រាជធានីភ្នំពេញ៖ ឯកអគ្គរដ្ឋទូតឥណ្ឌាប្រចាំនៅកម្ពុជាលោក ណាវីន ស្រ៊ីវ៉ាស្ទាវ៉ា បានមានប្រសាសន៍ថា ជារៀងរាល់ឆ្នាំ សិស្ស និស្សិតកម្ពុជា២៧នាក់ បានទទួលអាហារូបករណ៍ទៅបន្ដការសិក្សានៅតាមសាកលវិទ្យាល័យល្បីៗនានាទទួលស្គាល់ជាអន្តរជាតិក្នុងប្រទេសឥណ្ឌា។
ថ្លែងក្នុងកម្មវិធីអាហារូបករណ៍ពិសេស សម្រាប់សិស្ស និស្សិតកម្ពុជាឆ្នាំ២០១៧ នៅព្រឹកថ្ងៃទី២៨ មិនា ២០១៧ ឯកអគ្គរដ្ឋទូតឥណ្ឌា បានឲ្យដឹងទៀតថា “ឆ្នាំមុនយើងមានសិស្ស និស្សិតចំនួន២៥រូប បានជាប់អាហារូបករណ៍ ក្នុង២៤រូប បានទៅសិក្សានៅទីនោះ ប៉ុន្ដែម្នាក់ទៀតបានខកខាន ហើយឆ្នាំនេះដែរ យើងមានសិស្សនិស្សិតចំនួន ២៧រូប ក្នុងនោះមានចំនួន ២៦រូប ដែលគ្រោងនឹងទៅបន្ដការសិក្សានៅប្រទេសឥណ្ឌា”។
លោកឯកអគ្គរដ្ឋទូតបានបន្ដទៀតថា គិតត្រឹមឆ្នាំ២០១៧នេះ សិស្ស និស្សិតកម្ពុជា ដែលបានទទួលអាហារូបករណ៍ទៅបន្ដការសិក្សានៅប្រទេសឥណ្ឌាមានចន្លោះពី ៣០០ ទៅ៤០០នាក់ ដែលអ្នកទាំងនោះ ត្រូវបានផ្គត់ផ្អង់ការចំណាយផ្សេងៗរួមមានថ្លៃសិក្សា ប្រាក់ឧបត្ថម្ភចិញ្ចឹមជីវិត ឫការរស់នៅ ប្រាក់ឧបត្ថម្ភសៀវភៅ ប្រាក់ឧបត្ថម្ភលើកន្លែងស្នាក់នៅ សំណងនៃការចំណាយវេជ្ជសាស្រ្ត និងសំបុត្រយន្ដហោះធ្វើដំណើរទៅមកឥណ្ឌា-កម្ពុជា។
រដ្ឋលេខាធិការនៃក្រសួងអភិវឌ្ឍន៍ជនបទលោក សៅ ជីវ័ន្ដ ដែលជាអតីតសិស្ស និស្សិត បានទៅសិក្សានៅក្នុងប្រទេសឥណ្ឌា បានលើកឡើងក្នុងឱកាសនោះដែរថា ការទៅសិក្សានៅប្រទេសឥណ្ឌា សិស្ស និស្សិត បានទទួលផលប្រយោជន៍៣យ៉ាង “ទី១ យើងបានទទួលការគោរពគ្នាទៅវិញទៅមក ,ទី២យើងបានចេះភាសាអង់គ្លេស ដូចទៅប្រទេសផ្សេងទៀត ដែលថាជាប្រទេសល្អ និងទី៣ តម្លៃនៃការចាយវាយថោក ដែលយើងមិនសូវជាពិបាកក្នុងការសិក្សា” ។ លោកបន្ដថា សាលានៅប្រទេសឥណ្ឌាមានច្បាប់តឹងរ៉ឹង និងត្រូវបានទទួលស្គាល់ជាអន្ដរជាតិ នៅពេលដែលសិស្ស និស្សិត បានទទួលអាហារូបករណ៍ទៅសិក្សានៅឥណ្ឌា ហើយចង់ទៅបន្ដការសិក្សា នៅក្នុងប្រទេសផ្សេង គឺអាចធ្វើបានយ៉ាងងាយ៕
ចែករំលែកព័តមាននេះ