រាជធានីភ្នំពេញ ៖ ក្រសួងសុខាភិបាល និងក្រុមហ៊ុន ជេណេរ៉ល អេឡិចទ្រិក បានសហការគ្នាក្នុងការផ្ដល់និងបំពាក់ឧបករណ៍ប្រព័ន្ធទឹកស្អាតដល់មន្ទីរពេទ្យខេត្តចំនួន១០ នៅក្នុងប្រទេសកម្ពុជា ហើយកាលពីថ្ងៃពេលថ្មីៗនេះដែរ មន្ទីរពេទ្យខេត្តទី១០ នៅ
រាជធានីភ្នំពេញ ៖ ក្រសួងសុខាភិបាល និងក្រុមហ៊ុន ជេណេរ៉ល អេឡិចទ្រិក បានសហការគ្នាក្នុងការផ្ដល់និងបំពាក់ឧបករណ៍ប្រព័ន្ធទឹកស្អាតដល់មន្ទីរពេទ្យខេត្តចំនួន១០ នៅក្នុងប្រទេសកម្ពុជា ហើយកាលពីថ្ងៃពេលថ្មីៗនេះដែរ មន្ទីរពេទ្យខេត្តទី១០ នៅកម្ពុជា ក៏បានបំពាក់ឧបករណ៍បន្សុទ្ធទឹកស្អាតនេះរួចរាល់ហើយដែរ នៅមន្ទីរពេទ្យបង្អែកប៊ុនរ៉ានី ហ៊ុនសែន រកាកោង និងបានប្រកាសដាក់ឱ្យប្រើប្រាស់ជាផ្លូវការដោយលោកស្រីវេជ្ជបណ្ឌិតឱ វណ្ឌឌីនអគ្គនាយកបច្ចេកទេសសុខាភិបាលនៃក្រសួងសុខាភិបាលតំណាងលោកម៉ម ប៊ុនហេងរដ្ឋមន្ត្រីក្រសួងសុខាភិបាលផងដែរ ។
លោកស្រីវេជ្ជបណ្ឌិតឱ វណ្ណឌីន បានមានប្រសាសន៍ថា លទ្ធភាពចំពោះការប្រើប្រាស់ប្រភពទឹកស្អាតដែលជាទីទុកចិត្ត និងមានសុវត្ថិភាព គឺមានសារសំខាន់ណាស់ សម្រាប់តំហែទាំអ្នកជំងឺ និងដោយសារកិច្ចខិតខំប្រឹងប្រែងរបស់មន្ត្រីសុខាភិបាលទាំងឡាយ ដែលកំពុងធ្វើការជាមួយអ្នកតំណាងមកពីក្រសួង និងមូលនិធិជេណេរ៉ល អេឡិកទ្រិក មានអ្នកជំងឺច្រើនជាង ៥០០នាក់ នៅឯមន្ទីរពេទ្យបង្អែកប៊ុនរ៉ានី ហ៊ុនសែន រកាកោង ឥឡូវនេះ មានលទ្ធភាពទទួលបានទឹកស្អាត ជារៀងរាល់ថ្ងៃ ។
លោក Wouter Van Wersch ប្រធាន និងជានាយកប្រតិបត្តិក្រុមហ៊ុន GE ( General Electric ) ប្រចាំអាស៊ាន បានមានប្រសាសន៍ថា ការសម្ពោធថ្ងៃនេះ ហើយនិងកម្មវិធីទឹកស្អាតចំនួនប្រាំបួន ជាមួយនិងមន្ទីរពេទ្យចំនួន៩ ផ្សេងទៀត គឺជាគំរូមួយនៃភាពជាដៃគូរវាងវិស័យសាធារណៈ និងវិស័យឯកជន ដែលផ្តល់នូវអត្ថប្រយោជន៍ដោយផ្ទាល់ដល់ប្រជាជនរាប់ពាន់នាក់ ។លោកថា៖« យើងខ្ញុំមើលឃើញប្រទេសកម្ពុជា