ផ្តន្ទាទោសជនជាប់ចោទដែលសម្លាប់សិស្សស្រីនៃវិទ្យាល័យពងទឹកហើយ
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ លោក តុប ឈុនហេង ប្រធានក្រុមប្រឹក្សាជំនុំជំរះកាលពីព្រឹកថ្ងៃទី២៧ ខែមីនា ឆ្នាំ២០១៧ បានប្រកាសសាលក្រមផ្តន្ទាទោសជនជាប់ចោទ
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ លោក តុប ឈុនហេង ប្រធានក្រុមប្រឹក្សាជំនុំជំរះកាលពីព្រឹកថ្ងៃទី២៧ ខែមីនា ឆ្នាំ២០១៧ បានប្រកាសសាលក្រមផ្តន្ទាទោសជនជាប់ចោទ ១-ឈ្មោះ ជុំ វីរៈ ភេទប្រុស អាយុ២២ឆ្នាំ ដាក់ពន្ធនាគារអស់មួយជីវិត ២-ឈ្មោះ ហុង សុជាតា ភេទប្រុស អាយុ២១ឆ្នាំ និង៣-ឈ្មោះ លឹម បញ្ញវ័ន្ត ភេទប្រុស អាយុ២២ឆ្នាំ ដាក់ពន្ធនាគារម្នាក់ៗ៣០ឆ្នាំ ក្រោមការចោទប្រកាន់ពីបទឃាតកម្មគិតទុកជាមុន តាមមាត្រា២០០នៃក្រមព្រហ្មទណ្ឌ និងបង្គាប់ឲ្យជនជាប់ចោទទាំង៣នាក់ សងសំណងទៅដើមបណ្តឹងត្រូវជាឪពុកម្តាយជនរងគ្រោះឈ្មោះ (វ៉ុន រដ្ឋា) ភេទស្រី អាយុ១៩ឆ្នាំ សិស្សថ្នាក់១២A (ស្លាប់ ) ចំនួន៤០លានរៀល។
ចំណែកជនជាប់ចោទ៤នាក់ទៀត រួមមាន ១-ឈ្មោះ សុខ សុភាព ភេទប្រុស អាយុ១៨ឆ្នាំ ២-ឈ្មោះ សុខ សុភា ភេទប្រុស អាយុ២២ឆ្នាំ ៣-ឈ្មោះ ឡេង ដានី ភេទស្រី អាយុ១៨ឆ្នាំ និង៤-ឈ្មោះ គ្រី ចន្ធូ ភេទស្រី អាយុ១៨ឆ្នាំ ផ្តន្ទាទោសដាក់ពន្ធនាគារម្នាក់ៗ២ឆ្នាំ៦ខែ ក្រោមការចោទពីបទទទួលផលចោរកម្ម និងសមគំនិតទទួលផលចោរកម្ម។
គួរំលឹកថា កាលពីថ្ងៃទី១០ ខែឧសភា ឆ្នាំ២០១៦ សិស្សថ្នាក់ទី១២A នៃវិទ្យាល័យពងទឹក ម្នាក់ឈ្មោះ វ៉ុន រដ្ឋា ភេទស្រី អាយុ១៩ឆ្នាំ ត្រូវបានឃាតករសម្លាប់នៅក្នុងផ្ទះបាក់បែកគ្មានមនុស្សនៅមួយកន្លែង ស្ថិតក្នុងភូមិទ័ពបោះ សង្កាត់ព្រៃវែង ខណ្ឌដង្កោ។ ក្នុងថ្ងៃដដែលសមត្ថកិច្ចបានចាប់ខ្លួនជនសង្ស័យ និងបក្សពួកចំនួន៧នាក់។
នាពេលសវនាការជនជាប់ចោទ ជុំ វីរៈ បានសារភាពថា គេជាអ្នកញៀនគ្រឿងញៀនជាច្រើនឆ្នាំហើយ នៅថ្ងៃកើតហេតុគេបានប្រើប្រាស់គ្រឿងញៀននៅពេលព្រឹក។ នៅពេលថ្ងៃត្រង់គេបានផឹកស៊ីជាមួយឈ្មោះ ហុង សុជាតា និងឈ្មោះ លឹម បញ្ញវ័ន្ត រហូតស្រវឹងវង្វេង ។ ដោយសារគេជំពាក់លុយអ្នកផ្សេងចំនួន៧០ដុល្លារគ្មានអ្វីសង គេក៏បានហៅជនរងគ្រោះ វ៉ុន រដ្ឋា ដែលជាប្អូនជីដូនមួយមកជួប ។ ក្រោយមកក៏បាននាំនាងទៅកាន់កន្លែងស្ងាត់ ហើយទាញដៃចូលក្នុងផ្ទះបាក់បែក រួចយកដុំឥដ្ឋវាយលើមុខចំនួន២ដង៕
ចែករំលែកព័តមាននេះ