ចក្រភពអង់គ្លេស ៖ យោងតាមការិយាល័យស្ថិតិជាតិរបស់ចក្រភពអង់គ្លេសឲ្យដឹងថា អតិផរណារបស់ប្រទេសនេះបានកើនដល់២,៣%ក្នុងខែកុម្ភៈ បើធៀបនឹងឆ្នាំមុន ដែលជាកម្រិតខ្ពស់ជាងគេក្នុងរយៈពេលជាង៣ឆ្នាំមកនេះ ។ ល្បឿននៃការកើនឡើងពី១,៨%ក្នុងខែមករា ក៏បានធ្វើឲ្យអ្នកវិភាគភ្ញាក់ផ្អើលផងដែរ ។
តម្លៃផលិតផលបានកើនឡើងជាបន្តបន្ទាប់ក្នុងរយៈពេលមួយឆ្នាំកន្លងមក ផ្ទុយនឹងឆ្នាំ២០១៥ ដែលតម្លៃបានធ្លាក់ចុះ ។ វាជានិន្នាការមួយកើតមានកាន់តែលឿនតាំងពីចក្រភពអង់គ្លេសបោះឆ្នោតចាកចេញពីសហភាពអឺរ៉ុបមកម្ល៉េះ ដែលធ្វើឲ្យតម្លៃប្រាក់ផោនធ្លាក់ចុះ ។
តម្លៃប្រេងឥន្ធនៈ អាហារ គ្រឿងសង្ហារិម និងកុំព្យូទ័រ គឺស្ថិតក្នុងចំណោមប្រភពដែលបង្កឲ្យមានអតិផរណាក្នុងខែកុម្ភៈ ។
ការកើនឡើងលើសអត្រា២%នេះ បានបង្កជាឧបសគ្គមួយសម្រាប់ធនាគារជាតិរបស់អង់គ្លេសដែលមានគោលដៅរក្សាអត្រាអតិផរណាឲ្យមានកម្រិតល្មម។ ធនាគារជាតិអាចនឹងធ្លាក់ក្រោមសម្ពាធក្នុងការដំឡើងអត្រាការប្រាក់ពីកម្រិតដ៏ទាបខ្លាំងរបស់ពួកគេផងដែរ ។
លោក Nick Harrison នាយកមួយរូបក្នុងធនាគារ First Direct និយាយថា ៖ «ការកើនឡើងនៃតម្លៃបានជំរុញដល់អតិផរណាឲ្យកើនលើសគោលដៅរបស់ធនាគារជាតិ ដែលស្មើនឹង២% ហើយគេគិតថា វានឹងបន្តកើនឡើងបន្ថែមទៀតក្នុងប៉ុន្មានខែខាងមុខ ប៉ុន្តែការលូតលាស់នៃប្រាក់បៀវត្សមុនបានកើនក្នុងល្បឿនតែមួយទេ ។ ដូច្នេះ ប្រជាជនកំពុងត្រូវបានប៉ះពាល់ដោយអតិផរណានេះ » ។
ប្រជាជនអង់គ្លេសនឹងប្រទះឃើញតម្លៃផលិតផលនាំចូលកើនឡើង ដូចជា រថយន្តអាល្លឺម៉ង់ ឬស្រាក្រហមបារាំងជាដើម ។
គួរបញ្ជាក់ថា តម្លៃប្រាក់ផោនបានធ្លាក់ចុះប្រមាណ២០%ក្នុងប៉ុន្មានខែនេះ បន្ទាប់ពីការបោះឆ្នោត Brexit កាលពីខែមិថុនា ព្រោះតែមានភាពព្រួយបារម្ភពីទស្សនៈសេដ្ឋកិច្ចរបស់ចក្រភពអង់គ្លេស ។ ពេលនេះ តម្លៃប្រាក់ផោនបានធ្លាក់ពី១,៥០ដុល្លារនាថ្ងៃបោះឆ្នោត មកត្រឹម១,២៥ដុល្លារ ។
មានការគិតថា បន្ទាប់ពី Brexit ឧបសគ្គពាណិជ្ជកម្ម និងពន្ធគយថ្មី នឹងត្រូវបានសម្រេចឡើងរវាងចក្រភពអង់គ្លេស និង EU ជាដៃគូពាណិជ្ជកម្មធំជាងគេរបស់ខ្លួន ៕
ចែករំលែកព័តមាននេះ