លោក ង៉ោ សុវណ្ណ ទាមទារឲ្យក្រុមហ៊ុន ផាន អ៊ីមិច ប្រញាប់ចេញមុខដោះស្រាយជាមួយពលរដ្ឋម្ចាស់ដី
ខេត្តកណ្តាល ៖ លោក ង៉ោ សុវណ្ណ ប្រធានគណៈពង្រឹងគណបក្សប្រជាជនកម្ពុជា ចុះជួយឃុំគគីរធំ និងឃុំសំរោងធំ ស្រុកកៀនស្វាយ ខេត្តកណ្តាល
ខេត្តកណ្តាល ៖ លោក ង៉ោ សុវណ្ណ ប្រធានគណៈពង្រឹងគណបក្សប្រជាជនកម្ពុជា ចុះជួយឃុំគគីរធំ និងឃុំសំរោងធំ ស្រុកកៀនស្វាយ ខេត្តកណ្តាល បានតម្រូវឲ្យក្រុមហ៊ុន ផាន អ៊ីមិច ប្រញាប់ចេញមុខដោះស្រាយជាមួយប្រជាពលរដ្ឋម្ចាស់ដី។ ពិធីជួបជុំគ្នាដើម្បរកដំណោះស្រាយវិវាទដីធ្លីរវាងប្រជាពលរដ្ឋជាមួយក្រុមហ៊ុន ផាន អ៊ីមិច នេះ បានប្រារព្វធ្វើឡើងនាព្រឹកថ្ងៃទី៣០ខែមីនា ឆ្នាំ២០១៧ នៅក្នុងបរិវេណវត្តចាស់ ហៅវត្តគគីរធំ ដោយមានការអញ្ជើញចូលរួមពីលោក ង៉ោ សុវណ្ណ ប្រធានគណៈពង្រឹង និងក្រុមការងារអាជ្ញាធរស្រុក ឃុំ ភូមិ តំណាងភាគី ក្រុមហ៊ុន ផាន អ៊ីមិច និងប្រជាពលរដ្ឋដែលជាម្ចាស់ដីនៅក្នុងភូមិពោធិ៍មៀវ ឃុំគគីរធំ ជាច្រើនផងដែរ។
ក្នុងពិធីជួបជុំពិភាក្សាគ្នារកដំណោះស្រាយរឿងវិវាទដីធ្លីនេះ ក៏មានប្រជាពលរដ្ឋមួយចំនួនបានឡើងបញ្ចេញមតិអះអាងថា ពួកគាត់សុទ្ធតែជាម្ចាស់ដីនៅចំណុចបឹងកូនប្រវឹក បឹងបៀរ៣ត ប្រឡាយប្រាំរយ អូរអំបោស អូរសង្កត់ក ផ្លូវបំបែកកូនក្អែក អូរឈូកដែលបានរុករានដាំពោត ល្ង សណ្តែក កក់ ដាំក្រចៅ ស្រូវ តាំងពីឆ្នាំបែកហើយដោយ ខ្លះមានទំហំកន្លះអា កៅសិបអា មួយហិកតា ពីរហិកតា បីហិកតា និងរហូតដល់បួនហិកតាខាងលិច ខាងកើត ខាងជើង ខាងត្បូងមានព្រំច្បាស់លាស់ ហើយត្រូវក្រុមហ៊ុន ផាន អ៊ីមិច រំលោភយកតាំងពីឆ្នាំ១៩៩៥ ខណៈពួកគាត់ដែលជាម្ចាស់ដីពិតប្រាកដមិនទាន់បានដំណោះស្រាយពីក្រុមហ៊ុន។