ដែលមានប្រជាពលរដ្ឋវ័យក្មេង និងមានសុទិដ្ឋិនិយម ថាជាកម្លាំងជំរុញដ៏សំខាន់មួយឆ្ពោះទៅរកកិច្ចអភិវឌ្ឍន៍ និងកំណែទម្រង់បរិយាកាសធុរកិច្ច ហើយយើងខ្ញុំសូមបញ្ជាក់ច្បាស់លាស់អំពីការប្តេជ្ញាចិត្តរយៈពេលវែងរបស់យើងខ្ញុំ នៅក្នុងប្រទេសនេះ ជាដៃគូមួយសម្រាប់ការរីកចម្រើន និងការអភិវឌ្ឍន៏» ។
លោក លីម ដារារិទ្ធ អ្នកដឹកនាំក្រុមហ៊ុន GE ប្រចាំកម្ពុជា ក៏បានឱ្យដឹងផងដែរថា មុននឹងមានកម្មវិធីនេះ មានមន្ទីរពេទ្យចំនួន ៧ ក្នុងចំណោម ១០ ប្រព្រឹត្តិទៅដោយគ្មានប្រព័ន្ធបន្សុទ្ធទឹកស្អាតឡើយ ចំណែកឯមន្ទីរពេទ្យបីទៀតប្រើប្រាស់នូវប្រព័ន្ធចម្រោះទឹកតូចៗ ដែលបម្រើដល់ផ្នែកសម្ភព និងផ្នែកវះកាត់ប៉ុណ្ណោះ ។ ប្រព័ន្ធទឹកថ្មីនេះនឹងបង្កើនគុណភាពនៃការព្យាបាល ក៏ដូចជានាំមកនូវគុណតម្លៃជាក់ស្តែងកាន់តែច្រើនថែមទៀត សម្រាប់អ្នកជំងឺរាប់ពាន់ នាក់ទូទាំងប្រទេសទាំងមូល ។
ការដំឡើងប្រព័ន្ធចម្រោះទឹកនៅឯមន្ទីរពេទ្យបង្អែកប៊ុនរ៉ានី ហ៊ុនសែន រកាកោង នេះ បញ្ចប់ជាស្ថាពរ នូវកម្មវិធី ទឹកស្អាតក្នុងគ្រឹះស្ថានសុខាភិបាល (SWHF) ដែលចាប់ផ្តើមធ្វើដោយក្រសួងសុខាភិបាល និងមូលនិធិជេណេរ៉ល អេឡិកទ្រិក នៅក្នុងខែកញ្ញា ឆ្នាំ២០១៤ ។ មូលនិធិជេណេរ៉ល អេឡិកទ្រិក គឺជាអង្គការមនុស្សធម៌មួយរបស់ក្រុមហ៊ុន GE ដែលលះបង់ចំពោះការធ្វើឱ្យប្រសើរឡើងដល់ សហគមន៍នានានៅជុំវិញពិភពលោក ដោយផ្តោតទៅលើការអប់រំ គោលនយោបាយសាធារណៈ និង សុខាភិបាល ។
វាជាផ្នែកមួយនៃកម្មវិធី SWHF ក្នុងប្រទេសកម្ពុជា ដែលមានទំហំទឹកប្រាក់ ៣លាន១សែនដុល្លារ ប្រព័ន្ធចម្រោះទឹកជាច្រើនត្រូវបានដំឡើងរួចហើយនៅក្នុងបណ្តាមន្ទីរពេទ្យ១០រូមមានៈ មន្ទីរពេទ្យបង្អែកកំពង់ធំ បារាយណ៍សន្ទុក សួង កោះធំ កំពង់ត្រលាច ថ្មគោល ឧត្តុង្គ សំពៅលូន កំពង់ត្រាច និងមន្ទីរពេទ្យបង្អែកប៊ុនរ៉ានី ហ៊ុនសែន រកាកោង ៕
ចែករំលែកព័តមាននេះ