ណែនាំច្រើនដងមិនស្តាប់ ប្រើធម៌ក្តៅ
ខេត្តបន្ទាយមានជ័យ ៖ ម៉ូតូចម្រុះចំនួន5គ្រឿងត្រូវបានសមត្ថកិច្ចជំនាញចរាចរណ៍សណ្តាប់ធ្នាប់សាធារណៈក្រុងប៉ោយប៉ែត ចាប់លើកដាក់រថយន្តដឹកយកទៅអធិការដ្ឋាន ដើម្បី
ខេត្តបន្ទាយមានជ័យ ៖ ម៉ូតូចម្រុះចំនួន5គ្រឿងត្រូវបានសមត្ថកិច្ចជំនាញចរាចរណ៍សណ្តាប់ធ្នាប់សាធារណៈក្រុងប៉ោយប៉ែត ចាប់លើកដាក់រថយន្តដឹកយកទៅអធិការដ្ឋាន ដើម្បីអប់រំម្ចាស់ និងឲ្យធ្វើកិច្ចសន្យា ដោយសារក្តៅស្លឹកត្រចៀកចុះណែនាំច្រើនដងនៅតែមិនស្តាប់ ដោយឈប់ចតអនាធិបតេយ្យលើដងផ្លូវជាតិមុខចំណុចផ្សារកណ្តាល ក្នុងភូមិ និងសង្កាត់ផ្សារកណ្តាល។
ការចុះរៀបចំសណ្តាប់ធ្នាប់រហូតឈានដល់ការចាប់យកម៉ូតូ ដើម្បីអប់រំម្ចាស់បានធ្វើឡើងនៅព្រឹកថ្ងៃទី27 មីនា 2017 ដោយដឹកនាំដោយលោកវរសេនីយ៍ត្រី សៅ សារឿន អធិការរងទទួលផែនចរាចរណ៍ និងលោក ញ៉ាន អ៊ុយអ៊ាង អធិការរងទទួលផែនសណ្តាប់ធ្នាប់ និងកម្លាំងក្រោមឱវាទ។
លោកវរសេនីយ៍ត្រី សៅ សារឿន ប្រាប់កោះសន្តិភាពថា ដោយសារនៅចំណុចកើតហេតុ (មុខផ្សារកណ្តាល) លោកបានចុះរៀបចំសណ្តាប់ធ្នាប់ ហើយបានណែនាំដល់ម្ចាស់យានយន្ត និងអាជីវករដែលលក់ដូរនៅទីនោះឲ្យចត និងលក់ដូរឲ្យមានសណ្តាប់ធ្នាប់6ទៅ7ដងហើយ តែហាក់ដូចមិនស្តាប់ ទើបថ្ងៃនេះលោកទទួលបទបញ្ជាពីលោកវរសេនីយ៍ទោ ធិន ស៊ិនដេត អធិការនគរបាលក្រុងឲ្យចាត់វិធានការក្តៅចាប់យកម៉ូតូ ដើម្បីឲ្យម្ចាស់ចូលទៅទទួលការអប់រំ និងធ្វើកិច្ចសន្យា។
លោក សៅ សារឿន បន្តថា វិធានការណ៍ក្តៅនេះ និងធ្វើបន្តនៅកន្លែងផ្សេងៗទៀត ចាប់ពីថ្ងៃនេះតទៅ។
យ៉ាងណាក៏ដោយ ការចាប់យកម៉ូតូនេះលោក សៅ សារឿន អះអាងថា មិនមានការផាកពិន័យទេ គឺក្រោយការអប់រំ និងធ្វើកិច្ចសន្យារួច នឹងប្រគល់ឲ្យម្ចាស់យកត្រឡប់ទៅវិញ៕
ចែករំលែកព័តមាននេះ