សមាជបក្សកុម្មុនិស្តចិនដែលធ្វើឡើងរៀងរាល់៥ឆ្នាំម្តងបានបិទបញ្ចប់ នៅថ្ងៃសៅរ៍ ទី២២ តុលានេះ ដោយប្រធានាធិបតី Xi Jinping ត្រូវកាន់តំណែងជាមេដឹកនាំសម្រាប់អាណត្តិទី៣ ។ នៅចុងបញ្ចប់នៃសមាជដែលមានរយៈពេល១សប្តាហ៍…
សមាជបក្សកុម្មុនិស្តចិនដែលធ្វើឡើងរៀងរាល់៥ឆ្នាំម្តងបានបិទបញ្ចប់ នៅថ្ងៃសៅរ៍ ទី២២ តុលានេះ ដោយប្រធានាធិបតី Xi Jinping ត្រូវកាន់តំណែងជាមេដឹកនាំសម្រាប់អាណត្តិទី៣ ។
នៅចុងបញ្ចប់នៃសមាជដែលមានរយៈពេល១សប្តាហ៍ បក្សកុម្មុយនិស្តបានអនុម័តការរុះរើមួយចំនួនលើមន្ត្រីជាន់ខ្ពស់ជាច្រើននាក់ រួមមាននាយករដ្ឋមន្ត្រី Li Keqiang ត្រូវចុះចេញពីតំណែង ដើម្បីអនុញ្ញាតឱ្យប្រធានាធិបតី Xi Jinping តែងតាំងនាយករដ្ឋមន្ត្រីថ្មី។
លោក Xi Jinping បានថ្លែងសុន្ទរកថា នៅក្នុងព្រឹត្តិការណ៍រយៈពេលមួយសប្តាហ៍ដែលធ្វើឡើងនៅមហាសាលប្រជាជន ស្ថិតក្នុងទីក្រុងប៉េកាំង ។
លោកបានថ្លែងថា «ហ៊ានតស៊ូ ហ៊ានឈ្នះ មិនអើពើនឹងបញ្ហា និងខំប្រឹងប្រែងធ្វើការ។ ត្រូវតាំងចិត្តដើម្បីបន្តដំណើរទៅមុខ» ។ សុន្ទរកថារបស់លោកបានបញ្ចប់កិច្ចប្រជុំដែលមានគណៈប្រតិភូបក្សចំនួន២.៣០០នាក់ ដែលត្រូវបានជ្រើសរើស ដើម្បីធ្វើការអនុម័តការរុះរើថ្នាក់ដឹកនាំបក្ស។
មន្ត្រីជាន់ខ្ពស់បក្សប្រហែល២០០នាក់នៃគណៈកម្មធិការមជ្ឍឹមថ្មីត្រូវបានជ្រើសរើសនៅថ្ងៃសៅរ៍នេះ។
ភ្លាមៗបន្ទាប់ពីសមាជត្រូវបានបិទបញ្ចប់ សារព័ត៌មានរដ្ឋ Xinhua បានចេញផ្សាយឈ្មោះសមាជិកនៃគណៈកម្មាធិការកណ្តាលថ្មី។
ឈ្មោះមន្ត្រីជាន់ខ្ពស់ចំនួន ៤បាត់ពីបញ្ជីឈ្មោះ រួមមាននាយករដ្ឋមន្ត្រី Li Keqiang លោក Li Zhanshu ប្រធានសភាប្រជាជនជាតិ លោក Wang Yang ប្រធានសន្និសិទប្រឹក្សានយោបាយប្រជាជនចិន និងឧបនាយករដ្ឋមន្ត្រី Han Zheng៕ (យោងតាមប្រភព៖ CNA)
ចែករំលែកព័តមាននេះ