ហើយពលរដ្ឋខ្លះទៀតរស់នៅក្នុងភូមិពោធិ៍មៀវ ឃុំគគីរធំ នេះដែរក៏បានឡើងអះអាងថា ពួកគាត់ត្រូវក្រុមហ៊ុនចុះវាស់វែងតាំងពីឆ្នាំ១៩៩៥ តែមិនទាន់ឲ្យលុយគ្រប់ ហើយខ្លះទទួលបានតែលុយកក់ប៉ុណ្ណោះតាំងពីឆ្នាំ១៩៩៥ដូចគ្នា។ ពលរដ្ឋលើកឡើងទៀតថា តាំងពីពេលនោះមកក៏ស្ងាត់ ហើយក្រុមហ៊ុនក៏បានជួលដីខាងលើឲ្យពលរដ្ឋមួយចំនួន ធ្វើស្រូវលុះចូលដល់ឆ្នាំ២០១៧ នេះស្រាប់តែខាងក្រុមហ៊នដាក់គ្រឿងចក្រ២-៣គ្រឿង មកធ្វើសកម្មភាពឈូសឆាយ លើកទំនប់ឡោមព័ទ្ធលើដីពួកគាត់មិនទាន់បានលក់ និងខ្លះមិនទាន់បានទូទាត់ឲ្យលុយគ្រប់ចំនួន ទើបពួកគាត់នាំគ្នាដាក់ពាក្យបណ្តឹងចូលទៅរដ្ឋបាលឃុំ ស្រុកកៀនស្វាយ រយៈពេលជាងមួយខែ ហើយមិនទាន់មានដំណោះស្រាយ តែគ្រឿងចក្រក្រុមហ៊ុននៅតែបន្តសកម្មភាពឈូសឆាយលើដីរបស់គាត់។
ទោះបីពួកគាត់នាំទៅឃាត់ក៏ក្រុមហ៊ុននេះនៅតែលួចបន្តសកម្មភាពដដែល រហូតព័ត៌មាននេះដឹងដល់លោក ង៉ោ សុវណ្ណ ប្រធានគណៈពង្រឹងឃុំក៏ណាត់ជួបជាមួយតំណាងភាគីក្រុមហ៊ុនចុះមកសម្របសម្រួលនាព្រឹកនេះតែម្តង។ លោក សុខ ពិសិទ្ធ អភិបាលរងស្រុកកៀនស្វាយបានឲ្យដឹងថា រហូតមកដល់ពេលនេះ គឺអាជ្ញាធរស្រុកបានទទួលពាក្យបណ្តឹងរបស់ពលរដ្ឋដែលប្តឹងក្រុមហ៊ុន ផាន អ៊ីមិច រំលោភបំពានយកដីនោះចំនួន៣៥គ្រួសារ ដែលមានផ្ទៃដីសរុបប្រហែល៥៧ហិកតា ក្នុងនោះនៅចំណុចបៀរ៣តមាន៩បណ្តឹង ចំណុចប្រឡាយប្រាំរយ៥បណ្តឹង ចំណុចបឹងកូនប្រវឹក៣បណ្តឹង ចំណុចផ្លូវបំបែក១១បណ្តឹង ចំណុចកូនក្អែកបណ្តឹង អូសង្កត់ក១បណ្តឹង អូរឈូក១បណ្តឹង អូរអំបោស១បណ្តឹង។
លោកអភិបាលរងស្រុកបន្តថា ស្រុកកៀនស្វាយគឺជាស្រុកមួយដែលសម្បូររឿងទំនាស់ដីធ្លីច្រើនជាងគេក្នុងចំណោមស្រុកទាំងអស់ក្នុងខេត្តកណ្តាល ហេតុដូច្នេះហើយទើបដំណោះស្រាយជូនពលរដ្ឋមានការយីតយ៉ាវបន្តិច។ លោកអភិបាលរងក៏បានប្រាប់ឲ្យពលរដ្ឋដែលមានដីពាក់ពន្ធ័ជាមួយក្រុមហ៊ុនមិនទាន់បានទៅដាក់ពាក្យបណ្តឹងសូមបន្តនាំគ្នាទៅដាក់ឲ្យបានគ្រប់ៗគ្នា