ពលរដ្ឋចាស់ក្មេងក្អួតចង្អោរ ក្រោយទទួលទានពងទាចៀនស្អំ
ខេត្តក្រចេះ ៖ អាជ្ញាធរស្រុកស្នួលបានអះអាងថា អ្នកភូមិប្រុសស្រីក្មេងចាស់ជាង១០នាក់ ដែលកើតមានអាការក្អួតចង្អោរបានត្រឡប់
ខេត្តក្រចេះ ៖ អាជ្ញាធរស្រុកស្នួលបានអះអាងថា អ្នកភូមិប្រុសស្រីក្មេងចាស់ជាង១០នាក់ ដែលកើតមានអាការក្អួតចង្អោរបានត្រឡប់ទៅលំនៅឋានវិញហើយនៅរសៀលថ្ងៃទី២៥ មីនា បន្ទាប់ពីអាជ្ញាធរបានដឹកបញ្ជូនពួកគាត់មកសង្គ្រោះបន្ទាន់នៅមន្ទីរពេទ្យស្រុកស្នួលរួចមក ។ អ្នកភូមិប្រុសស្រីក្មេងចាស់ទាំងនោះមានចំនួន១២នាក់រស់នៅភូមិត្រពាំងលាក់ ឃុំស្នួល ស្រុកស្នួល បានកើតមានអាការពុលជាបន្តបន្ទាប់កាលពីយប់ថ្ងៃទី២៤ មីនា និងព្រឹកថ្ងៃទី២៥ មីនា ។
ជុំវិញករណីខាងលើនេះមិនមានសេចក្តីរាយការណ៍ណាមួយបញ្ជាក់ថា ការពុលរបស់អ្នកភូមិទាំងនេះបណ្តាលមកពីអ្វីឲ្យប្រាកដនៅឡើយទេ ដោយអ្នកខ្លះបានលើកឡើងថា ការពុលគឺកើតមានឡើងបន្ទាប់ពីពួកគាត់ទទួលទានបង្អែមដែលលក់នៅក្នុងភូមិ និងខ្លះទៀតបានលើកឡើងថា បណ្តាលមកពីអ្នកភូមិបានទិញត្រួយស្អំដែលមានថ្មាំសម្លាប់សត្វល្អិតមកចម្អិនធ្វើម្ហូបទទួលទាន ទើបបណ្តាលឲ្យពុលបែបនេះ ។
បើតាមអភិបាលស្រុកស្នួលលោក គង់ គឹមនី បានប្រាប់ឱ្យដឹងថា បន្ទាប់ពីកើតមានអាការពុលអ្នកភូមិប្រុសស្រីក្មេងចាស់ទាំងនោះ ត្រូវបានអាជ្ញាធរចាត់បញ្ជូនចេញពីភូមិដឹកសំដៅមកសង្គ្រោះនៅមន្ទីរពេទ្យស្នួលជាបន្តបន្ទាប់ភ្លាមៗ ។
លោកអភិបាលស្រុក បានឱ្យដឹងថា ការពុលរបស់អ្នកភូមិគឺបន្ទាប់ពីពួកគាត់ហូបពងទាចៀនលាយត្រួយស្អំ ដែលទិញពីអ្នកលក់នៅក្នុងភូមិ ខណៈដែលត្រួយស្អំទាំងនោះ មានជាតិពុលដោយថ្នាំសម្លាប់សត្វល្អិត ហើយមុននឹងយកមកចម្អិនទទួលទាន ពួកគាត់មិនបានលាងសម្អាតឱ្យបានត្រឹមត្រូវជាមុន ។
គួរំលឹកថា កន្លងមកក៏មានអ្នកភូមិជាច្រើននៅស្រុកស្នួលបានរងគ្រោះដោយការពុលចំណីអាហារ ពុលស្រា.ស និងពុលសាច់ឆ្កែជាដើម ។ ដោយបាតុភាពផ្ទុះចេញនូវការពុលរបស់អ្នកភូមិនៅស្រុកស្នួល គឺបានកើតឡើងផ្ទួនៗកាលពីចុងឆ្នាំ២០១៤ក្នុងនោះបានធ្វើឲ្យអ្នកភូមិប្រុសស្រី៦នាក់បានស្លាប់ និងច្រើននាក់ទៀតរងគ្រោះពិការអវយវៈ និងរងគ្រោះពុលធ្ងន់ស្រាលហើយត្រូវបានចាត់បញ្ជូនមកសង្គ្រោះនៅមន្ទីរពេទ្យ ៕
ចែករំលែកព័តមាននេះ