រាជធានីភ្នំពេញ ៖ សិស្ស-និស្សិត ២៦៧០នាក់ ចូលរួមបោះជំរំអន្តរជាតិនៅកម្ពុជាលើកទី៧អង្គការសម្ព័ន្ធយុវជនអន្តរជាតិ (IYF) បានសហការជាមួយ ក្រសួងអប់រំ យុវជន និងកីឡា និងសាកលវិទ្យាល័យ ប៊ែលធី អន្តរជាតិ ក្នុងការរៀបចំការបោះជំរំអន្តរជាតិ
រាជធានីភ្នំពេញ ៖ សិស្ស-និស្សិត ២៦៧០នាក់ ចូលរួមបោះជំរំអន្តរជាតិនៅកម្ពុជាលើកទី៧អង្គការសម្ព័ន្ធយុវជនអន្តរជាតិ (IYF) បានសហការជាមួយ ក្រសួងអប់រំ យុវជន និងកីឡា និងសាកលវិទ្យាល័យ ប៊ែលធី អន្តរជាតិ ក្នុងការរៀបចំការបោះជំរំអន្តរជាតិ លើកទី៧ (World Camp) នៅកម្ពុជា ដោយមានការចូលរួមពីសិស្ស-និស្សិត ចំនួន ២៦៧០នាក់ ក្នុងនោះសិស្ស-និស្សិតប៊ែលធី ចំនួន១.២៧០នាក់ ។
ការបោះជំរំនេះ រៀបចំធ្វើឡើងនៅសាលមហោស្រពកោះពេជ្រ រយៈពេល៣ថ្ងៃ គឺចាប់ពីថ្ងៃទី២៧ ដល់ ២៩ មីនា ២០១៧ ក្រោមប្រធានបទ «ការអប់រំចិត្តយុវជនឲ្យមានភាព ជាអ្នកដឹកនាំប្រកបដោយសីលធម៌ និងគុណធម៌» ។ នេះគឺក្នុងគោលបំណង ឲ្យយុវជនកម្ពុជា មានឱកាសច្រើន រៀនសូត្រពីផ្នត់គំនិត និង បទពិសោធន៍ វប្បធម៌ ប្រពៃណី ទំនៀមទំលាប់ ពីគ្នាទៅវិញទៅមក យល់ពី អត្ថន័យពិត នៃជីវិត និង ភាពជោគជ័យ ដែលត្រូវបានគេភ្លេចក្នុងជីវិតដ៏មមាញឹក ។
លោក ហ៊ុន ម៉ានី លើកឡើងថា ពេលគិតដល់វិស័យអប់រំជាពុទ្ធិ ជាការអប់រំនៅផ្នត់គំនិត យើងគិតឃើញទៅដល់ថ្នាក់ដឹកនាំយើងជាច្រើន ដែលមានសម្ដេចសង្ឃរាជជួន ណាត និងហង្ស ជួនណារ៉ុន ជាដើម ដែលគាត់ជាធនធានមនុស្សដ៏សំខាន់របស់កម្ពុជាយើង។
ជាមួយនឹងការលើកឡើងខាងលើនេះ លោកហ៊ុន ម៉ានី អះអាងថា យើងមានថ្នាក់ដឹកនាំជាបុព្វបុរសជាច្រើនទៀត ដូចជាព្រះបាទជវរ្ម័នទី៧ ដែលព្រះអង្គបានសាងសង់ប្រាសាទអង្គរវត្តទុកជាកេរដំណែល មកដល់កូនចៅយើងជំនាន់ក្រោយ សម្ដេចព្រះបរមរតនកោដ្ឋ ដែលព្រះអង្គបានកសាងប្រទេស ដែលមានស្នាដៃដូចអ្វីដែលយើងបានដឹងកន្លងរួចមកហើយ ដូចជាការទាមទារឲ្យទទួលបានឯករាជ្យ និងការទាមទារប្រាសាទព្រះវិហារពីប្រទេសថៃឲ្យក្លាយជាបេតិកភណ្ឌរបស់ខ្មែរពិតប្រាកដនៅឆ្នាំ១៩៦២ជាដើម។
ដើម្បីជាការបង្ហាញថ្នាក់ដឹកនាំគំរូសម្រាប់លោកនោះ លោកហ៊ុន ម៉ានី បានអះអាងថា សម្ដេចតេជោ ហ៊ុន សែន គឺជាឪពុក ហើយក៏ជាគ្រូ និងថ្នាក់ដឹកនាំគំរូផងដែរ ។ តាមលោកហ៊ុន ម៉ានី សម្ដេចតេជោ ហ៊ុន សែន កើតមក មិនមែនជានាយកដ្ឋមន្ត្រីទេ ហើយក៏មិនមែនជាកូនអ្នកមានស្ដុកស្ដម្ភនោះដែរ គឺជាកូនអ្នកក្រីក្រជនបទដូចយើងទាំងអស់គ្នា ប៉ុន្តែឆ្លងកាត់ការខិតខំប្រឹងប្រែងតស៊ូ និងលះបង់គ្រប់កាលៈទេសៈ ដែលកម្ពុជាបានឆ្លងកាត់ ទើបអាចសម្រេចបាន ហើយទទួលបានជោគជ័យដូចពេលនេះ។
តាមលោកហ៊ុន ម៉ានី ភាពជាគំរូមាន២ គឺទី១ខ្លឹមសារនៃការចែករំលែក គឺខ្លឹមសារអប់រំទៅឲ្យអ្នកដទៃ និងទី២ ទង្វើរបស់យើងម្នាក់ៗដែលបានអនុវត្ត។ លោកបានលើកជាឧទាហរណ៍ ហេតុអ្វីបានជាយើងស្គាល់ ចាន់ វឌ្ឍនាការ និងប្រាក់មុន្នី ឧត្តមជាដើម គឺដោយសារតែអ្នកទាំងនោះ បានធ្វើអ្វីមួយឲ្យយើងពេញចិត្ត មានការកោលសរសេរជាដើម។
ដូចជាព្រះបាទជ័យវរ្ម័នទី៧ និងសម្ដេចតេជោ ហ៊ុន សែនជាដើម ការដែលយើងស្គាល់ពួកគាត់ គឺដោយសារតែគាត់បានសាងអង្គរទុកជាកេរដំណែលមកឲ្យកូនចៅសព្វថ្ងៃ និងមានស្នាដៃក្នុងការដឹកនាំបង្រួបបង្រួមជាតិ រកសុខសន្តិភាពជូនប្រជាពលរដ្ឋ ប្រទេសជាតិជាដើម ដូច្នេះយើងចងចាំឈ្មោះរបស់ពួកគាត់នៅក្នុងបេះដូង ហើយថែមទាំងកំណត់ត្រាទុកជាប្រវត្តិសាស្ត្រទៀតផង។
ចែករំលែកព័តមាននេះ