណាក់កម្លាំងមន្ត្រីប៉ូលិសចរាចរណ៍ផ្លូវគោករាជធានីភ្នំពេញ ដែលមិនអនុញ្ញាតឱ្យអ្នកណាម្នាក់អាចទៅជិតឡើយ ។
បើតាមគ្រូពេទ្យឱ្យដឹងថា សភាពអ្នកជំងឺ គឺធ្ងន់ធ្ងរខ្លាំងណាស់ ដោយអត់ដឹងខ្លួននោះទេ តាំងពីថ្ងៃដែលបញ្ជូនមកសង្គ្រោះនោះ ។ អ្នកជំងឺត្រូវបានដាក់អ៊ុកហ្ស៊ីហ្សែនតាមមាត់ជាប់ជានិច្ច ។ ទោះបីជាយ៉ាងណា ក្រុមគ្រូពេទ្យនឹងធ្វើការតាមដានបន្តទៀត តែមិនដឹងថា អាចដឹងខ្លួននៅពេលណាទេ ។
កាលពីថ្ងៃទី៣០ មីនា ថា ពាក់ព័ន្ធលើករណីសោកនាដកម្មក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើ គឺត្រូវបានកសាងសំណុំរឿងបញ្ជូនទៅតុលាការហើយ ។ជនរងគ្រោះសរុបទាំងអស់ គឺមានចំនួន១០នាក់ ដែល៣នាក់បានស្លាប់ភ្លាមៗនៅនឹងកន្លែង ។ ហើយអ្នករងរបួសធ្ងន់មានចំនួន៦នាក់ និងស្រាល១នាក់ ។ ក្នុងនោះ ជនរងគ្រោះចំនួន៦នាក់ (មានអ្នកស្លាប់៣ និងរបួសធ្ងន់៣) បានដាក់ពាក្យបណ្តឹងទៅសមត្ថកិច្ចជាផ្លូវការ ដើម្បីទាមទារឱ្យភាគីបង្កទទួលខុសត្រូវ ក្នុងសំណងរដ្ឋប្បវេណី ។ ដោយឡែក ជនរងគ្រោះ៤នាក់ទៀត គឺសុំមិនប្តឹងជនបង្កនោះទេ ដោយគេយល់ថា ជនបង្កនោះ មានស្ថានភាពធ្ងន់ធ្ងរពេកទៅហើយ ដោយពួកគេសុំត្រឹមតែម៉ូតូពីសមត្ថកិច្ចវិញតែប៉ុណ្ណោះ ដើម្បីយកទៅជួសជុលប្រើប្រាស់បានវិញ ។ ជនរងគ្រោះ៤នាក់ ដែលអត់ប្តឹងនេះ ក៏មានអ្នករបួសធ្ងន់ដែរ។
គួររំលឹកថា មុនពេលកើតហេតុគ្រោះថ្នាក់នៅយប់ថ្ងៃទី២៧ មីនា កន្លងមក បុរសបង្កខាងលើបានបើករថយន្តរបស់ខ្លួនតែម្នាក់ឯង ក្នុងទិសដៅពីជើងទៅត្បូងតាមផ្លូវធម្មតា ។ លុះមកដល់ចំណុចហាងលក់ម៉ូតូហុងដាមួយកន្លែង ដែលមានទីតាំងនៅក្បែរកន្លែងកើតហេតុនោះ ក៏បានបើករថយន្តទៅប៉ះជាមួយនឹងរថយន្តមួយគ្រឿង ហើយក៏ព្យាយាមបើកគេចខ្លួន ។
លុះបើករត់គេចមកដល់ចំណុចកើតហេតុ ដោយសារផ្លូវមានសភាពចង្អៀត ហើយឃើញផ្លូវបញ្ច្រាសទំនងជាទូលាយ អាចបើកគេចបាន ទើបបុរសរូបនោះ ក៏បានបើករថយន្តឆ្លងទៅម្ខាង ដែលជាផ្លូវបញ្ច្រាសទិសក្នុងបំណងព្យាយាមបើកគេចខ្លួនក្នុងល្បឿនយ៉ាងលឿន ក៏បានជ្រុលទៅបុករះម៉ូតូជាច្រើនគ្រឿង និងមនុស្សជាច្រើននាក់បណ្តាលឱ្យស្លាប់ និងរងរបួសរដូករណែលពេញផ្លូវតែម្តង ។
ភ្លាមៗនោះ រថយន្តនិងអ្នកបើកបរ ត្រូវបានក្រុមអ្នកធ្វើចរាចរណ៍មិនដឹងអ្នកណាខ្លះទេ យ៉ាងច្រើននាំគ្នាធ្វើការឡោមព័ទ្ធដេញចាប់ឃាត់បាន ដោយអ្នកខ្លះបាននាំគ្នាចោមរោមវាយដំទៅលើអ្នកបើកបររូបនោះ ដូចទឹកបាក់ទំនប់ បណ្តាលឱ្យរងរបួសយ៉ាងធ្ងន់ធ្ងរហើយ កុំតែមានការរារាំងអំពីសំណាក់កម្លាំង ។
ចែករំលែកព័តមាននេះ