ប្រកាសឱ្យពលរដ្ឋផ្អាកបរិភោគត្រីងាប់ក្នុងស្ទឹង
ខេត្តព្រះវិហារ ៖ មន្ទីរបរិស្ថានបានអំពាវនាវដល់ពលរដ្ឋនៅតាមបណ្តោយស្ទឹងសែន ក្នុងស្រុកជ័យសែនឱ្យផ្អាកការប្រើប្រាស់ទឹកស្ទឹង និងកុំយកត្រីដែលងាប់ក្នុងស្ទឹងទៅ
ខេត្តព្រះវិហារ ៖ មន្ទីរបរិស្ថានបានអំពាវនាវដល់ពលរដ្ឋនៅតាមបណ្តោយស្ទឹងសែន ក្នុងស្រុកជ័យសែនឱ្យផ្អាកការប្រើប្រាស់ទឹកស្ទឹង និងកុំយកត្រីដែលងាប់ក្នុងស្ទឹងទៅបរិភោគ ឬយកទៅលក់បន្តដែលអាចប៉ះពាល់ដល់សុខភាពឬអាយុជីវិត ។ មន្ទីរបរិស្ថានខេត្តថ្លែងបញ្ជាក់ថា បានជាមានការប្រកាសឱ្យផ្អាកការប្រើទឹកនិងបរិភោគត្រីដែលងាប់អណ្តែតក្នុងទឹកស្ទឹងនេះ ព្រោះរយៈពេលប្រមាណជិត១០ថ្ងៃកន្លងទៅនេះ បង្កឱ្យត្រីជាច្រើនប្រភេទទាំងតូចទាំងធំបានងាប់ដោយសារតែការពុលទឹកស្ទឹង ដែលការពុលនោះនៅមិនទាន់ដឹងមូលហេតុច្បាស់លាស់ថា បណ្តាលមកពីអ្វីឲ្យប្រាកដនៅឡើយទេ ។
នៅព្រឹកថ្ងៃទី២៨ មីនា លោក អៀ សុខា ប្រធានមន្ទីរបរិស្ថានខេត្ត បានប្រាប់អ្នកសារព័ត៌មានតាមទូរស័ព្ទថា ករណីត្រីពុលងាប់ជាច្រើននៅក្នុងទឹកស្ទឹងសែន ស្ថិតនៅក្នុងស្រុកជ័យសែននោះបានកើតឡើងប្រមាណជិត១០ថ្ងៃមកហើយ តែមិនទាន់ដឹងពីមូលហេតុច្បាស់លាស់ថាតើត្រីដែលងាប់នោះ ពុលដោយសារអ្វីឱ្យច្បាស់លាស់នោះទេ ។ ហើយមកដល់ពេលនេះ មន្ទីរបរិស្ថានខេត្តបានចុះទៅពិនិត្យកន្លែងកើតហេតុ និងបានយកទឹកស្ទឹងដែលមានការពុលងាប់ត្រីនោះទៅមណ្ឌលពិសោធន៍នៅក្រសួងបរិស្ថានហើយ ប៉ុន្តែមិនទាន់ដឹងលទ្ធផលត្រឡប់មកវិញទេ ។ ដូច្នេះលោកសូមអំពាវនាវដល់ប្រជាពលរដ្ឋក្នុងមូលដ្ឋានដែលរស់នៅក្បែរឬជាប់មាត់ស្ទឹងសែនឲ្យផ្អាកប្រើប្រាស់ទឹកនោះ និងបរិភោគសាច់ត្រីដែលងាប់ ឬយកទៅលក់ដូរបន្តនៅលើទីផ្សារមួយរយៈសិន ព្រោះវាអាចធ្វើឲ្យប៉ះពាល់ដល់សុខភាព ឬអាយុជីវិតរបស់អ្នកបរិភោគជាយថាហេតុទៀតផង ។
