សមត្ថកិច្ចបើកដៃឲ្យយួនដឹកក្បឿងតាមទូកឆ្លងដែនចូលតាមច្រករបៀងស្រែបារាំង
ខេត្តស្វាយរៀង ៖ អាជីវករលក់គ្រឿងសំណង់រិះគន់សមត្ថកិច្ចនគរបាលវរការពារព្រំដែនប៉ុស្តិ៍ច្រករបៀងស្រែបារាំងបើកដៃឲ្យឈ្មួញវៀតណាម
ខេត្តស្វាយរៀង ៖ អាជីវករលក់គ្រឿងសំណង់រិះគន់សមត្ថកិច្ចនគរបាលវរការពារព្រំដែនប៉ុស្តិ៍ច្រករបៀងស្រែបារាំងបើកដៃឲ្យឈ្មួញវៀតណាមនាំក្បឿងពីប្រទេសវៀតណាមឆ្លងដែនតាមផ្លូវទឹកចូលមកក្រុងស្វាយរៀងរាប់សិបទូកក្នុងមួយថ្ងៃៗ ហើយដាក់តាំងលក់នៅកំពង់កាណូត(ចំណតជលយានក្រុងស្វាយរៀង) និងដឹកលក់តាមរថយន្តពេញខេត្តស្វាយរៀងសង្ស័យគ្មានច្បាប់ ធ្វើឲ្យប៉ះពាល់ដល់មុខរបរអាជីវករខ្មែរដែលរកស៊ីបង់ពន្ធជូនរដ្ឋ។ ករណីអាជីវករផ្ទុះការរិះគន់នេះកើតឡើងនៅព្រឹកថ្ងៃទី២៨ មីនា ២០១៧ នៅកំពង់ចំណតជលយានក្រុងស្វាយរៀង ស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង។
បើតាមមន្ត្រីនគរបាលម្នាក់សុំមិនបញ្ចេញឈ្មោះបានឲ្យដឹងថា ឈ្មួញជនជាតិវៀតណាមបានដឹកក្បឿងក្បាច់ ដែលផលិតនៅប្រទេសវៀតណាម តាមទូកប៉ុកចៃធំៗ (ទូកកាណូត)ចូលមកតាមប៉ុស្តិ៍វរការពារព្រំដែនច្រករបៀងស្រែបារាំង ឃុំបាសាក់ ស្រុកស្វាយជ្រំ តាមទន្លេវ៉ៃគោ មកកាន់កំពង់កាណូតក្រុងស្វាយរៀងក្នុងមួយថ្ងៃៗ៤ទៅ៥គ្រឿង ហើយក្នុងមួយគ្រឿងៗដឹកក្បឿងបានរាប់ម៉ឺនសន្លឹក យកមកដាក់តាំងលក់នៅក្នុងចំណតជលយានក្រុងស្វាយរៀងរាប់លានសន្លឹក និងដឹកតាមរថយន្តដើរលក់ពាសពេញខេត្តគ្មានការរំខានពីសមត្ថកិច្ចឡើយ។
ប្រភពដដែលបន្តទៀតថា អាជ្ញាធរក្រុងស្វាយរៀងបានដាក់តូបប្រមូលភាស៊ី ដោយដាក់ក្តារខៀនបង់ប្រាក់នៅទីនោះគឺ តារាងប្រមូលថ្លៃភាស៊ី របស់ចំណតជលយានក្រុងស្វាយរៀង ទូកដឹកទំនិញចំណុះ៣០ទៅ៤០តោន១គ្រឿង៨០,០០០រៀល ទូកចំណុះ១០ទៅ២០តោន១គ្រឿង៥ម៉ឺនរៀល។ ទូកចំណុះ១តោនទៅ៥តោន១គ្រឿង២ម៉ឺនរៀល រថយន្តដឹកទំនិញផ្សេងៗ ១គ្រឿង៥ពាន់រៀល រថយន្តធុនតូច១គ្រឿង៣ពាន់រៀល។ ម៉ូតូរ៉ឺម៉ក១គ្រឿង៥០០រៀល ទំនិញចាប់ហួយ ១តោន២ពាន់រៀល ទំនិញផ្សេងៗ១តោន២ពាន់រៀល។
ទាក់ទិនឈ្មួញវៀតណាមដឹកក្បឿងតាមទូកមកតាមផ្លូវទឹកចូលតាមច្រករបៀងស្រែបារាំងនេះដែរលោកប្រធានចំណតជលយានក្រុងស្វាយរៀងបានមានប្រសាសន៍ថា គាត់ដឹងតែយកថ្លៃភាស៊ីទេ ការនាំទំនិញចូលគឺឲ្យសួរទៅសមត្ថកិច្ចច្រករបៀងស្រែបារាំងវិញ។ ចំណែកមន្ត្រីនគរបាលប៉ុស្តិ៍ព្រំដែនច្រករបៀងស្រែបារាំងមិនអាចរកការបំភ្លឺបានទេ នៅថ្ងៃ២៧ មីនានេះ។ ទាក់ទិនករណីខាងលើនេះដែរ លោក មាក ឆសុវណ្ណារុន ប្រធានមន្ទីរពាណិជ្ជកម្មខេត្តស្វាយរៀងបានមានប្រសាសន៍ថា មន្ទីរពាណិជ្ជកម្មពុំមានសមត្ថកិច្ចចេញច្បាប់អនុញ្ញាត ឬចេញអាជ្ញ្ញាប័ណ្ណឲ្យឈ្មួញនាំក្បឿងពីបរទេសចូលមកកម្ពុជាទេមានតែក្រសួង បើមានមែនសង្សយ័ថា ជាការបើកដៃពីសមត្ថកិច្ចយាមការពារព្រំដែនឲ្យចូល។
ប្រភពបន្តទៀតថា ច្រករបៀងស្រែបារាំងជាច្រកផ្លូវទឹក ច្រកមួយនេះមានប្រធានគណៈកម្មការដែលមន្ត្រីសាលាខេត្តជាប្រធានស្នាក់ការ និងនាយនគបាលប៉ុស្តិ៍ច្រករបៀងស្រែបារាំងជាអនុប្រធាន ទើបការដឹកទំនិញគ្រប់ប្រភេទចេញចូលដោយរលូន ហើយសង្សយ័ថា ទំនិញនាំចូលទាំងនោះគ្មានការត្រួតពិនិត្យពីមន្ត្រីជំនាញទេ។ ហើយក្រុមអាជីវកររិះគន់ថា ច្បាស់ជាសមត្ថកិច្ចទាំងនោះត្រូវថ្នាំឈ្មួញវៀតណាមអស់ហើយមើលទៅ បានជាឈ្មួញវៀតណាមដឹកទំនិញចេញចូល ជាពិសេសក្បឿង និងទំនិញគេចពន្ធជាច្រើនគ្មានសមត្ថកិច្ចណារំខាននោះ។ ហើយច្រករបៀងផ្លូវទឹកមួយនេះគឺបើកយូឆ្នាំមកហើយទើបតែបែកធ្លាយអាជីវករខ្មែរអ្នករកស៊ីលក់ក្បឿងដែលបង់ពន្ធរិះគន់សុំឲ្យទប់ស្កាត់ ចុះគយ និងកាំកុងត្រូលទៅណាអស់ហើយ៕
ចែករំលែកព័តមាននេះ