ខេត្តកណ្តាល ៖ ផ្ទះប្រជាពលរដ្ឋនៅជាប់ច្រាំងទន្លេបាសាក់ ខាងជើងវត្តឈូងលៀប ស្ថិតក្នុងភូមិកោះគរ ឃុំរកាខ្ពស់ ស្រុកស្អាង មួយខ្នង ទទឹង៤ បណ្តោយ៥ម៉ែត្រ ដែលធ្វើអំពីឈើជញ្ជាំងសង្កសី ដំបូលស័ង្កសី ត្រូវបាន
ខេត្តកណ្តាល ៖ ផ្ទះប្រជាពលរដ្ឋនៅជាប់ច្រាំងទន្លេបាសាក់ ខាងជើងវត្តឈូងលៀប ស្ថិតក្នុងភូមិកោះគរ ឃុំរកាខ្ពស់ ស្រុកស្អាង មួយខ្នង ទទឹង៤ បណ្តោយ៥ម៉ែត្រ ដែលធ្វើអំពីឈើជញ្ជាំងសង្កសី ដំបូលស័ង្កសី ត្រូវបានបាក់ចូលទៅក្នុងទន្លេបាសាក់ កាលពីវេលាម៉ោង៥ល្ងាច ថ្ងៃទី ២៥ ខែមីនា និងផ្ទះចំនួន៩ខ្នងទៀត កំពុងទទួលរងការគំរាមកំហែងនៃគ្រោះបាក់ដីច្រាំងទន្លេនេះ កំពុងធ្វើការរុះរើបន្ទាន់។
ករណីបាក់ច្រាំងទន្លេនេះ គឺមិនមានគ្រោះថ្នាក់ដល់មនុស្ស និងសត្វទេ ។ ប្រជាពលរដ្ឋបានចោទប្រកាន់ថា បណ្តាលមកពីទូកបូមខ្សាច់ដែលធ្វើសកម្មភាពបូមខ្សាច់ពីទូកឡើងលើច្រាំងនៅក្បែច្រាំងពេក ដែលមានផ្ទះប្រជាពលរដ្ឋនៅទីនោះ។ ជនរងគ្រោះម្ចាស់ផ្ទះដែលបាក់ចូលក្នុទន្លេឈ្មោះ ឡូញ ឡុច និងផ្ទះ៩ខ្នងដែលបានរុះរើផ្ទះឈើ ប្រក់ស័ង្កសីទាំងអស់ ។
ប្រជាពលរដ្ឋដែលរងគ្រោះបាននិយាយថា នេះអាចចាត់ទុកជាសំណាងល្អដែលបាក់ច្រាំងទន្លេនេះកើតឡើងពេលថ្ងៃអាចបានដឹងមុន បើពេលយប់វិញ អាចមានគ្រោះថ្នាក់ដល់អាយុជីវិតមនុស្សមិនខានឡើយ ហើយក៏មិនអាចរុះរើផ្ទះបានទាន់ដែរ។ ប្រជាពលរដ្ឋរងគ្រោះបានប្រាប់ឱ្យដឹងទៀតថា ពួកគាត់ទាំងអស់គ្នាជាប្រជាជនក្រីក្រមកសង់ផ្ទះទៀមតូចៗជាប់ច្រាំងទន្លេយូរហើយ ។ រយៈពេលជាងពីរខែមកនេះ មានក្រុមហ៊ុមបូមខ្សាច់មកធ្វើទីតាំងបូមខ្សាច់ ឡើងរញ្ជួយដីបូមឡើងទៅខាងលើនៅចណុចកើតហេតុនេះ ពេលទូកបូមខ្សាច់ចេញចូល ស្លាបចាក់បានខួងដីកាន់តែជ្រៅខ្លាំង បណ្ដាលឱ្យបាក់ ច្រាំងបែបនេះតែម្ដង ។
នៅព្រឹកថ្ងៃកើតហេតុ គេបានឃើញដីប្រេះ លុះដល់ថ្ងៃរសៀល ក៏បាក់ដី និងនាំយកផ្ទះមួយទៅក្នុងទន្លេ បាសាក់តែម្ដង។ ហើយដីនៅទីនោះបាក់បន្តិចម្ដងៗទៀត ទើបម្ចាស់ផ្ទះ៩ខ្នងទៀត សម្រេចចិត្តធ្វើការរុះរើជាបន្ទាន់ ដោយមានអាជ្ញាធរ និងសមត្ថកិច្ចជួយរុះរើផង ។ បានតែមួយយប់ច្រាំងនោះក៏បន្តបាក់ជិតដល់ចិញ្ចើមផ្លូវជាតិតែម្ដង ដែលមានចម្ងាយបាក់ដីប្រមាណ១០ម៉ែត្រ និងបណ្ដោយប្រមាណ២០ម៉ែត្រ ជិតដល់ចិញ្វើមផ្លូវជាតិលេខ២១ អា។
នៅព្រឹកថ្ងៃទី២៦ មីនា អាជ្ញាធរស្រុក ខេត្ត មន្ត្រី ក្រសួងរ៉ែ បានចុះទៅពិនិត្យកន្លែងកើតហេតុ។
លោក ឌិត ទីណា រដ្ឋលេខាធិការក្រសួងរ៉ែ បានពន្យល់ប្រាប់ប្រជាជនរងគ្រោះថា ចំណុច ដែលបាក់ច្រាំងនេះ មិនមានការបូមខ្សាច់ពីបាតទន្លេទេ មានតែបូមពីទូកកាណូតឡើងមកលើ ច្រាំង វាមិនប៉ះពាល់ដល់ច្រាំងទន្លេនោះទេ ។
លោកថា លោកនឹងផ្អាកការបូមខ្សាច់ឡើងចេញពីទូកនៅទីនេះសិន ដើម្បីឱ្យខាងជំនាញមកធ្វើការសិក្សាស្រាវជ្រាវពីមូលហេតុបាក់ច្រាំងនេះ។
លោកបានសន្និដ្ឋាន ជំហ៊ានដំបូងថា ការបាក់នេះ គឺដោយសារតែចរន្តខ្សែទឹកហូរបុកមកចំកន្លែងនេះ ដែលដីលយចូលក្នុងទន្លេ ទឹកហូរបុកច្រោះពីក្រោម ក៏បណ្ដាលឱ្យបាក់បែបនេះ និងម្យ៉ាងទៀតដីនៅចំណុចនេះ ជាដីល្បាយ និងសើមថែមទៀត ។ កន្លែងបូមខ្សាច់ដាក់ទូកកាណូតនៅខាងលើ និងខាងក្រោមឆ្ងាយពីកន្លែងបាក់ដីនេះ ដែលខាងក្រសួងបានបោះពោងត្រឹមត្រូវ ឱ្យក្រុមហ៊ុនបូមខ្សាច់ ដើម្បីស្ដារទន្លេ និងបញ្ជៀសបញ្ហាបាក់ច្រាំងនេះ។ នាពេលនោះ លោក ឌិត ទីណា និងក្រុមការងារគណៈពង្រឹងស្រុកស្អាង បានផ្ដល់ថវិកាមួយចំនួនដល់ ប្រជាជនរងគ្រោះដោយបាក់ច្រាំងនេះ៕
ចែករំលែកព័តមាននេះ