ដេញពីជ្រោយចង្វារដល់ផ្សារដើមគ វ៉ៃរួចទើបដឹង
រាជធានីភ្នំពេញ ៖ បុរសម្នាក់មានសៀតវិទ្យុទាក់ទងនៅនឹងចង្កេះ ជិះម៉ូតូហុងដាឌ្រីមមួយគ្រឿង ដេញតាមរថយន្តដឹកអំពៅមួយ ហើយស្រែកហៅឲ្យឈប់ ក៏ធ្វើឲ្យ
រាជធានីភ្នំពេញ ៖ បុរសម្នាក់មានសៀតវិទ្យុទាក់ទងនៅនឹងចង្កេះ ជិះម៉ូតូហុងដាឌ្រីមមួយគ្រឿង ដេញតាមរថយន្តដឹកអំពៅមួយ ហើយស្រែកហៅឲ្យឈប់ ក៏ធ្វើឲ្យអ្នកបើកបររថយន្តភ័យបើករត់គេចតាំងពីជ្រោយចង្វាររហូតដល់ច្រកចូលផ្សារខាងត្បូងចំណតរថយន្តផ្សារដើមគ កែងនិងផ្លូវម៉ៅសេទុង ទើបឃាត់បាន ក៏ត្រូវប្រជាពលរដ្ឋវាយអ្នកបើកបរនោះឡើងទ្រមខ្លួន ទើបបង្កឲ្យមានការភ្ញាក់ផ្អើលកាលពីវេលាម៉ោង១និង២០នាទីរំលងអធ្រាត្រ ថ្ងៃទី២៩ ខែមីនា ឆ្នាំ២០១៧ ត្រង់ចំណុចច្រកចូលផ្សារខាងត្បូង ចំណតរថយន្តផ្សារដើមគ កែងនិងផ្លូវម៉ៅសេទុង ស្ថិតក្នុងសង្កាត់ផ្សារដើមគ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តដឹកអំពៅមួយគ្រឿង ម៉ាកហ៊ីយ៉ាន់ដាយ ពណ៌ស ទម្ងន់៦តោន ពាក់ស្លាកលេខ ភ្នំពេញ ៣B៦៤៧៥ ជិះដោយបុរសបីនាក់ ធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីជើងទៅត្បូង ខណៈពេលនោះមានបុរសម្នាក់មិនស្គាល់អត្តសញ្ញាណបើកបរម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ មិនចាំស្លាកលេខ ថែមទាំងមានវិទ្យុទាក់ទង អាយកូម ប្រើទៀតផង បានជិះដេញតាមពីក្រោយរថយន្ត ថែមទាំងបានស្រែកឱ្យគេជួយចាប់រថយន្តខាងលើ រហូតមកដល់ចំណុចកើតហេតុរថយន្ត ក៏បានបត់ខាងឆ្វេងទៅបុកឆ័ត្ររបស់អាជីវករចំនួន២ រួចក៏បុកដំបូលយ៉ាប រងការខូចខាតបន្តិចបន្តួច ។
ភ្លាមៗនោះបុរសម្នាក់ដែលជាអ្នកបើកបររថយន្តបានបើកទ្វារលោតចុះរត់គេចខ្លួន ក៏ត្រូវបុរសដែលជិះម៉ូតូដេញតាមពីក្រោយរហូតប្រមាណ៥០០ទៅ៦០០ម៉ែត្រពីកន្លែងកើតហេតុ បានស្រែកឲ្យប្រជាពលរដ្ឋដែលនៅជិតនោះជួយចាប់ និងព្រួតគ្នាវាយទៅលើអ្នកបើកបររថយន្តរងរបួសបែកមុខ បែកមាត់ ទើបប្រគល់ឲ្យនគរបាលប៉ុស្តិ៍ផ្សារដើមគ យកទៅសួរនាំ។ ភ្លាមនោះបុរសដែលជិះម៉ូតូដេញតាមរថយន្តនោះបានប្រាប់ថា រថយន្តខាងលើបានបុកម៉ូតូគេមួយគ្រឿងទៀត នៅឯខណ្ឌជ្រោយចង្វារ រួចក៏ឡើងជិះចេញទៅបាត់ទៅ។
បើតាមសម្តីអ្នកបើកបររថយន្ត ឈ្មោះ ធី វឿន ភេទប្រុស អាយុ២៩ឆ្នាំ ស្នាក់នៅភូមិព្រែកអំពិល ឃុំព្រែកអំពិល ស្រុកស្អាង ខេត្តកណ្តាល មានស្រុកកំណើតនៅភូមិកំពង់ភ្នំ ស្រុកលើកដែក ខេត្តកណ្តាល បានរៀបរាប់ឱ្យដឹងថា រូបគេ រួមទាំងព្រូពីរនាក់ទៀត បើករថយន្តខាងលើ ដឹកអំពៅចេញខេត្តកំពង់ចាម គោលបំណងយកទៅដាក់នៅផ្សារដើមគ បើកតាមបណ្តោយផ្លូវជាតិលេខ៦ លុះមកដល់ជិតរង្វង់មូលព្រហ្មមុខបួន រូបគេបានជាន់ហ្វ្រាំងគេចជង្ហុក ស្រាប់តែមានម៉ូតូមួយគ្រឿងបើកមកពីក្រោយមិនចាំម៉ាក បើកបរដោយបុរសម្នាក់ និងនារីពីរនាក់ បានដួលនៅពីក្រោយរថយន្តរបស់គេ ហើយរូបគេនៅតែបន្តដំណើរជាធម្មតា ខណៈពេលនោះស្រាប់តែមានម៉ូតូមួយគ្រឿងទៀត បានបើកដេញតាមពីក្រោយរថយន្តរបស់គាត់ស្រែកឲ្យឱ្យរូបគេឈប់រថយន្ត ដោយរូបគេភ័យខ្លាំងពេក ក៏បើករថយន្តបំណងទៅស្តង់អំពៅ ដើម្បីថៅកែជួយ លុះមកដល់ចំណុចកើតហេតុក៏ជ្រុលចង្កូតទៅបុកឆ័ត្រ និងដំបូលតូបតែម្តងទៅ ដោយសារខ្លាចមានប្រជាពលរដ្ឋវាយ ទើបរូបវគេបើកទ្វាររថយន្តលោតចុះរត់គេចខ្លួន ក៏ត្រូវបុរសដែលជិះម៉ូតូដេញតាមស្រែកឆោឡោបង្កប្រជាពលរដ្ឋដែលនៅជិតនោះព្រួតគ្នាវាយតែម្តងទៅ។
ក្រោយពេលកើតហេតុ ដោយសារតែពុំមានឃើញភាគីខាងជនរងគ្រោះណាម្នាក់ចេញមកអះអាងថា ត្រូវរថយន្តខាងលើបុក ទើបសមត្ថកិច្ចព្រមឱ្យម្ចាស់យករថយន្ត និងអ្នកបើកបរទៅព្យាបាលរបួសដោយខ្លួនឯង៕
ចែករំលែកព័តមាននេះ