លោកបានសុំឱ្យពលរដ្ឋងាកមកប្រើប្រាស់ទឹកអណ្តូងជាបណ្តោះអាសន្នសិន រង់ចាំមន្ត្រីជំនាញផ្តល់ដំណឹងពីលទ្ធផលនៃការពិសោធនោះ ថាអាចប្រើប្រាស់បានវិញ ឬមិនបាននៅពេលឆាប់ៗខាងមុខនេះ ។ ជាមួយនឹងការអំពាវនាវនេះ លោក អៀ សុខា បានបន្ថែមថា បន្ទាប់ពីកើតហេតុភ្លាម ប្រជាពលរដ្ឋបានយកត្រីដែលងាប់នោះទៅលក់ដូរក៏ដូចជាធ្វើម្ហូបសម្រាប់បរិភោគមួយចំនួន និងបានធ្វើឲ្យមានអាការពុល តែមិនបណ្តាលឲ្យមនុស្សណាម្នាក់គ្រោះថ្នាក់ដល់អាយុជីវិតទេ ។
ដោយឡែកលោក ជុំ ពុយ អភិបាលស្រុកជ័យសែន បានអះអាងថា ការពុលនេះតែងតែ កើតមានជារៀងរាល់ឆ្នាំ ព្រោះកាលពីឆ្នាំ២០១៦ក៏មានករណីដូចគ្នានេះដែរ នៅពេលដែលទឹកភ្លៀងកក់ខែបានធ្លាក់មកធ្វើឲ្យទឹកបានហូរចូលទៅក្នុងស្ទឹងក៏បណ្តាលឲ្យមានពុលត្រីបែបនេះ ។ តែទោះជាយ៉ាងណាក៏ដោយ មិនទាន់សន្និដ្ឋានច្បាស់លាស់នៅឡើយទេ ដោយរង់ចាំលទ្ធផលពិសោធន៍ពីក្រសួងបរិស្ថាន ទើបដឹងច្បាស់ថាវាបណ្តាលមកពីអ្វី ។
ជាមួយគ្នានេះដែរអ្នកស្រី ដែក សុខខេន ជាពលរដ្ឋរស់នៅភូមិគោក ឃុំស្អាង ស្រុកជ័យសែន ខេត្តព្រះវិហារ បានឲ្យដឹងថា ត្រីរាប់សិបគីឡូក្រាមមានប្រភេទត្រី សណ្តាយ ត្រីរៀល ត្រីឆ្លាំង និងត្រីតូចធំជាច្រើនប្រភេទទៀត បានងាប់ ហើយអ្នកស្រុកនៅទីនោះក៏ដូចជារូបអ្នកស្រីផងដែរក៏បានទៅរើសយកត្រីពីក្នុងទឹកនោះមកចម្អិនធ្វើម្ហូប អ្នកខ្លះបានយកទៅធ្វើប្រហុក ផ្អកជាច្រើនធុងជាច្រើនការុង ។ ស្ត្រីរូបនេះបន្តថា នៅពេលបរិភោគត្រីនោះហើយ រូបអ្នកស្រីក៏ដូចជាក្រុមគ្រួសារ ចេះតែមិនស្រួលក្នុងខ្លួនអស់កម្លាំង ញ័រខ្លួនប្រាណ អ្នកខ្លះរាករូស អ្នកខ្លះពុលក្អួតចង្អោរជាដើម តែមិនធ្ងន់ធ្ងរទេ ។
ចំណែកស្ត្រី លេង ក្រឹម រស់នៅឃុំស្អាង ស្រុកជ័យសែនបាននិយាយថា បងប្អូនរបស់គាត់ បានទៅរើសត្រីដែលងាប់ក្នុងស្ទឹង បានយកមកចែកឲ្យបងប្អូនហូប បានមួយសន្ទុះ ស្រាប់តែម្នាក់ៗមានអាការៈញ័រខ្លួនតែម្តងដើរមិនរួច តែមួយសន្ទុះក្រោយមក ទើបស្រួលខ្លួនដូចធម្មតាវិញ ។
សូមបញ្ជាក់ថា ការពុលត្រីរាប់ម៉ឺនក្បាលដែលងាប់នោះស្ថិតនៅក្នុងទឹកស្ទឹងសែន ចំណុចអូរព្រៀល ស្ថិតក្នុងស្រុកជ័យសែន រហូតមកដល់ភូមិដូនម៉ា ឃុំរក្សា ស្រុករវៀង ខេត្តព្រះវិហារ រយៈពេលជិត១០ថ្ងៃហើយ លុះមកដល់ថ្ងៃទី២៨ មីនា មន្ត្រីបរិស្ថានបានបញ្ជាក់ថា លែងមានត្រីពុលងាប់ទៀតហើយ ៕
ចែករំលែកព័តមាននេះ