រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនស៊ីវិលមួយក្រុម បានធ្វើសកម្មភាពឃាត់ខ្លួនបុរសម្នាក់ ដោយបានវា.យខ្នោះ រួចបញ្ជូនទៅសួនកុមារវត្តភ្នំ ដើម្បីពិនិត្យទឹកនោម រហូតបង្កឱ្យមានការភ្ញាក់ផ្អើលដល់គណៈបញ្ជាការឯកភាពខណ្ឌដូនពេញ ចុះទៅធ្វើការឃាត់ខ្លួនមនុស្សចំនួន២នាក់ ក្នុងចំណោមជនស៊ីវិលមួយក្រុមខាងលើ យកមកសាកសួរ កាលពីវេលាម៉ោង៩និង១០នាទីយប់ ថ្ងៃទី២១ ខែតុលា ឆ្នាំ២០២២ នៅចំណុចសួនកុមារវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ។
យោងតាមប្រភពព័ត៌មានបានអោយដឹងថា នៅមុនពេលកើតហេតុ មានបុរសម្នាក់កំពុងតែជិះម៉ូតូនិច ពណ៌ក្រហមខ្មៅ ចេញពីផ្ទះ ដើម្បីយកអំបុកជាមួយនឹងចេកទៅអោយឪពុកនៅម្តុំជិតផ្សាររាត្រី លុះពេលមកដល់ចំណុចកើតហេតុ ក៏មានជនស៊ីវិលមួយក្រុមធ្វើសកម្មភាពឃាត់ខ្លួនគាត់ (បុរសដែលយកអំបុកទៅឪពុក) ដោយចាប់វា.យខ្នោះ រួចញាត់ចូលរថយន្ត និងនាំយកទៅម្តុំសួនកុមារវត្តភ្នំ ដើម្បីធ្វើការពិនិត្យទឹកនោមទៅលើរូបគាត់ (បុរសយកអំបុកទៅឪពុក) បន្ទាប់ពីពិនិត្យរួច ជាលទ្ធផលពុំមានសារធាតុញៀ.ន ឬបញ្ហាអ្វីនោះទេ ទើបក្រុមជនស៊ីវិលនោះ បានដោះលែងបុរសរងគ្រោះអោយត្រឡប់ទៅវិញ។
ប្រភពដដែលបន្តថា ប៉ុន្តែជនរងគ្រោះខាងលើមិនសុខចិត្ត ក៏បានប្តឹងទៅខាងសាលាខណ្ឌដូនពេញ ទើបសាលាខណ្ឌដូនពេញ បានដាក់កម្លាំងគណៈបញ្ជាការឯកភាពខណ្ឌដូនពេញ ចុះទៅកាន់ទីតាំងកើតហេតុ រួចធ្វើការឃាត់បុរស២នាក់ ក្នុងចំណោមជនស៊ីវិលមួយក្រុមខាងលើ ដែលម្នាក់ស្លៀកពាក់ស៊ីវិល និងម្នាក់ស្លៀកពាក់ឯកសណ្ឋាន ជាបណ្តោះអាសន្នសិន ដើម្បីរង់ចាំមន្ត្រីជំនាញចុះមកធ្វើការសាកសួរ។
សូមបញ្ជាក់ថា នៅពេលឃាត់ខ្លួនបុរសរងគ្រោះខាងលើ ហើយក្រុមជនស៊ីវិលបានដកហូតសម្ភារៈនៅលើខ្លួនជនរងគ្រោះ ដើម្បីពិនិត្យទឹកនោម ដោយមិនឃើញមានអ្វីប្លែក ទើបប្រគល់ទ្រព្យសម្បត្តិ និងទូរស័ព្ទទៅឱ្យបុរសរងគ្រោះវិញ។
ក្រោយពេលបញ្ជូនក្រុមជនស៊ីវិលទៅកាន់ប៉ុស្តិ៍នគរបាលរដ្ឋបាលវត្តភ្នំ ធ្វើការសាកសួរ ទើបដឹងថា ក្រុមជនស៊ីវិលខាងលើ គឺជាកម្លាំងមន្ទីរប្រឆាំងគ្រឿងញៀ.ន (ក៣)។ ចំណែកជនរងគ្រោះវិញ ក៏បានសំណូមពរអោយសមត្ថកិច្ចជួយរកយុត្តិធម៌ដល់រូបខ្លួនផង ព្រោះគេឧស្សាហ៍ឃើញមានក្រុមជនស៊ីវិលចេះតែដើរធ្វើការឃាត់ខ្លួនមនុស្សបែបនេះពាសវាលពាសកាល គឺមានជាញឹកញាប់ក្នុងពេលបច្ចុប្បន្ន ដូចជាករណីមួយនេះផងដែរ។
បន្ទាប់ពីសមត្ថកិច្ចខណ្ឌដូនពេញ បានធ្វើការសួរនាំរួច ពួកគាត់ឆ្លើយប្រាប់ថា ជាកម្លាំងមន្ទីរប្រឆាំងគ្រឿងញៀ.ន (ក៣) អញ្ចឹងហើយសមត្ថកិច្ចខណ្ឌក៏បានប្រាប់ពួកគាត់ថា បើលើកក្រោយចង់ចុះមកចាប់មនុស្សនៅខណ្ឌដូនពេញ ត្រូវរាយការណ៍ប្រាប់លោកអធិការខណ្ឌ ដើម្បីលោកធ្វើការរាយការណ៍បន្តទៅលោកអភិបាលខណ្ឌដូនពេញ កុំមានអញ្ចឹងកើតឡើង ទៀត។
ក្រោយពេលកើតហេតុ កម្លាំងទាំង២នាក់នេះ ក៏ត្រឡប់ទៅកាន់មន្ទីរប្រឆាំងគ្រឿងញៀ.ន (ក៣) វិញ ដោយលើកក្រោយកុំមានរឿងបែបនឹងទៀត៕
ចែករំលែកព័តមាននេះ