ត្រៀមទាំងសាច់ ត្រៀមទាំងរទេះ មានអីរត់បាតជើង.សព្រាត
រាជធានីភ្នំពេញ ៖ ចោរ១ក្រុមមានទាំងសាច់គោប្រឡាក់ថ្នាំពុល១ថង់ ទម្ងន់ប្រហែល១ជាងគីឡូក្រាមផង បានចូលទៅធ្វើសកម្មភាពគាស់ផ្ទះមួយកន្លែងប៉ងលួចទ្រព្យសម្បត្តិ ប៉ុន្តែត្រូវបាន
រាជធានីភ្នំពេញ ៖ ចោរ១ក្រុមមានទាំងសាច់គោប្រឡាក់ថ្នាំពុល១ថង់ ទម្ងន់ប្រហែល១ជាងគីឡូក្រាមផង បានចូលទៅធ្វើសកម្មភាពគាស់ផ្ទះមួយកន្លែងប៉ងលួចទ្រព្យសម្បត្តិ ប៉ុន្តែត្រូវបានម្ចាស់ផ្ទះចេញទៅទាន់ ក្រុមចោរទាំងនោះបានរត់គេចខ្លួនបាត់អស់ ដោយបន្សល់ទុកនូវសាច់គោ១ថង់នោះ រួមជាមួយរទេះរុញ១គ្រឿង និងសម្ភារគាស់ផ្ទះមួយចំនួន ព្រមទាំងកាំបិតផងដែរ។
ហេតុការណ៍នោះបានកើតឡើង កាលពីវេលាម៉ោង២យប់រំលងអធ្រាត្រឈានចូលថ្ងៃទី២៦ ខែមីនា ឆ្នាំ២០១៧ នៅក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ លុះដល់វេលាម៉ោង៩និង៣០នាទីព្រឹក ថ្ងៃទី២៦ ខែមីនា ឆ្នាំ២០១៧ម្ចាស់ផ្ទះរងគ្រោះ២នាក់ប្ដីប្រពន្ធបានជិះម៉ូតូ១គ្រឿងឌុបគ្នា ដោយមានទាំងកូនតូច២នាក់ផង ធ្វើដំណើរទៅកាន់ប៉ុស្ដិ៍នគរបាលចោមចៅ ខណ្ឌពោធិ៍សែនជ័យ ដាក់ពាក្យបណ្ដឹងសុំឲ្យនគរបាលជួយអន្តរាគមន៍ស្រាវជ្រាវចាប់ចោរទាំងនោះ និងទៅដកហូតយកវត្ថុតាងដែលចោររត់ចោលនោះទៅរក្សាទុកនៅប៉ុស្ដិ៍។
ម្ចាស់ផ្ទះខាងលើនោះ ប្ដីឈ្មោះ ងួន ចាន់ឫទ្ធី អាយុ៣៥ឆ្នាំ មុខរបរជាមន្ត្រីយោធា និងស្ត្រីជាប្រពន្ធឈ្មោះ ស្រ៊ុន ចាន់ធឿន មុខរបរលក់ចាប់ហួយនៅផ្ទះ ពួកគាត់ទាំងពីរនាក់នោះមានទីលំនៅក្នុងភូមិថ្មគោល សង្កាត់ចោមចៅ។ ដោយឡែកទ្រព្យនៅក្នុងផ្ទះរបស់ពួកគាត់មិនទាន់ត្រូវបានបាត់បង់នៅឡើយទេ ប៉ុន្តែចោរបានវាយបំបែកអំពូលភ្លើងអស់១ ចំណែកក្រុមចោរទើបចូលទៅដល់ក៏ត្រូវគាត់ឃើញទាន់ ហើយចោរនោះបាននាំគ្នាបាត់ស្រមោលតែម្ដង។
ម្ចាស់ផ្ទះខាងលើនោះបាននិយាយថា នៅយប់ថ្ងៃកើតហេតុនោះ មានចោរ១ក្រុមបានចូលទៅក្នុងបរិវេណផ្ទះរបស់ពួកគាត់ ហើយបានធ្វើសកម្មភាពវាយបំបែកអំពូលភ្លើងដែលគាត់ដាក់បំភ្លឺនៅខាងមុខផ្ទះនោះ បណ្ដាលឲ្យបែកខ្ទេចខ្ទី និងបង្កឲ្យមានភាពងងឹតឈឹងតែម្ដង ដើម្បីពួកចោរងាយស្រួលធ្វើសកម្មភាពគាស់ទ្វារផ្ទះលួចទ្រព្រសម្បត្តិនៅក្នុងផ្ទះពួកគាត់។ ប៉ុន្តែចៃដន្យដោយនៅយប់នោះពួកគាត់បានចេញក្រៅផ្ទះ ដើម្បីមើលស៊ីម៉ង់ត៍ និងសម្ភារសំណង់ដែលប្អូនគាត់កំពុងសាងសង់ផ្ទះជាប់នឹងផ្ទះគាត់នោះដែរ ខ្លាចភ្លៀងទទឹក ស្រាប់តែឃើញក្រុមចោរកំពុងចូលធ្វើសកម្មភាពកាត់សោរផ្ទះ។ បន្ទាប់ពីបានឃើញគាត់ ក្រុមចោរក៏នាំគ្នារត់គេចខ្លួនយ៉ាងស្លន់ស្លោរ បន្សល់ទុកនូវសាច់គោប្រឡាក់ថ្នាំបំពុល១ឆ្កែ១ថង់ប្រហែលជាង១គីឡូក្រាម រួមជាមួយរទេះរុញ១គ្រឿង និងសម្ភារគាស់ផ្ទះមួយចំនួន ព្រមទាំងកាំបិតផងដែរ។
ប្រភពដដែលបានបន្តទៀតថា ខណៈនោះពួកគាត់បានអូសរទេះនោះ រួមជាមួយវត្ថុតាងពាក់ព័ន្ធទាំងអស់ទុកយ៉ាងប្រុងប្រយ័ត្ន លុះព្រឹកឡើងទើបពួកគាត់សម្រេចចិត្តដាក់ពាក្យបណ្ដឹង នៅប៉ុស្ដិ៍នគរបាលចោមចៅ ដើម្បីសុំឲ្យនគរបាលជួយអន្តរាគមន៍ធ្វើការស្រាវជ្រាវរកមុខសញ្ញាចោរ ព្រោះពួកគាត់មានការភ័យខ្លាចណាស់។ មិនតែប៉ុណ្ណោះបានសុំឲ្យនគរបាលចុះទៅយកវត្ថុតាងដែលពួកគាត់រឹបអូសបានពីពួកចោរដែលរត់ចោលនោះទៅរក្សាទុកនៅប៉ុស្ដិ៍ផងដែរ៕
ចែករំលែកព័តមាននេះ