ដើម្បីស្រុកពិនិត្យមើលតាមឯកសាររួចឲ្យបងប្អូនចុះទៅបង្ហាញទីតាំងដីពិតប្រាកដ។ លោក ចាន់ ធូ មេឃុំគគីរធំក៏សូមឲ្យបងប្អូនពលរដ្ឋដែលមានដីពាក់ព័ន្ធពិតប្រាកដ ចាំដាក់ពាក្យប្តឹងមកងាយស្រួលអាជ្ញាធរមូលដ្ឋានឲ្យភាគីក្រុមហ៊ុនដោះស្រាយជូន។ ចំណែកលោក ប្រាក់ សុផល តំណាងក្រុមហ៊ុន ផាន អ៊ីមិច និយាយថា ក្រុមហ៊នធ្វើនេះគឺផ្អែកទៅតាមឯកសារ និងតែងតែសហការណ៍ជាមួយអាជ្ញាធរជានិច្ច ហើយរូបលោកនៅប្រចាំការដោះស្រាយជូនបងប្អូនរហូត។
ក្នុងឱកាសនោះដែរលោក ង៉ោ សុវណ្ណ ក្នុងនាមប្រធានគណៈពង្រឹង ឃុំដែលតែងតែយកចិត្តទុកដាក់ដឹកនាំក្រុមការងារចុះជួយដោះស្រាយរាល់ទុក្ខកង្វល់របស់ពលរដ្ឋដោយមិនប្រកាន់និន្នាការនយោបាយក៏បានឲ្យខាងក្រុមហ៊ុនផ្អាកសកម្មភាពឈូសឆាយសិនទៅ រង់ចាំដោះស្រាយជូនពលរដ្ឋឲ្យចប់រឿងដើម្បីកុំឲ្យមានបញ្ហាកើតឡើង។ តែទោះយ៉ាងណាលោក ង៉ោ សុវណ្ណ ក៏សុំកុំឲ្យបងប្អូនពលរដ្ឋយើងធ្វើអ្វីឲ្យខុសពីច្បាប់ ទៅប្រើអំពើហិង្សាដុតគ្រឿងចក្ររបស់ក្រុមហ៊ុននាំឲ្យមានទោសត្រូវរក្សាភាពថ្លៃថ្នូរ រកវិធីដោះស្រាយគ្នាតាមផ្លូវច្បាប់។
លោកប្រធានគណៈពង្រឹងបន្តទៀតថា ធម្មតាទេប្រទេសមានសុខសន្តិភាពវាតែងតែមានការអភិវឌ្ឍន៍ ប៉ុន្តែការអភិវឌ្ឍន៍ដើម្បីភាពរីកចម្រើនរបស់ប្រជាពលរដ្ឋ បើសិនការអភិវឌ្ឍន៍ប៉ះពាល់ដល់ការរស់នៅរបស់ពលរដ្ឋក្នុងនាមគណៈពង្រឹងគណបក្សប្រជាជនកម្ពុជា ត្រូវចុះមកដោះស្រាយជូនពួកគាត់ព្រោះ ពួកគាត់ជាពលរដ្ធខ្មែរ។ ដើម្បីងាយស្រួលក្នុងរកដំណោះស្រាយលោក ង៉ោ សុវណ្ណ ក៏បានឲ្យបងប្អូនពលរដ្ឋដែលមានវិវាទដី២ករណីជាមួយក្រុមហ៊ុន ផាន អ៊ីមិច ដែលករណីទិញលក់មិនទាន់បានសម្រេច និងករណីមិនទាន់បានលក់ សូមចុះឈ្មោះជាមួយអាជ្ញាធរស្រុក ឃុំនៅកន្លែងនេះដដែល នៅថ្ងៃសៅរទី១ ខែមេសា ខានស្អែកនេះ៕
ចែករំលែកព័តមាននេះ