រាជធានីភ្នំពេញ ៖ ប្ដីប្រពន្ធមួយគូជាគ្រួសារស្តុកស្តម្ភប្រកបរបរលក់គ្រឿងក្រអូប ប៉ុន្តែហាក់គ្មានសុភមង្គល មានតែភាពរកាំរកូសនឹងគ្នា រហូតឈានដល់រត់រកការអន្តរាគមន៍ពីសំណាក់នគរបាលប៉ុស្ដិ៍
រាជធានីភ្នំពេញ ៖ ប្ដីប្រពន្ធមួយគូជាគ្រួសារស្តុកស្តម្ភប្រកបរបរលក់គ្រឿងក្រអូប ប៉ុន្តែហាក់គ្មានសុភមង្គល មានតែភាពរកាំរកូសនឹងគ្នា រហូតឈានដល់រត់រកការអន្តរាគមន៍ពីសំណាក់នគរបាលប៉ុស្ដិ៍ និងអាជ្ញាធរសង្កាត់ចោមចៅឲ្យជួយដោះស្រាយ។
ប្ដីប្រពន្ធខាងលើនោះបានរត់រកនគរបាលប៉ុស្ដិ៍ចោមចៅឲ្យជួយដោះស្រាយកាលពីថ្ងៃទី២៦ ខែមីនា ឆ្នាំ២០១៧ ម្ដងមកហើយ ដោយទៅទាំងពីរនាក់ប្ដីប្រពន្ធ លុះល្ងាចថ្ងៃទី២៧ គេបានឃើញស្ត្រីជាប្រពន្ធអមដំណើរដោយមិត្តភក្ដិ២ទៅ៣នាក់ទៀត បានទៅកាន់ប៉ុស្ដិ៍ខាងលើនោះម្ដងទៀត ចំណែកឯបុរសជាប្ដីមិនបានទៅជាមួយនោះឡើយ។
ស្ត្រីជាប្រពន្ធឈ្មោះ ញឹម រតនា អាយុ២៧ឆ្នាំ និងបុរសជាប្ដីឈ្មោះ គ្រី សុខនី អាយុ៣៥ឆ្នាំ ទាំងពីរនាក់ប្ដីប្រពន្ធនេះ មានមុខរបរបោះដុំគ្រឿងក្រអូប ហើយអត់ដឹងថា ពួកគេរៀបការតាំងពីពេលណានោះទេ ប៉ុន្តែពួកគេមានកូនប្រុសម្នាក់ និងស្រីម្នាក់នៅក្នុងបន្ទុក ហើយមានជីវភាពធូរធា ។ សព្វថ្ងៃស្នាក់នៅក្នុងបុរីពីភពថ្មី ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
នគរបាលបានឲ្យដឹងថា ប្ដីប្រពន្ធមួយគូនោះមើលទៅអាចជាគ្រួសារមួយមានជីវភាពស្ដុកស្ដម្ភដែរ ដោយកាលពីដើមឡើយពួកគេគឺជាជាងអ៊ុតសក់មិនសូវជាធូរធាទេ ប៉ុន្តែក្រោយមកបានបែកគំនិតលាយឡេលក់ និងលក់គ្រឿងក្រអូប ហើយមានជោគជ័យនៅក្នុងមុខរបរ រហូតក្លាយទៅជាអ្នកមាន ដោយមានផ្ទះ២ទៅ៣កន្លែង និងមានរថយន្តទំនើបៗជិះថែមទៀតផង។ ប៉ុន្តែអ្វីដែលគួរឲ្យចាប់អារម្មណ៍នោះកាលពីនៅគ្រាក្រមានសុភមង្គលណាស់ គ្មានបញ្ហាកើតឡើងនោះឡើយ ប៉ុន្តែនៅពេលរកស៊ីមានបានបែរជាគ្មានសុភមង្គលទៅវិញ ដែលកំពុងតែមានភាពរង្គោះរង្គើរស្ទើរមិនគួរឲ្យជឿបែបនេះ ។ បន្ទាប់ពីនាំគ្នាទៅដល់ប៉ុស្ដិ៍ចោមចៅ ប្ដីប្រពន្ធខាងលើបានធ្វើការចោទប្រកាន់គ្នាទៅវិញទៅមកយកត្រូវតែរៀងៗខ្លួនលែងមានការខ្មាសអៀនទៅហើយ។
បុរសជាប្ដីបានធ្វើការចោទប្រកាន់នាងជាប្រពន្ធថា នាងមានចិត្តមិនស្មោះត្រង់ វៀចវេរលួចផិតក្បត់ខ្លួនជាប្ដីទៅមានប្រុសសហាយ ខណៈពេលដែលខ្លួនមិនសូវបាននៅផ្ទះ ព្រោះជាប់រវល់ទៅដើរលក់ផលិតផលនៅឯតាមបណ្ដាខេត្តនានា ហើយយូរៗទើបមានពេលត្រឡប់មកផ្ទះវិញម្ដង ដូច្នេះជាឱកាសល្អសម្រាប់ឲ្យប្រពន្ធផិតបានដោយងាយ។ បុរសជាប្ដីនោះបានប្រាប់ បន្តទៀតថា ប្រពន្ធរបស់ខ្លួនបានមានទំនាក់ទំនងជាមួយបុរសម្នាក់ ហើយមានថ្ងៃមួយគាត់ត្រឡប់មកពីខេត្តវិញ ដល់ផ្ទះក៏ប្រទះឃើញនាងកំពុងស្ថិតនៅក្នុងបន្ទប់តែ២នាក់ជាមួយបុរសម្នាក់នោះនាវេលាយប់ពាក់កណ្ដាលអធ្រាត្រ ដោយបិទទ្វារខ្ទាស់គន្លឹះពីខាងក្នុងថែមទៀត។ ខណៈនោះប្រពន្ធគាត់បានប្រាប់ថា បុរសនោះគឺជាមិត្តភក្ដិរបស់នាងទេ ហើយនាងបានហៅឲ្យទៅជួយលាយ និងកូរឡេតែប៉ុណ្ណោះ មិនមានអ្វីផ្សេងក្រៅពីនេះឡើយ។ ប៉ុន្តែការដោះសារនោះគាត់មិនបានជឿទេ ព្រោះនៅក្នុងផ្ទះនោះមិនខ្វះទេមនុស្សសម្រាប់ជួយធ្វើការ មិនចាំបាច់អីនាំអ្នកមិនធ្លាប់ស្គាល់មកធ្វើការបែបនេះ ហើយធម្មតាមនុស្សប្រុសនិងស្រីនៅជាមួយគ្នាតែ២នាក់ក្នុងបន្ទប់ទាំងយប់បែបនេះ តើគួរឲ្យជឿបានទេថា ពួកគេអត់ធ្វើអីនោះ ហើយដើរលេងរហូតយប់អធ្រាត្រទើបចូលផ្ទះទៀតផង។
ចំណែកឯនាងប្រពន្ធ ក្រោយពីទទួលរងការចោទប្រកាន់ពីប្ដីក៏បានបកស្រាយវិញដថា នាងមិនបានប្រព្រឹត្តដូចជាការចោទប្រកាន់របស់ប្ដីឡើយ បុរសជាប្ដីនាងបានដើរលេងចូលច្រៀងខារ៉ាអូខេស្ទើររាល់ថ្ងៃ មិនសូវគិតពីប្រពន្ធកូននោះទេ មិនតែប៉ុណ្ណោះបានកឹបកេងលុយដែលបានមកពីលក់ផលិតផលគ្រឿងក្រអូបអស់ជាង១៥ម៉ឺនដុល្លារ និងយករថយន្តចំនួន៣គ្រឿងថែមទៀត។ ប៉ុន្តែមិនបានបញ្ជាក់ថា យករថយន្តនោះទៅណាឡើយ នេះគឺជាការក្បត់រូបនាង ។ មិនតែប៉ុណ្ណោះប្ដីនាងបានរួមគំនិតជាមួយបងប្អូន និងត្រចៀក.សខ្លាំងណាស់ ជឿតាមសាច់ញាតិរបស់ខ្លួនដែលបង្គាប់ឲ្យលែងលះរូបនាងចោល និងវាយដំនាងរហូតរងរបួសជាំខ្លួន ជាំភ្លៅ ជាំសាច់ គ្មានមេត្តាឡើយ។
នគរបាលបានបន្តទៀតថា និយាយបណ្ដើរនាងបានលាត់សម្លៀកបំពាក់ឲ្យមើលស្នាមរបួសដែលត្រូវប្ដីវាយបណ្ដើរ ប៉ុន្តែទោះជាបែបណា នគរបាលដែលជាអ្នកធ្វើកំណត់ហេតុមិនបានឲ្យនាងលាត់ទេ ព្រោះវាអាក្រក់មើលខ្លាំងពេក ហើយស្ត្រីខាងលើនោះប្រាប់ទៀតថា នាងពិតជាបានដើរលេងយប់មែន ក៏ព្រោះតែខឹងនឹងប្ដីនាងពូកែចូលខារ៉ាអូខេរាល់យប់ពេក ប៉ុន្តែការដែលនាងដើរលេងនោះពុំមែននាងទៅម្នាក់ឯងទេ គឺបាននាំកូនទៅជាមួយដែរតើ។ ចំណែកការចោទប្រកាន់ថា នាងមានសហាយនោះក៏ជារឿងមិនពិតដែរ បុរសម្នាក់នោះគឺជាមិត្តភក្ដិរបស់នាងទេ ហើយនាងបានហៅគាត់ឲ្យទៅជួយលាយម្សៅ និងកូរឡេប៉ុណ្ណោះ គ្មានអ្វីផ្សេងទៀតឡើយ។ ក្រៅពីមានបញ្ហាជាមួយប្ដីស្ត្រីខាងលើនោះ បានប្ដឹងពីបងថ្លៃរបស់ខ្លួនថា បានឃុបឃិតជាមួយប្ដីធ្វើបាបនាង ហើយក៏បានស្នើសុំឲ្យជួយបណ្ដេញបងថ្លៃនោះចេញពីផ្ទះថែមទៀត ប៉ុន្តែនគរបាលរួមជាមួយអាជ្ញាធរមិនអាចធ្វើបែបនេះបានឡើយ ព្រោះបងថ្លៃរបស់នាងស្នាក់នៅផ្ទះជួលផ្សេងពីនាងតែប៉ុណ្ណោះ៕
ចែករំលែកព័តមាននេះ