ខេត្តកណ្ដាល៖ ជនសង្ស័យម្នាក់លួចកាប់ផ្លែចេក តាមចំការ ត្រូវបានម្ចាស់គេទាន់កាប់បីកាំបិត និងវាយពីរដំបងរបួសធ្ងន់ ទើបនាំមកប្រគល់ឱ្យនគរបាល កាលពីម៉ោង១០និង១៧ នាទីយប់ ថ្ងៃទី២៦ មីនា ២០១៧ នៅ
ខេត្តកណ្ដាល៖ ជនសង្ស័យម្នាក់លួចកាប់ផ្លែចេក តាមចំការ ត្រូវបានម្ចាស់គេទាន់កាប់បីកាំបិត និងវាយពីរដំបងរបួសធ្ងន់ ទើបនាំមកប្រគល់ឱ្យនគរបាល កាលពីម៉ោង១០និង១៧ នាទីយប់ ថ្ងៃទី២៦ មីនា ២០១៧ នៅចំណុចដីចំការចេក ស្ថិតក្នុងភូមិឬស្សីជ្រោយស្វាយប្រទាល ស្រុកស្អាង ខេត្តកណ្ដាល ។
មន្ត្រីនគរបាលស្រុកស្អាង បានប្រាប់ឱ្យដឹងថា ជនសង្ស័យមានស្នាមរបួសមុតធ្ងន់បីកន្លែង ត្រូវបានបញ្ជូនទៅព្យាបាលនៅរាជធានីភ្នំពេញ។ ជននេះឈ្មោះ ទ្រី សុងហាក់ ភេទប្រុស អាយុ២៤ឆ្នាំ មុខរបរមិនពិតប្រាកដ មានទីលំនៅភូមិព្រែកតាជ័រ ឃុំស្វាយប្រទាល ស្រុកស្អាង មានស្នាមមុតក្បាលខាងក្រោយ១កន្លែង លើស្មាខាងស្តាំ១កន្លែង ចុងស្មាឆ្វេងខាងក្រោយ១កន្លែង និងជនសង្ស័យម្នាក់ទៀត រត់គេចខ្លួន ឈ្មោះ វ៉ាន់ កុសល់ ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ។ ចំណែក ម្ចាស់ចំការចេកឈ្មោះ គួក គ្រុយ ហៅរស់ ភេទប្រុស អាយុ៤២ឆ្នាំ ជនជាតិខ្មែរ មុខរបរកសិករ មានទីលំនៅៗភូមិឬស្សីជ្រោយ ឃុំស្វាយប្រទាល ស្រុកស្អាង។ វត្ថុតាងរួមមានម៉ូតូមួយគ្រឿង ម៉ាកសង់កូរ៉េ ពណ៌ក្រហម ពាក់ស្លាកលេខ កណ្ដាល 1p 1037 ផ្លែចេកខ្ចីចំនួន៤៣ស្និត កណ្តៀវខ្វាងចំនួន១ កាំបិតបុ័ងតោចំនួន១ និងពិល២ ។
នគរបាលបានឱ្យដឹងបន្ថែមថា នៅយប់កើតហេតុខាងលើ ឈ្មោះ វ៉ឹក យ៉ុត បានឃើញជនសង្ស័យឈ្មោះទ្រី សុងហាក់ និង វ៉ាន់ កុសល កំពុងលួចកាប់ផ្លែចេក និងរៀបចេកដាក់ចូលក្នុងបាវ ។ ពេលឃើញដូចនេះឈ្មោះ វឹក យ៉ុត បានទូរស័ព្ទហៅឈ្មោះ គួក គ្រុយ ជាម្ចាស់ចេក និងឈ្មោះ តួក តួ មកជួយចាប់ តែភ្លាមៗនោះជនសង្ស័យក៏បានបញ្ឆេះម៉ូតូរកគេចខ្លួន។ ភ្លាមនោះ ឈ្មោះវឹក យ៉ុត ទាញដំបងឈើវាយទៅលើឈ្មោះ ទ្រី សុងហាក់ ចំនួន២ដំបង បណ្តាលឱ្យត្រូវរងរបួស តែមិនដឹងអ្នកណាកាប់ទៅលើជនសង្ស័យត្រូវចំនួនបីកាំបិតទៀតនោះទេ ។ ចំណែកជនសង្ស័យម្នាក់ទៀត ឈ្មោះ វ៉ាន់ កុសល បានគេចខ្លួនបាត់។
ក្រោយមកពួកគេក៏បានចាប់ជនសង្ស័យមកប្រគល់ឲ្យប៉ុស្តិ៍នគរបាលស្វាយប្រទាល ។ ពេលឃើញជនសង្ស័យមានរបួស សមត្ថកិច្ចប៉ុស្តិ៍ស្វាយប្រទាល ក៏បញ្ជូនទៅមន្ទីរពេទ្យបង្អែកស្រុកស្អាង ប៉ុន្តែដោយសភាពធ្ងន់ធ្ងរពេក ក៏បញ្ជូនជនសង្ស័យទៅសង្គ្រោះនៅមន្ទីរពេទ្យរាជធានីភ្នំពេញបន្តទៀត ។
ករណីនេះ នគរបាលកំពុងធ្វើការស្រាវជ្រាវ និងកសាងសំណុំរឿងបញ្ជូនចាត់ការតាមនីតិវិធី ៕
ចែករំលែកព័តមាននេះ